ÁR ÑOHO AR TIMOTEO 3

1Di ne gi pödi n'ehe, nuya ngöxpa xa ma da ehe ya pa xiñhembi. 2Nuya jö'i xa ma da mhöse̱, di ne da me̱'sa nze̱ye̱ ya m'e̱ts'i, xa di nete, xa di ñ'ets'i, di tsanga Jö. Hindi o̱ta yá dada, hindi ñ'otho yá njamödi, ne hindi ne da m'u̱i xiñho. 3Hinte di ñ'otho yá mhöte ne yá nhwëki, di ju̱xa ya nhemhñö, di ne da 'yo̱t'a gatho nö'ö ne'u̱, di thota yá nts'o, di u̱tsa gatho nö'ö xiñho. 4Ya hya̱te, ngut'a mbo̱ yá kwe̱, di gese̱, m'e̱t'o ne da njohya'u̱ ne ka da hyonga Jö. 5Ñ'udi ngu ya hogajö'ihmö, mödi hingi nheki ár ts'e̱di Jö ha yá mu̱i. 'Wege, yo gi nthöskwiyu̱. 6Ngetho 'rayu̱ 'yo ha ya ngu ka ya 'be̱hñö muxyá tha̱i, ñhe̱gi da hya̱t'a yá mfeni da 'yo̱t'a gatho nö'ö ne'u̱. 7Nuya 'be̱hñöyu̱ hyax'mu̱ honga tema 'ra'yo da bödi, ne hiñham'u̱ da zo̱nga ár ngöts'i da bö nö'ö majöni. 8Nuya kate jö'iyu̱ hingi ne da 'yo̱xa ár mhö Jö, jangu ar Hanes ne ar Hambre himbi ne bi 'yo̱xa nö'ö mi xipa ar Moise. Nuyu̱ xi ts'oka yá mfeni, xi njot'wa ar goxthi hinda ñ'emu̱i. 9Hinda tsa̱ da nu̱nga yá 'be̱fi, ngetho da fötho hingi ho nö'ö möñ'u̱, ngu bi fötwa yá ts'o'be̱fi nu'u̱ himbi ne bi 'yo̱xa ar Moise. 10Ha nu'ge xka te̱mga ma nt'uti, xka pötka ma m'u̱i ne habu̱ di ne ga tso̱ni, ma ñ'emu̱i, ma nkomu̱i, ma mhöte, ne hanja di tse̱ta ya thogi. 11Gi pödi ya nt'u̱tsa ne ya u̱gi da thohnu̱ har hnini Antiokia, Ikonio, ne Listra. Gatho nuya thogiyu̱ ar tsi Dada bi po̱kagi. 12Njap'u̱ gatho nu'u̱ ne da m'u̱ xiñho di ñ'owi ar tsi Hmu Hesukristo, ma da tho ya nt'u̱tsa n'ehe. 13Ha nuya ts'ojö'i ne ya hya̱te 'yo di ma di hñuxa yá ts'oki, nu'u̱ 'yo ha̱t'a ma'ra ne ntha̱t'u̱. 14Jange nu'ge yo ma gi hye̱p'u̱ nö'ö xka pödi ne xi zo ri mfeni xiñho, xka nut'wa yá hogam'u̱i nu'u̱ togo xi ut'a'i. 15Ngar t'u̱lo bötsitho nga pötwa ár T'ofo Jö, ne nuna tsa̱ da 'ra'a ar hoga mfödi gi mpo̱ho̱ xki ñ'emu̱i ar tsi Hmu Hesukristo. 16Gatho ár T'ofo Jö, go bi unga ar mfeni'ö bi t'ot'i. Jange xiñho da t'uta ma'ra, da zopa yá mfeni, da zu̱i, ne da 'yot'wa ar 'ñu hanja da ñhogajö'i. 17Ne njap'u̱ nu'u̱ te̱nga Jö di 'bu̱i xiñho, hinte di k'at'wabi da me̱ n'ar hoga 'be̱fi.

will be added

X\