ÁR ÑOHO AR TIMOTEO 2

1Nu'ge po̱ntho ma t'u̱'i har ñ'emu̱i, umba ri mu̱i gi pe̱pa Jö. Ju̱ nunar ts'e̱di xi hwëgagihu̱ ar tsi Hmu Hesukristo. 2Ne nö'ö xka 'yo̱xkagi xta mönga madeda ya mhunts'i, 'ye̱nt'wa ha yá 'ye̱ nu'u̱ gi handi 'bu̱i xiñho ne da tsa̱ da uta ma'ra. 3Jange nu'ge 'mu̱, tse̱ta ya thogi ngu n'ár hoga 'be̱go ar tsi Hmu Hesukristo. 4Jangu n'ar ndogu hingi tsa̱ da me̱ man'ar 'be̱fi, ho̱nse̱ honga da numañho togo xi umba nunar 'be̱finu̱. 5Njap'u̱ nö'ö ntöhö n'ehe, nu'mu̱ hinda ñ'eni ngu di 'ñepi, hinda t'umba ar nthöhö. 6Ar mot'i nu'mu̱ ne da nxofo, mahyoni da nu̱ ár xa̱nthe da mpe̱fi m'e̱t'o. 7Nu xiñho nö'ö di xi'a'i, ne ar tsi Hmu da xok'a ri mfeni gi pödi teme di bo̱nga gatho. 8Benga ar tsi Hmu Hesukristo ár ma̱nga'be̱to ar Dabi, bi du ne bi mengi bi jo'spa ár te man'agi. Gehnu̱ enga ar hoga mhö di mönga. 9Ngetho di mönga nunar mhönu̱, di tho ar thogi di jot'wa har fa̱di ngu n'ar hyote. Mödi nunár mhö Jö hinda tsa̱ da jot'i. 10Jange di tse̱ta ya thogi bi epkagi, di honi da ñ'emu̱i ar tsi Hmu Hesukristo nu'u̱ xi hwahna Jö, ne njap'u̱ da mpo̱ho̱ ne da m'u̱hwi hár nsunda gatho ya pa. 11Majöni nunar mhö enö njawa: Nu'mu̱ da tuwihu̱ ar tsi Hmu Hesukristo, ma ga 'bu̱hwihu̱ n'ehe. 12Nu'mu̱ ga tse̱thu̱ gatho nö'ö di 'ñepkagihu̱, ma ga ndöwihu̱ n'ehe. Ha nu'mu̱ ga ko̱ñhu̱'ö, ma da ko̱ngagihu̱ n'ehe. 13Nu'mu̱ ga he̱hu̱ di to̱'mhu̱ ar tsi Dada, nö'ö hinda hye̱gagihu̱, ngetho hinda tsa̱ da pa̱ta ár ne. 14Bembabi ya ku ne zo hár nthandi Jö hinda ntsa̱hñöki, ngetho hinter ñho, ho̱nse̱ ts'okwa yá mfeni nu'u̱ to o̱de. 15Umba ri mu̱i gi ñhoga'be̱go hár nthandi Jö, ngu n'ar 'be̱go hinte pe̱'sa te da m'e̱twa ár tsa̱, di mönga xiñho ar mhö majöni. 16Hye̱p'u̱ nuya mhö hinte o yá 'ñu, ngetho hinte ár ñho, ho̱nse̱ tsits'i da 'yo̱t'a ya ts'oki nu'u̱ togo ñö njap'u̱. 17Nuyá ts'ont'uti ma da nu̱ngi ngu n'ar hñeni tsit'a ar ndo'yo. 'Ra nu'u̱ to möñ'u̱, gehyu̱ ar Imeneo ne ar Fileto. 18Xi hye̱p'u̱ nö'ö majöni, ngetho möñ'u̱ xi mengi xi nte nu'u̱ xki du, ne ts'okwa yá ñ'emu̱i nu ma'ra. 19Ha nuna teme xi mönga Jö, hinda tsa̱ da mponi, da̱majöni enga njawa: Ar tsi Hmu pö nu'u̱ togo yá me̱ti'ö. Ne enö n'ehe: Dá hye̱p'u̱ n'agitho yá ts'oki gatho nu'u̱ no̱mba ár thuhu ar tsi Hmu Hesukristo. 20Ha n'ar döta ngu te gatho janu̱ har ku̱ni, 'ra xi mhödi xi thoka k'axt'i ne t'axbo̱jö, 'ra xi thoka zatho, ma'ra domhitho. 'Rayu̱ mpe̱ ha ya hoga 'be̱fi, ma'ra mpe̱ ha ya 'be̱fi hints'u̱ pe̱'sa ár nsu. 21Njap'u̱tho ya ku n'ehe, nö'ö togo da hye̱p'u̱ yá ts'oki da 'weke da me̱pabi ar tsi Dada, da tsa̱ da mpe̱fi xiñho ne da 'ñe'spa ár nsu Jö, di 'bu̱i da 'yo̱t'a n'ar hoga 'be̱fi ngu ne'ö. 22Jange yo ma gi te̱mba yá mfeni nu'u̱ ya bötsi te gatho ne'u̱. Umba ri mu̱i gi ñhogajö'i, gi pe̱'sa ar ñ'emu̱i, ar mhöte, gi 'bu̱hwi xiñho nu'u̱ ma'ra ya ku mat'a Jö xint'axi yá mfeni. 23Yo gi japamasu nuya ntsa̱mfödi hinte o yá 'ñu, hingi pödi tema di göts'i. Gi pöke hinte mañho nju̱ki, ho̱nse̱ u ar tsibi. 24Ngetho ár 'be̱go ar tsi Hmu hingi ho da ntsa̱hñökiwi ma'ra. Nö'ö xiñho da me̱fi, di ñhogajö'i, di pödi da uta ma'ra, ne da tse̱ta ya thogi. 25Da me̱'sa n'ar hogamu̱i da hñökwa nu'u̱ togo hingi ne da numañho nö'ö mhö, xömhö Jö da umba ar se̱ki da 'yo̱t'wa ár ntso̱'mi, ne da zo yá mfeni nö'ö majöni. 26Ne njap'u̱ da tsa̱ da k'ot'a hár 'ye̱ ar ts'ondöhi habu̱ mi ku̱, mi japabi nda 'yo̱t'a gatho nö'ö mi ne'ö.

will be added

X\