1 Nuga dar Pablo, ár mpo̱tegi ar tsi Hmu Hesukristo ngu bi benga Jö, ne bi 'be̱pkagi ga mönga ar te hiñham'u̱ da göts'i, xi ñöt'wabi gatho nu'u̱ togo da ñ'emu̱i ar tsi Hmu Hesukristo. 2 Di ot'a nunar he̱'minu̱, Timoteo, ngu ma hmöka t'u̱'i. Jö ma Dadahu̱ ne ma tsi Hmuhu̱ Hesukristo da hwëk'a'i yá ñho, ne da ko ár mu̱i da ma̱x'i gi 'bu̱ n'ar hogam'u̱i. 3 Jö di umba njamödi togo di pe̱pabi hinte tsu̱ka ma mfeni, ngu bi me̱pabi ma pale mam'e̱t'o n'ehe, ne parxui di beñ'a'i nú'mu̱ di a̱pa Jö. 4 Di beni hanja ga nzoni nú'mu̱ nda ñhe̱hu̱, di nemhö ga pengi ga hant'a'i, ne ga njohya man'agi. 5 Bi e ha ma mfeni nö'ö ar hoga ñ'emu̱i gi pe̱ts'i hingi ñ'entho, di hñöxa ngu mi pe̱'sa m'e̱t'o ri möle Loida. M'e̱fa bi gohwi ri nönö Eunise, ne di pödi bi thok'a'i n'ehe. 6 Jange di 'be̱p'a'i xa gi umba ri mu̱i gi japi da xu nunar nt'uni xi hwëk'a ár Hñö Jö nú'mu̱ da hus'a ma 'ye̱. 7 Ngetho Jö xi 'rakagihu̱ ar ts'e̱di ga tse̱thu̱, da nja ma mhötehu̱, ga su ma mfenihu̱, hinge ga ntsuhu̱. 8 Jange yo ma gi ntsa̱ gi mö xka ñ'emu̱i ar tsi Hmu, ne hingi nko̱ni di ntsixkwi, nuga di jot'a har fa̱di ngetho di mömba ár mhö Jö. Da̱twa majöni n'ehe, mödi da nt'u̱tsa'i ne gi tho nze̱ye̱ ya thogi, ne Jö da 'ra'a ar ts'e̱di gi tho gathoyu̱. 9 Gehnu̱ bi po̱kagihu̱, ne bi zonkagihu̱ ga 'bu̱hu̱ n'ar m'u̱i xint'axi. Bi jap'u̱ hinge xa di pe̱hu̱ ya ñho. Njap'u̱ xki beñ'ö nda hwëgagihu̱ nuya ñhoyu̱ nu'mu̱ nga ñ'emu̱ihu̱ ar tsi Hmu Hesukristo. Maham'u̱ xki benga njap'u̱ nda 'yo̱t'e nú'mu̱ himi thokta ar ximha̱i. 10 Ha xi nheki nuya payu̱ xi zo̱kwa ma tsi Po̱ho̱tehu̱ Hesukristo, togo bi hñöka ar ndöte, ne bi gu̱ka har hyats'i ar te hiñham'u̱ da göts'i, mi mönga ar hoga mhö. 11 Ne nuga bi thuxkagi ngu ar mpo̱te ga mönga nunar hoga mhönu̱, ne ga utwabi nu'u̱ hingya xodyo. 12 Jange di thoka gatho nuya thogipya. Hindi ntsa̱ ga da̱pa majöni ár mhö Jö, ngetho di pöka togo xta ñ'emu̱ibi. Ne di pödi xiñho pe̱'sa ar ts'e̱di da supka ma te xta e̱nt'wa hár 'ye̱, ga to̱'mi da zo̱ ar pa da thöxamajöni. 13 Te̱nga nuya hoga mhö xka 'yo̱xkagi xta mö, ne gi te̱nga ar ñ'emu̱i ne ar mhöte di pe̱'su̱, ngetho di 'bu̱hwihu̱ ar tsi Hmu Hesukristo. 14 Ngetho xi t'a'a ár ts'e̱di ár Hñö Jö 'bu̱ ha ri mu̱i, su nunar hoga mhö xi t'e̱nt'a ha ri 'ye̱. 15 Ngu xka pödi, gatho nuya ku me Asia bi hye̱gase̱wa, 'rayu̱ ar Figelo ne ar Ermogene. 16 Har tsi Hmu da hwëkwa ár njöpi ar ku Onesiforo ne gatho yá mëni, ngetho himbi ntsa̱ ba e bi k'öska har fa̱di, ne ba penga nze̱ye̱ ya pa bi hubga ma mu̱i. 17 Ngu mi zo̱kwa Nroma, dama bi hyongagi ne bi dingagi. 18 Dá me̱'spa ar nhwëki ar tsi Hmu nú'mu̱ xta hñö'spa majöni ar tsi Dada. Gi pöke xiñho hangu bi ma̱xkagihu̱ nú'mu̱ ndi 'bu̱hu̱p'u̱ Efeso.
