ÁR ÑOHO AR TESALONISENSE 2

1Nupya tsi kuhu̱, di ne ga xi'ahe tema da thogi xta penga ar tsi Hmu Hesu, ne hanja ma ga nthe̱wihu̱. 2Di a̱'ahe, yo ma gi pa̱ta ri mfenihu̱, yo ma gi tsuhu̱ togo ñöwi Jö emp'ö, wa ut'ahu̱, wa ha̱'ahu̱ eñ'u̱ xta pe̱ñ'ahe n'ar he̱'mi habu̱ di xi'ahe, nunar pa xta ñ'u ar tsi Hmu xi zo̱ho̱. 3Yo ma gi ñhe̱hu̱ ne hingi jafu̱masu nu'u̱ togo ne da 'wek'ahu̱ mönga nuya mhöyu̱. Ngetho ma da nheki m'e̱t'o ya jö'i ma da do̱xa Jö, ne ma da ñ'udi ar ts'ojö'i togo xi t'e̱nt'i da m'e̱ har 'be̱xui. 4Nö'ö ar tsojo'i'ö hinda ma da me̱pa Jö, hinda ma da hye̱ togo ne da me̱pi, hinto da hye̱gi da hyoni ne da no̱nga Jö. Hinge ho̱nse̱'ö, da yu̱t'a hár dönganijö Jö, ne da 'ñense̱ gehnu̱ Jö emp'ö. 5Ha hingi beñhu̱ ndi xi'ahu̱ nú'mu̱ ndi 'bu̱p'u̱. 6Gi pöhu̱ teme k'a'spa ár 'be̱fipya, to̱'mtho da zo̱ ar pa da ñ'udi xiñho. 7Nö'ö ar ts'oki ñ'öntho mpe̱fi, ho̱nse̱ to̱'mi da thöka togo hingi he̱gi. 8Nu'mú̱ hö, ma da nheki nunar ts'ojö'i'ö, togo ar tsi Hmu ma da hyo ho̱nse̱ da hwifi, ne da hwati xta nheki ár nsunda xta zo̱ho̱. 9Nunar ts'ojö'inu̱ hömpa ár ts'e̱di ar Ts'ondöhi. Tsa̱ da 'yo̱t'a ya döta nt'udi da ka ya jö'i. 10Nuyá nhemhñöyu̱ ma da ka ya jö'i xi m'e̱di, ngetho himbi ne bi hñöni ne himbi mödi ar mhö majöni bi nsipabi, ne njap'u̱ xi mpo̱hmö'u̱. 11Jange Jö xi pumbyá mfeni da jamfi nuya nhemhñöyu̱. 12Nu'mú̱, ma da t'et'a har tsibi gatho nu'u̱ himbi ne bi jamfi ar mhö majöni, ngetho mi johyatho'u̱ mi o̱t'a ar ts'oki. 13Ha nuje mahyoni hyax'mu̱ ga umfe njamödi Jö tsi kuhu̱, xa mö'ahu̱ ne bi hwañ'ahu̱ ngi mpo̱hu̱, nú'mu̱ mi ndu̱ ar ximha̱i. Ne nú'mu̱ nga ñ'emu̱ihu̱ nö'ö majöni, ár Hñö Jö bi t'axk'ahu̱. 14Jö bi 'yo̱t'a njap'u̱ ne nda tsa̱ ngi 'bu̱hwihu̱ hár nsunda ma tsi Hmuhu̱ Hesukristo, ngetho ga hñöñhu̱ ar hoga mhö da xi'ahe, gehnu̱ ar nts'ohni bi 'yo̱t'a'ihu̱ Jö. 15Jange tsi kuhu̱, tse̱ta ri ñ'emu̱ihu̱. Yo ma gi hye̱hu̱ nö'ö xta ut'ahe netho, wa ha ya he̱'mi xta pe̱ñ'ahe. 16Ne gese̱ ma tsi Hmuhu̱ Hesukristo ne Jö ma tsi Dadahu̱, togo bi mökagihu̱ ne bi 'raju̱ n'ar humamu̱i hiñham'u̱ da göts'i, ne bi hwëgagihu̱ n'ar hoga ndo̱'mi, 17dá hñup'a ri mu̱ihu̱, ne da 'ra'ahu̱ ar ts'e̱di te gi möñhu̱ ne te gi 'yo̱thu̱.

will be added

X\