ÁR ÑOHO AR TESALONISENSE 1

1Nuga dar Pablo, ar ku Silbano ne ar ku Timoteo di pe̱ñ'ahe nunar he̱'minu̱ nu'ahu̱ gar gamfihu̱ me Ntesalonika, gi 'bu̱hwihu̱ Jö ma Dadahu̱ ne ma tsi Hmuhu̱ Hesukristo. 2Jö ma Dadahu̱ ne ar tsi Hmu Hesukristo da 'ra'ahu̱ n'ar hogam'u̱i ne da hwëk'ahu̱ yá ñho. 3Ma tsi kuhu̱, mahyoni ga umfe njamödi Jö ngu di 'ñepi ga o̱the, ngetho xi te ri jamfihu̱. Gatho'ihu̱ tsit'a ri mu̱ihu̱ gi mhöhu̱ n'a ngu n'a, ne nunar mhötenu̱ hyax'mu̱ 'yo di te. 4Nuje di es'ahe ri nsuhu̱, di xife ma'ra yá nijö Jö, gi pe̱'su̱ ar ts'e̱ti ne ar jamfi, mödi gi thohu̱ nze̱ye̱ ya thogi ne ya nt'u̱tsa. 5Ha nú'mu̱ gi thohu̱ gatho nuya thogiyu̱, ka nhekip'u̱ ar hoga ts'u̱t'wi o̱t'a Jö. Ne tsa̱ da t'eñ'ahu̱ majöni di 'ñep'ahu̱ gi 'bu̱hu̱ hár ts'u̱t'wi, jange gi thohu̱ njap'u̱. 6Xiñho nu'mu̱ Jö da ko'spa yá ñöni nu'u̱ togo xi u̱tsa'ihu̱. 7Ne nu'ahu̱ xka thohu̱ ar nt'u̱tsa, da 'ra'ahu̱ ar tsa̱ya̱ mahye̱gi nguje, nu xta penga mhets'i ar tsi Hmu Hesu, di ñ'owi ya e̱nxe̱ di höpa ár ts'e̱di. 8Nu xta ekwa di e ha n'ar döta faspi da umbyá njut'i nu'u̱ himbi ne bi bö Jö, ne himbi 'yo̱twa ár hoga mhö ar tsi Hmu Hesukristo. 9Nu'u̱ ma da tho ya mfe̱i hiñham'u̱ da göts'i. Ma da t'e̱ni hinda ma da 'mu̱hwi ar tsi Dada, hinda ma da hyandwa ár nsunda ne ár ts'e̱di. 10Nunar pa xta ep'u̱, gatho nu'u̱ xi jamfi ma da nsundabi ne da 'ñe'spa ár nsu. Nu'ahu̱ ma gi 'yohu̱nu̱ n'ehe, ngetho xka jamfihu̱ nö'ö xta da̱he majöni. 11Jange hyax'mu̱ di a̱fe Jö da ma̱x'ahu̱ gi 'bu̱hu̱ xiñho, ngu ndi 'ñep'ahu̱ xi zoñ'ahu̱. Ne da jwata gatho ar ñho xi hñux'ö gi pe̱hu̱, ne da 'ra'ahu̱ ár ts'e̱di gi 'yo̱thu̱ nö'ö gi jamfihu̱. 12Ne njap'u̱ da nheki ár nsunda ar tsi Hmu Hesukristo ha ri m'u̱ihu̱, ne da t'es'a ri nsuhu̱ xka nthe̱xkwihu̱ ár nhwëki Jö ne ar tsi Hmu Hesukristo.

will be added

X\