ÁR ÑOHO AR PEDRO 3

1Ma tsi hmöka kuhu̱, gehnu̱ ár ñoho ar he̱'mi di ot'ahu̱, ne gatho yohoyu̱ di hup'a ri mu̱ihu̱ gi pe̱'su̱ n'ar mfeni xint'axi. 2Di ne gi beñhu̱ nuya mhö bi mönga mam'e̱t'o yá hoga m'e̱hni Jö, ne nuya 'be̱pate bi zok'ahu̱ ma tsi Hmuhu̱ ne ma Po̱ho̱tehu̱, gehnu̱ bi xi'ahu̱ yá mpo̱te ar tsi Hmu gi 'ñehu̱. 3Pöhu̱ m'e̱t'o, nuya ngöxapa ma da e ya thente di 'bu̱ ngu nese̱'u̱. 4Di eñ'u̱: Te bi ja ar ñhöt'i nda e ar tsi Hmu Hesukristo. Ngetho bi the ma palehu̱, ha nunar ximha̱i njangutho ngu ar pa bi thoki. 5Nuyu̱ nese̱ da pumhni gehnu̱ ár mhö Jö bi hyoka mam'e̱t'o ar mhets'i ne ar ximha̱i. Ba ehyu̱ har dehe ne oxta har dehe. 6Jange nunar ximha̱i mi 'bu̱ maham'u̱, bi hwata ar dehe mi ñuts'i. 7Ha nunar mhets'i ne nunar ha̱i 'bu̱pya, getnu̱ ár mhö Jö e̱kwi da nzo̱ har tsibi nunar pa da thöxamajöni, ne da t'umba ár mfe̱i ya ts'okte. 8Tsi kuhu̱, yo gi pumhnihu̱ n'ehe, nunar tsi Hmu handa n'apa ngu 're̱t'anthebe ya je̱ye̱, ne 're̱t'anthebe ya je̱ye̱ handa ngu n'apatho. 9Ar tsi Hmu hingi hu'sta ar pa da 'yo̱t'a nö'ö xi ñöt'i, ngu benga 'ra. Pe̱'skagihu̱ ar ts'e̱ti hingi ne togo da m'e̱di, ne'ö gatho da 'yo̱t'wa yá ntso̱'mi. 10Ha nunar pa da e ar tsi Hmu, ma da zo̱ ngu n'ar bë tso̱ 'bu̱ nxui. Nu'mú̱, nuya mhets'i ma da nhwati, da nt'o̱ n'ar döta ñu̱ni, ne gatho nö'ö te janu̱ ma da xut'a har tsibi, ha nu ar ximha̱i ne gatho nö'ö te jawa ma da nzo̱. 11Nu'mu̱ ma da nhwata gathoyu̱, yo'ö hingi 'bu̱hu̱ n'ar m'u̱i xint'axi ne gi ñhogajö'ihu̱. 12Ne gi ndo̱'mhu̱ da zo̱ ár pa Jö, ne xa gi umba ri mu̱ihu̱ gi jafu̱ ngut'a da zo̱ho̱. Nuya pa'u̱ ar mhets'i ma da nde̱ ne da xut'i, ne gatho nö'ö te janu̱ ma da mi har tsibi. 13Ha nuju̱ di to̱'mhu̱ man'ar 'ra'yo mhets'i ne man'ar 'ra'yo ximha̱i, habu̱ ho̱nse̱ ja ar hogam'u̱i. 14Jange tsi kuhu̱, nu'mu̱ gi to̱'mhu̱ nuya ñhöt'iyu̱, umba ri mu̱ihu̱ da diñ'ahu̱ hinte ma ja̱xt'i gi pe̱'su̱, dar nt'axi'ihu̱ ne gi 'bu̱hu̱ n'ar hogam'u̱i. 15Ne pöhu̱ xiñho, nunar tsi Hmu pe̱'sa ar ts'e̱ti honi da mpo̱ gatho ya jö'i, jangu ma tsi kuhu̱ Pablo xi t'umba ar hoga mfödi xi 'yot'ahu̱. 16Gatho nuya he̱'mi xi 'yot'i, no̱nga nö'ö xta xi'ahu̱. 'Rayu̱ xi ñhembi da födi te ne da 'ñenö. Jange nu'u̱ hints'u̱ pödi ne hingi tse̱ yá mu̱i, pa̱ti. Jap'u̱ nu ma'ra ya T'ofo n'ehe, ne da 'yo̱t'a ngu ne'u̱, ne njap'u̱ honse̱ yá mfe̱ise̱. 17Jange nu'ahu̱ ma tsi hmöka kuhu̱, xka pöhu̱, jamasuhu̱ yo ma da hya̱'ahu̱ yá ts'oki ya ts'okte, ne gi hye̱hu̱p'u̱ ár ts'e̱di ri jamfihu̱. 18Nö'ö gi 'yo̱thu̱, dá hñuts'i gi pöhu̱ ma tsi Hmuhu̱ ne ma Po̱ho̱tehu̱ Hesukristo, ne dá te ri mfödihu̱ hár nhwëki. Go di 'ñep'u̱ da t'umba ar nsunda nupya ne hiñham'u̱ da ntsa̱ya̱. Dá njap'u̱.

will be added

X\