ÁR ÑOHO AR PEDRO 1

1Nuga dar Simu, t'engagi ar Pedro, ár 'be̱gogi ne ár mpo̱tegi ar tsi Hmu Hesukristo. Di ot'ahu̱ nunar he̱'minu̱ nu'ahu̱ xka tsu̱hu̱ n'ar nza̱tho jamfi ngu nö'ö di pe̱'sje. Xka tsu̱hu̱ nunar jamfinu̱, ngetho xa ar hogajö'i ma Jöhu̱ ne ma Po̱ho̱tehu̱ ma tsi Hmuhu̱ Hesukristo. 2Dá hñuxa ar nhwëki ne ar hogam'u̱i gi höñhu̱, ngetho gi pöhu̱ Jö ne ma tsi Hmuhu̱ Hesukristo. 3Jö xa pe̱'sa ár ts'e̱di, ne xi 'rakagihu̱ gatho nö'ö di hoñhu̱ ga 'bu̱hu̱ ne ga pe̱fu̱ xiñho, ngetho nö'ö togo bi zokagihu̱ xa döta ár nsunda, gese̱'ö bi ñ'udi ga pötwabihu̱. 4Ne xi 'raju̱ ya nza̱tho ñhöt'i thota ár mhödi ne xa döta. Njap'u̱ da tsa̱ di hñöx'ahu̱ ár m'u̱i Jö, ngetho xka hye̱hu̱p'u̱ ar ts'oki jawa har ximha̱i, t'o̱t'e te̱nga yá ts'onhe ya jö'i. 5Jange nu'ahu̱ xa gi umba ri mu̱ihu̱ gi te̱twabihu̱ da me̱wi ri jamfihu̱ ar hogam'u̱i, ha nunar hogam'u̱i di pe̱wi ar hoga mfödi. 6Nunar hoga mfödi di pe̱wi ar nts'uni, ha nunar nts'uni di pe̱wi ar ts'e̱ti, ha nunar ts'e̱ti di pe̱wi ar nhwëki. 7Ha nunar nhwëki di pe̱wi ar mhöte n'a ngu n'a, ne nö'ö gi mhöhu̱ n'a ngu n'a, di pe̱wi gi möhu̱ gatho nu ma'ra. 8Ngetho nu'mu̱ xa gi pe̱'su̱yu̱, ne gi jafu̱ da xu, hinda ma da m'e̱p'u̱ xka pöhu̱ ar tsi Hmu Hesukristo, hingi 'bu̱hu̱ njap'u̱tho hinter m'e̱fi ri tehu̱. 9Ha nu'u̱ togo hingi pe̱'sa nuya ñhoyu̱ pe̱wi yá jamfi, o̱t'a ngoda̱, hingi honga nö'ö bi e mhets'i, ne xi pumhni xi nsu̱kwa yá ts'oki xki 'yo̱t'a mam'e̱t'o. 10Jange tsi kuhu̱, xa gi umba ri mu̱ihu̱ gi ñ'uhu̱ xi ts'oñ'ahu̱ ne xi thañ'ahu̱, ngetho nu'mu̱ gi 'yo̱thu̱ njap'u̱, xi ñhembi gi ta̱hu̱. 11Ne njap'u̱ ma da sok'ahu̱ n'ar döta ne nza̱tho goxthi, ne gi ku̱thu̱ har ts'u̱t'wi hiñham'u̱ da thege, ár me̱ti ma Po̱ho̱tehu̱ ne ma tsi Hmuhu̱ Hesukristo. 12Nuga hinga ma ga tsa̱ya̱ ga beñ'ahu̱ gathoyu̱, mödi xka pöhu̱ ne xi ze̱t'a ri jamfihu̱ gi te̱ñhu̱ nö'ö majöni xi nsi'ahu̱. 13Di beni nupya di 'bu̱tho, gehnu̱ ma 'be̱fi ga bemp'ahu̱ gi 'yo̱thu̱yu̱. 14Ngetho di pödi ngut'a ma ga he̱kwa nunar ndo'yonu̱, ngu xi xikagi ar tsi Hmu Hesukristo. 15Ma ga umba ma mu̱i n'ehe, nú'mu̱ xka ñ'e'be nunar ha̱inu̱, nu'ahu̱ hyax'mu̱ gi benthu̱ nuya xta ut'ahu̱. 16Nuje xta ut'ahe ngu da handwase̱he ár ts'e̱di ne ár 'ñehe ma tsi Hmuhu̱ Hesukristo, hinge ngu enga ya 'bede xi bense̱ ya jö'i. 17Da hanthe nú'mu̱ Jö ar Dada bi 'ñe'spa ár nsu ne bi umba ar nsunda, núnu̱ habu̱ bi nheki nunar mhö ndi 'ñe har nsunda mhets'i, mi enö: Gehnu̱ ma hmöka T'u̱, jakagi ga njohya. 18Ne nuje da o̱he nunar mhönu̱ ndi 'ñe mhets'i nú'mu̱ ndi 'bu̱'behe har jöpa t'o̱ho̱. 19Gatho nuya thogiyu̱ xi ñ'udi majöni nö'ö xki mönga yá m'e̱hni Jö. Jange xiñho gi jafu̱masu nuya mhöyu̱, ngu n'ar ñot'i yot'ahu̱ madeda ar 'be̱xui, gi to̱'mhu̱ da hats'i ne da yot'ahu̱ ar njötso̱ po̱xa 'bu̱ xudi. 20Ho̱nse̱ beñhu̱ m'e̱t'o, gatho nö'ö xi 'yot'a yá m'e̱hni Jö har T'ofo, hinda tsa̱ ga bense̱hu̱ nö'ö tema ne da mö, go utkagihu̱ Jö. 21Ngetho nuya te bi mönga nuya m'e̱hni'u̱, hingar mfenise̱ n'ar jö'i. Bi t'umbabi nu'u̱ yá 'be̱go Jö mi 'bu̱ n'ar m'u̱i xint'axi, mi möñ'u̱ ngu mi xipa ár Hñö Jö nda mö.

will be added

X\