ÁR ÑOHO AR KORINTIO 9

1Hinga mahyoni ga pengi ga ot'ahu̱ ga bemp'ahu̱ nunar mfa̱ts'i di pe̱mpabihu̱ ya gamfi. 2Ngetho di pöhe xa gi ne gi mfa̱xtehu̱, ne xta xipabihe ya ku me Nmasedonia. Jange nu'u̱ xi njohya da uñ'u̱ n'ehe, ngetho da xife nu'ahu̱ gar menguhu̱ Akaya, pe̱'sa n'a nje̱ye̱ xa xka nehu̱ gi uñhu̱ ri mfa̱ts'ihu̱. 3Nu'mu̱ xta pe̱hna ya ku da m'e̱t'o, di ne ga tsu̱'ahe ngu xta es'ahe ri nsuhu̱. Xka möhep'u̱, xka ñhoju̱ ngu xta mö. 4Ngetho nu'mu̱ ga me̱'be 'ra ya me Nmasedonia ne da diñ'ahu̱ hinxka ñhoju̱, ga 'be̱ ma tsa̱he, ngetho xta möñhe xka ñhoju̱. Nu'mu̱ da njap'u̱ gi 'be̱hu̱ ri tsa̱hu̱ n'ehe. 5Da beni mi mahyoni nga pe̱ñ'ahu̱ xi m'e̱t'o nuya kuyu̱, ma da nu ha xka jwathu̱ xka johu̱ nunar mfa̱ts'i xka ñöthu̱ ngi uñhu̱. Ne ngi ñhoju̱ gi uñhu̱ ngu n'ar mfa̱ts'itho, hinge gi uñhu̱ ngetho di a̱'ahe. 6Get'ö di xi'ahu̱ ngu enö: Nö'ö togo tx'u̱tho pot'i, tx'u̱tho xofo n'ehe. Ha nö'ö pot'a nze̱ye̱, nze̱ye̱ xofo n'ehe. 7N'a ngu n'a da unga ngu xi beni, hinto da hyo̱ka nö'ö uni, ne hinda uni ngetho njapi. Jö mödi nu'u̱ togo johya uni. 8Jö pe̱'sa ar ts'e̱di da hwëk'ahu̱ gatho nö'ö gi k'athu̱, ne da bonk'a'ihu̱ gi 'yo̱thwu̱ ar ñho ma'ra. 9Ngu enga har T'ofo: Bi hyeni ne bi umba ya hyoya. Nunár ñhogajö'i hiñham'u̱ da thege. 10Jö togo umba te da mot'a ar mot'i ne 'winga togo ñuni, dá ma̱x'ahu̱ gi pe̱'su̱ nze̱ye̱ ar sofo, ne gi ñhogajö'ihu̱ xa gi fa̱xu̱ ma'ra. 11Ne hinte gi k'athu̱, xa gi johyahu̱ gi uñhu̱ ar mfa̱ts'i, ne njap'u̱ ma'ra da umba njamödi Jö nunar mfa̱ts'i di hö'sfe. 12Ngetho nunar mfa̱ts'inu̱ hinge ho̱nse̱ fa̱xa nuya gamfi tho ar k'at'i, njap'u̱ nze̱ye̱ ya njamödi t'umba Jö. 13Ha nunar 'be̱finu̱, nze̱ye̱ da 'ñe'spa ár nsu Jö nú'mu̱ hant'a'ihu̱ tengu gi o̱thwu̱ ár hoga mhö ar tsi Hmu Hesukristo, ne hanja gi johyahu̱ gi fa̱xu̱'u̱ ne gatho nu'u̱ tho ar k'at'i. 14Ne xa di mö'ahu̱ da 'ya̱pa Jö da ma̱x'ahu̱, ngetho Jö xa xi hwëk'ahu̱ n'ar hogamu̱i. 15Jamödi Jö, togo xi 'rakagihu̱ n'ar nt'uni hingi tsa̱ ga möñhu̱ tengu ár döta.

will be added

X\