ÁR ÑOHO AR KORINTIO 8

1Tsi kuhu̱, di ne gi pöhu̱ nuya ñho xi hwëkwa Jö nuya nijö 'bu̱kwa Nmasedonia. 2Mödi xi thohyu̱ nze̱ye̱ ya nt'u̱tsa, xa xi me̱'sa nze̱ye̱ ar johya. Ne mödi xa ya tsi hyoya, xa xi unga yá mfa̱ts'i. 3Di da̱majöni go bi nese̱'u̱ nda unga yá mfa̱ts'i ngu bi ma̱xa yá ts'e̱di, ne xi unga xa nze̱ye̱ ngu xi zu̱ yá ts'e̱di. 4Xa bi 'ya̱kagihe ar möte nga umfe ar se̱ki nda mfa̱xte ha nunar ñhonu̱ t'o̱t'wa ya gamfi. 5Hinge ndi to̱'mhe njap'u̱. M'e̱t'o bi 'ye̱nt'a xo̱ge yá te nda me̱pa ar tsi Hmu, ne m'e̱fa bi 'ye̱nt'a yá 'be̱fi ha ma 'ye̱he, ngetho njap'u̱ mi ne Jö. 6Jange xta a̱fe ar ku Tito, da map'u̱ da xi'ahu̱ gi jwathu̱ gi munsu̱ nunar mfa̱ts'inu̱ nhwëkwabi ya tsi ku, gehnu̱ ma yapa xki du̱m'ö. 7Ngetho gatho gi 'bu̱hu̱ xiñho: xa gi pe̱'su̱ ri jamfihu̱, gi pöhu̱ te gi möñhu̱, gi pöthwu̱ ár mhö ar tsi Hmu, xa gi ne gi pe̱fu̱ Jö, ne xa gi mökagihe. Umba ri mu̱ihu̱ gi hwëkwabihu̱ ma'ra. 8Hindi 'be̱p'ahu̱. Ho̱nse̱ di xi'ahu̱ nuyá hogamu̱i ma'ra, ne ga nu ha majöni tsit'a ri mu̱ihu̱ gi möhu̱ ma'ra. 9Ngetho gi pöhu̱ te xi hwëgagihu̱ ma tsi Hmuhu̱ Hesukristo. Mödi mi pe̱'sa xo̱ge, bi ñhoya, ha nuju̱ ndi ñhoyahu̱, dá pe̱'su̱ xo̱gepya. 10Di ne ga xi'ahu̱, xiñho gi jwathu̱ nunar 'be̱fi ga du̱'mhu̱ ma je̱ye̱. Nu'ahu̱ hinge ho̱nse̱ ga beñhu̱, ga njohya ga du̱'mhu̱ ga 'yo̱thu̱. 11Jange jwathu̱ nunar 'be̱fi. Njangu ngi nehu̱ ngi 'yo̱thu̱, njap'u̱ gi nehu̱ gi jwathu̱ n'ehe, ngu nda zu̱'ahu̱ ri ts'e̱dihu̱. 12Nu'mu̱ xa majöni gi nehu̱ te gi uñhu̱, Jö numañho gi uñhu̱ nö'ö gi pe̱'su̱. Hingi a̱'ahu̱ nö'ö hingi tsu̱ ri ts'e̱di gi uñhu̱. 13Yo ma gi beñhu̱ di jap'u̱ di honi da m'u̱ xiñho 'ra, ne nu'ahu̱ gi thohu̱ ar k'at'i. 14Di nega, nuya gi pe̱'su̱ ya ñho nuya payu̱, da tsa̱ gi fa̱xu̱ nuya hinte pe̱ts'i. Ne m'e̱fa di pe̱'syu̱, ne da tsa̱ da ma̱x'ahu̱ habu̱ gi k'athu̱ n'ehe, ne gatho gi 'bu̱hu̱ mahye̱gi. 15Jangu enga har T'ofo: Nö'ö togo bi go nze̱ye̱, himbi bongwabi, ha nö'ö bi go tx'u̱tho, himbi k'at'wi. 16Jamödi Jö bi umba ar ku Tito ar mhöte mahye̱gi ngu nö'ö di pe̱s'ahu̱. 17Majöni da a̱fe ar möte ma nda k'ös'ahu̱, mödi mi nese̱ nda map'u̱, ngetho xa mö'ahu̱. 18Ne di pe̱ñhe da me̱wi ar Tito n'ar ku togo e'spa ár nsu gatho ya nijö habu̱ xa mönga ar hoga mhö. 19Hinge ho̱nse̱ ar 'be̱finu̱ xi t'umbabi. Nuya nijö bi hñuts'i ga me̱'behe ga 'yohe ar 'ñu, gar möhe ma ga tsohe nunar mfa̱ts'inu̱. Nuna di heñhe di nsundahe ar tsi Hmu, ne da nheki ma hogamu̱ihu̱. 20Njap'u̱ hinda tsa̱ togo da ñömañ'u̱gihe nunar döta mfa̱ts'inu̱ o ha ma 'ye̱he. 21Di umfe ma mu̱ihe ga o̱the xiñho ar 'be̱fi hár nthandi Jö ne ha yá nthandi ya jö'i. 22Di pe̱ñ'ahe ñ'owi'u̱ man'ar ku, xta hanthe ha ya 'be̱fi xta umfe xi umbár mu̱i xi me̱pa Jö. Ne nupya xi hñuxa ár ts'e̱di, ngetho ka̱xmbeni gi fa̱xtehu̱. 23Nor ku Tito gehnu̱ ma ñ'ohu̱ ne ma ma̱xte di pe̱p'ahe. Ha nu ma'ra ya ku go xi me̱hna ya nijö da hñös'ahu̱ ar nze̱ngwa, ne njap'u̱ da 'ñe'spa ár nsu ar tsi Hmu Hesukristo. 24Utwabihu̱yu̱ ri mhotehu̱, ne njap'u̱ da hyanda ya nijö majöni nö'ö di es'ahu̱ ri nsuhu̱.

will be added

X\