ÁR ÑOHO AR KORINTIO 7

1Tsi kuhu̱, ngetho Jö xi 'rakagihu̱ nuya ñhöt'iyu̱, ma ga he̱hu̱ gatho nö'ö japa da ts'oka ma ndo'yohu̱ ne ma mfenihu̱, ne ga 'bu̱hu̱ n'ar hogam'u̱i ngetho di tsufu̱ Jö. 2Pe̱'skagihe ar mhöte. Hinto xta o̱t'wabihe ar ts'om'u̱i, hinto xta ts'okwa ár mfeni, ne hinto xta kahe. 3Hindi xi'ahe njap'u̱ ngetho di ne ga tsu̱'ahe. Ngu xta xi'ahe m'e̱t'o, xa di mö'ahe. Nu'mu̱ di 'bu̱he wa ga tuhe, hinga he̱k'ahe di mö'ahe. 4Nuga hinte di pe̱ts'i te ga ko̱ñ'ahu̱, di es'a ri nsuhu̱, gehnu̱ hubga ma mu̱i, ne xa di johya madeda ya thogi di thohe. 5Ngetho xa majöni nú'mu̱ nda tso̱hewa Nmasedonia, hinte da pe̱'se ar tsa̱ya̱, ngetho habu̱ gatho ndi thohe ya dumu̱i. Nuya himi jamfi mi ju̱sje ar hñö, ha nu har nijö mi tuka ma mu̱ihe ya ku. 6Ho̱nse̱ Jö togo hu'mba yá mu̱i nu'u̱ ja te tupa yá mu̱i, bi hñubga ma mu̱ihe mi zo̱ ar ku Tito. 7Hinge ho̱nse̱ da njohyahe mi zo̱ho̱. Bi jakagihe da njohyahe, bi metkagihe hanja ga jafu̱ bi njohya. Ne bi xikagihe hangu gi mökagihu̱ ngi zoñhu̱ ngi hongagihu̱, ne njap'u̱ bi jakagi bi hñuxa ma johya. 8Ngetho mödi da tso̱t'ahu̱ ri mu̱ihu̱ har he̱'mi da pe̱ñ'ahu̱, hinte tuka ma mu̱ipya, ngetho da pödi da tso̱t'a ri mu̱ihu̱ 'ra ya tsi pa. 9Ha nupya di johya, hinge nú'mu̱ da pödi bi zo̱t'a ri mu̱ihu̱. Di johya ngetho nunar nzo̱t'amu̱i bi ja'ahu̱ ga 'yo̱thwu̱ ár ntso̱'mi. Bi du ri mu̱ihu̱ ngu numañho Jö, ne njap'u̱ hinto da ts'ok'ahe. 10Ngetho nunar dumu̱i numañho Jö, tsixkagihu̱ ga o̱thwu̱ ár ntso̱'mi ne ga mpo̱hu̱, ne hinga möñhu̱ m'e̱fa hinda o̱thu̱ xiñho. Nunar dumu̱i tsa̱se̱ ya jö'i, ho̱nse̱ tsixa har ndöte. 11Ha nu'ahu̱ xi zo̱t'a ri mu̱ihu̱ ngu ne Jö. Njanu̱ xi ma̱x'ahu̱ ga umba ri mu̱ihu̱ nö'ö ngi o̱thu̱, ne ga ñöngagihu̱. Bi ja'ahu̱ bi mbo̱ ri kwe̱hu̱ ne ga pe̱'su̱ ar ntsu. M'e̱fa ngi ne ngi hyandgagihu̱, ne ga umfu̱ ár mfe̱i togo xki 'yo̱t'a ar ts'oki. Gathoyu̱ nheki ga umba ri mu̱ihu̱ ga 'yo̱thu̱ xiñho. 12Nú'mu̱ da pe̱ñ'ahu̱ nunar he̱'minu̱, hinge ho̱nse̱ ndi benga nö'ö togo bi 'yo̱t'a ar ts'oki, ne nö'ö togo bi nts'okwabi. Ndi ne ngi pöhu̱ hangu tup'a ri mu̱ihu̱ gi bengagihe hár nthandi Jö. 13Jange nu nda pöhe ga njohyahu̱, bi hñubga ma mu̱ihe. Ne xa da njohyahe nda hanthwe ár johya ar ku Tito. Nú'mu̱ mi zo̱ñ'ahu̱ bi hñuxa ár ts'e̱di. 14Nú'mu̱ nda es'ahu̱ ri nsuhu̱ ndi petwa ar Tito ri m'u̱ihu̱, hinxta 'be̱ ma tsa̱. Gatho nheki majöni, njangu majöni gatho nö'ö xta xi'ahu̱. Bi njap'u̱ nö'ö da xipa ar ku Tito n'ehe. 15Ne hyax'mu̱ huxa nunar mhöte pe̱s'ahu̱, nú'mu̱ benga hanja ga 'yo̱'thu̱ ne hanja xa ga numansuhu̱. 16Di johya ngetho di ka̱xmbeni gi o̱thu̱ xiñho gatho.

will be added

X\