ÁR ÑOHO AR KORINTIO 6

1Nuje ngu yá ma̱xtegihe ar tsi Hmu, di xi'ahe hingi fe̱sfu̱ ya ñho xi hwëk'ahu̱ Jö. 2Ngetho ngu enga har T'ofo: Ha ya hoga pa xta o̱x'a'i, ne xta fa̱x'a'i har pa mpo̱ho̱. 3Di ntsuñhe hinto di nehe ga jafe da mfets'e, ne njap'u̱ hinto di pe̱'sa te da ñömañ'u̱ ma 'be̱fihe. 4Nö'ö di pe̱he, di umba ma mu̱ihe da nheki yá 'be̱gogihe Jö. Di pe̱'se ar ts'e̱ti di thohe ya thogi. Te gatho di k'athe, di thohe ya dumu̱i. 5Di thohe ya mfe̱i, njokagihe ha ya fa̱di. Hexkathogihe ya jö'i 'bu̱tho da hyogagihe. Xa di thohe ar 'be̱fi, di a̱ ma t'öhöhe, di thohe ar thuhu. 6Nhekitho yá 'be̱gogihe Jö ngetho di 'bu̱he n'ar m'u̱i xint'axi. Xta 'ñuhe ar hoga mfödi xi t'aje, xta pe̱'sfe ar ts'e̱ti ma'ra, ne di 'bu̱he ga fa̱xe togo honi. Tsixkagihe ma mfenihe ár Hñö Jö, ne di pe̱'se n'ar mhöte hingi oxta mañö. 7Di möñhe ar mhö majöni. Jö 'rakagihe ar ts'e̱di ne ar hogamu̱i, fa̱xkagihe habu̱ gatho ga ntötehe. 8'Ra eskagihe ma nsuhe, ma'ra nugagihe hinter m'e̱kagihe. Ñhömañ'u̱gihe ne ñhömañhogihe. Nhugagihe ngu dar nemhñöhe, ha di möñhe nö'ö majöni. 9Nhugagihe ngu ya n'añ'o, mödi fökagihe. N'andi ya 'bu̱tho da thoje, ha di 'bu̱the. Xa di thohe ya mfe̱i, ne hinxi thogathogihe. 10Di thohe ar dumu̱i, ha hingi tsa̱ya̱ ma johyahe. Di 'bu̱he ngu n'ar tsi hyoya, mödi di hemfe ya ñho ma'ra. Wande hinte di pe̱'se, ha go ma me̱tihe gatho. 11Tsi kuhu̱ me Nkorinto, xta xi'ahe xiñho gatho, ne xta kwat'ahe ha ma mu̱ihe. 12Nuje hindi kothe ma mu̱ihe ga mö'ahe, ha nu'ahu̱ hö, xka kothu̱ ri mu̱ihu̱ gi mökagihe. 13Njanu̱ gi ko'skagihe, xoju̱ ri mu̱ihu̱ gi mökagihe. Di xi'ahu̱ njap'u̱ ngu ma bötsi'ihu̱. 14Yo gi nthöskwihu̱ ya jö'i hingi ñ'emu̱i. Ngetho, hage ntsixkwi ar ñho nö'ö hingi ho. Wa tsa̱ da m'u̱ n'at'wu̱ ar 'be̱xui ne ar hyats'i. 15Hage ja te ntsixkwi ar tsi Hmu ne ar ts'ondöhi. Wa tema di hñöxkwi n'ar gamfi ne nö'ö hingi ñ'emu̱i. 16Ár nijö Jö hingi tsa̱ da nthöskwi yá nijö ya tsita emp'ö. Ha nuju̱ yá nijögihu̱ Jö togo hö ar te. Ngu bi 'ñenö: Ma ga 'bu̱'be, ne ma ga 'yo'bega'u̱. Ne da hyandgagi yá Jögi, ne nuga ma ga nu ngu ma bötsi. 17Jange enga ar tsi Hmu: Po̱ñhu̱ hye̱hu̱p'u̱, yo gi tha̱ñhu̱ nö'ö hingi ho, ne ga tsi'ahu̱ man'agi. 18Ne gi 'ñengagihu̱ ri Dadagihu̱, ne nu'ahu̱ ga eñ'ahu̱ ma t'u̱'ihu̱ ne ma t'inxu'ihu̱, enga njap'u̱ ar tsi Hmu togo pe̱'sa gatho ar ts'e̱di.

will be added

X\