ÁR ÑOHO AR KORINTIO 4

1Jange nuje hindi wenthe di pe̱he nunar 'be̱fi xi hwëgagihe Jö. 2Hindi mpe̱je nt'ögitho, hindi ntsa̱je. Hindi o̱the xi nts'ogagihe, hindi pa̱thwe ár mhö Jö. Nö'ö di pe̱he, di uhe ár mhö Jö majöni ha ma m'u̱ihe, gehnu̱ numañho ya jö'i di o̱the hár nthandi Jö. 3Ha nu'mu̱ 'ra xi t'ökwabi, hingi tsa̱ da bö ar hoga mhö di möñhe, gehyu̱ di ma da m'e̱di. 4Ar ts'ondöhi togo ar ndö nuya ngöxapayu̱, xi got'wa yá da̱ nu'u̱ hingi ne da gamfi. Ne njap'u̱ hinda zu̱twa ár hyats'i ar hoga mhö utwa ár nsunda ar tsi Hmu Hesukristo, togo di hñöxa Jö ar tsi Dada. 5Nuje hindi no̱ñhese̱ ma m'u̱ihe. Nö'ö di pe̱he, di 'yoñhe ar mhö, di eñhe nunar tsi Hmu Hesukristo gehnu̱ ar Hmu, ne nuje ngu ri 'be̱gogihe. Di o̱the njap'u̱ ngetho di pe̱fe ar tsi Hmu Hesukristo. 6Ngetho Jö togo bi japa ar ñot'i nda hya'sa madedar 'be̱xui, go bi xoga ma mfenihu̱ ga hanthwu̱ ár nsunda Jö nheki hár hmi ar tsi Hmu Hesukristo. 7Nunar döta m'e̱ts'inu̱ xi 'rakagihu̱ Jö, jwata ha ma ndo'yohu̱ ngu n'ar tsi ts'o̱ibo̱ha̱i. Ne njap'u̱ da nheki nunar döta ts'e̱dinu̱ go unga Jö, hingo ma ts'e̱dise̱hu̱. 8Nuje di pe̱fe ar tsi Hmu, xa xi nts'ibgagihe, mödi tsa̱da ga 'ñöñhe. N'andi hindi pöhe te ga pe̱he, ne hindi 'be̱he ar ts'e̱ti. 9Njukagihe, ha hingi k'at'a togo da ma̱xkagihe. T'e̱ntk'athogihe, mödi hinxi nhwatkagihe. 10Habu̱ gatho di 'yohe, di ñ'e̱nthe ár ndöte ar tsi Hmu Hesukristo, di hoñhe da nheki ha ma ndo'yohe ár te'ö. 11Nuya di 'bu̱he, hyax'mu̱ di e̱nthe ma tehe da tho, ngetho di te̱ñhe ar tsi Hmu Hesukristo. Ne nunár te ar tsi Hmu da nheki ha ma ngöxando'yohe. 12Nuje di nto̱xe ar ndöte di hös'ahe ar hoga mhö, ha nu'ahu̱ gi höñhu̱ ar te hinda göts'i. 13Ngu enga har T'ofo: Da ñ'emu̱i, jange da ñö. Nuje n'ehe di pe̱'se nunar mfeninu̱, jange di möñhe nunar mhönu̱, ngetho di ñ'emu̱ihe. 14Di pöhe, nuna togo bi gu̱xa har ndöte ar tsi Hmu Hesukristo, ma da gu̱xkagihu̱ n'ehe mahye̱gi ngu bi gu̱xa ar tsi Hmu, ne da 'ba̱bgagihu̱ mahye̱gi habu̱ bi 'ba̱'ö. 15Ngetho nuya thogiyu̱ di thohe, da thohe di hoñhe ri ñhohu̱, ne da zu̱ ma nze̱ye̱ nunár nhwëki Jö. Njap'u̱ di nze̱ye̱ togo di umba njamödi Jö, ne di nsundabi n'ehe. 16Jange hingi went'a ma ñ'emu̱ihu̱. Mödi nunar ndo'yonu̱ di hanthu̱ thege, ha nunu̱ mbo ha ma mu̱ihu̱, 'yo di n'a'yo hyax'mu̱. 17Ngetho nuna n'a tsi tu̱i ya nt'u̱tsa di thohu̱, fa̱xkagihu̱ da hñuxa nunar döta nsunda to̱bgagihu̱. 18Hindi huxa ma da̱hu̱ nuya te tsa̱ ga hanthu̱wa, ngetho nuyu̱ ma da thege. Nuju̱ di huxa ma da̱hu̱ nu'u̱ hingi nheki ne hiñham'u̱ ma da thege.

will be added

X\