ÁR ÑOHO AR KORINTIO 3

1Hage di hoñhe man'agi gi numañhogihe. Wa di hoñhe ga hös'ahe n'ar he̱'mi di ñömañhogihe, ne xka po̱ñhe gi 'rakagihe n'a ngu o̱t'a nu ma'ra. 2Gese̱'ihu̱ ngu ma he̱'mi'ihe xi thuska ha ma mu̱ihe, gehnu̱ to gatho pödi ne gatho nehe. 3Njap'u̱ nheki ngu yá he̱'mi'ihu̱ ar tsi Hmu Hesukristo, xi t'e̱nk'a ha ma 'ye̱he. Hinge ho̱nse̱ xi t'ot'i, pe̱wi ár Hñö Jö. Hinge ha ya nxindo, ha yá mu̱i ya jö'i. 4Xta möñhe njap'u̱ ngetho di ka̱xmbenihe di 'bu̱'behe xiñho Jö, fa̱xkagihe ar tsi Hmu Hesukristo. 5Hinge di beñhe xa di pe̱'se ar ts'e̱di te gatho ga o̱the. Jö go 'rakagihe ar ts'e̱di ga pe̱he nunar 'be̱finu̱. 6Ge'ö togo bi hñuxkagihe, ne bi 'rakagihe ar ts'e̱di ga mpe̱he har 'ra'yo nkohi. Hinge di te̱ñhe ya 'be̱pate xi t'ot'i, gese̱ ár Hñö Jö otkagihe ar 'ñu. Ngetho ya 'be̱pate tsixkagihu̱ har ndöte, ha nunár Hñö Jö 'rakagihu̱ ar te. 7Ha nu'mu̱ nuya 'be̱pate bi t'uni xki t'ot'a ha ya nxindo, xa mi pe̱'sa ár nsu, jange nuya me Israel himi tsa̱ nda hyandwa ár hmi ar Moise xa mi hyats'i, mödi m'e̱fa ma nda the xo̱ge, 8tenguhmö ár döta ár nsu ar 'ra'yo nkohi pe̱pya ár Hñö Jö. 9Ngetho nu'mu̱ nuya 'be̱pate tsixa har 'be̱xui ya jö'i, bi t'unga mi nhekiwi ar nsunda, xa töte ár nsunda ar 'ra'yo nkohi, japi da m'u̱ xiñho ya jö'i hár nthandi Jö. 10Nuya 'be̱pate mi pe̱'shmö ár nsu, hingi tsa̱ da ñhuxkwi ár nsu nunar 'ra'yo nkohi. 11Ngetho nu'mu̱ nö'ö thege bi me̱'sa ár nsu, tenguhmö ár nsu nö'ö hinda ma da thege. 12Ngetho di pe̱'se n'ar döta ndo̱'mi, jange hindi ntsuhe ga möñhe ar hoga mhö. 13Hindi ñhe̱'behe ar Moise togo mi ko'ma ár hmi, ne njap'u̱ nuya me Israel hinge nda hyanda hanja nda the nunar hyats'i xki thuts'i nda thege. 14Ha nuyá mfeni'u̱ bi jot'i, ne nuya payu̱ nú'mu̱ né'u̱ ar nkohi mi ja mam'e̱t'o, jot'atho yá da̱. Ngetho ho̱nse̱ ar tsi Hmu Hesukristo tsa̱ da hñökwabi'u̱ ar dutu kotwabi yá hmi. 15Njap'u̱tho nuya payu̱, nú'mu̱ né'u̱ ár t'ofo ar Moise, wande nunar dutunu̱ kotwa yá mfeni. 16Ha nu xta ñ'emu̱i ar tsi Hmu, da da̱ ar dutu kotwa yá da̱. 17Ngetho ar tsi Hmu ge'ö ar Hñö, ne nu'u̱ togo pe̱'spa ár Hñö Jö, hinte ja te kot'i. 18Nuju̱ hinte kobgagihu̱ ma da̱hu̱. Di hanthwu̱ ár nsunda ar tsi Dada ngu ha n'ar ñhe. Ne ár Hñö Jö 'yo di pa̱tkagihu̱ di hñuxa ár nsunda ha ma m'u̱ihu̱, ne ga tso̱ñhu̱ di hñöxkagihu̱ ar tsi Hmu.

will be added

X\