1 Jange nupya xta beni hinga pengi ga map'u̱ ga ja'ahu̱ da zo̱t'a ri mu̱ihu̱. 2 Ngetho nu'mu̱ da zo̱t'a ri mu̱ihu̱, togo da hubga ma mu̱i 'mu̱. Hage hingo nu'u̱ togo xta tso̱t'wa yá mu̱i. 3 Nú'mu̱ nda ot'ahu̱, da jap'u̱ ndi honi gi jaju̱ ga njohya xka tso̱mp'u̱, hinge gi jaju̱ da du ma mu̱i. Di ka̱xmbeni, nu'mu̱ di johya, gi johyahu̱ n'ehe. 4 Ngetho xa mi tuka ma mu̱i ne ndi zoni nú'mu̱ da ot'ahu̱ m'e̱t'o. Hinge ndi ne nga tso̱t'a ri mu̱ihu̱, ndi ne ngi pöhu̱ xa di pe̱s'ahu̱ n'ar döta mhöte. 5 Ha nu'mu̱ ja n'a togo xi jakagi xi du ma mu̱i, hinge xi jakase̱ga. Tsa̱ ga möñhu̱ xi zu̱'ahu̱ n'a tsi tu̱i n'ehe, hindi ne ga eñhu̱ thota ár nze̱ye̱. 6 Hñöjwu̱, di za̱ ár mfe̱i nö'ö togo nze̱ye̱'ihu̱ ga kuhu̱. 7 Ha nupya mahyoni gi pumbabihu̱ ne hñu'mbabi ár mu̱i, yo ma da du ar ts'oni. 8 Jange di a̱'ahu̱ gi uthwu̱ man'agi da hyandi gi pe̱'sfu̱ ar mhöte. 9 Da ot'ahu̱ nor he̱'mi n'ehe, ndi ne nga pödi ha gi o̱hu̱ gatho nö'ö di xi'ahu̱, wa hin'ö. 10 Ne nö'ö togo gi pumbabihu̱, nuga n'ehe. Hö, nuga xta pumbabi nu'mu̱ di jamhö te ga pumbabi. Xta jap'u̱ di honga ri ñhohu̱ hár nthandi ar tsi Hmu Hesukristo. 11 Ne njap'u̱ hinga xojwu̱ ar 'ñu ar ts'ondöhi. Di pöhu̱ honga hanja da ku̱t'a ya ts'omfeni. 12 Nú'mu̱ nda tso̱nu̱ Ntroa nga mömbahmö ár hoga mhö ar tsi Hmu Hesukristo, da nu xki xogagi ar goxthi. 13 Mödi xa mi tuka ma mu̱i, ngetho hinda nthe̱'benu̱ ma tsi ku Tito. Jange da ñ'e'be ya ku, ne da ju̱ ar 'ñu da ekwa har ha̱i Nmasedonia. 14 Jamödi Jö jakagihu̱ hyax'mu̱ ga ntötehu̱, ngetho di 'bu̱hwihu̱ ar tsi Hmu Hesukristo. Ne hagatho di ñ'uhu̱ nunar hoga mfödi, ngu n'ar hogañu̱ni habu̱ gatho tso̱ni. 15 Jö nugagihu̱ di pe̱'sfu̱ ár hogañu̱ni ar tsi Hmu Hesu, di nxañhu̱ madeda nu'u̱ xi mpo̱ho̱ ne nu'u̱ hinxi mpo̱ho̱. 16 Nuya xi m'e̱di tsa̱'u̱ ngu n'ar ñu̱ni hote, ha nuya xi mpo̱ho̱, ngu n'ar ñu̱ni umba ar te. Togo tsa̱hmö da 'yo̱t'a nuya 'be̱fiyu̱. 17 Nuje hindi pa̱thwe ár mhö Jö, ngu o̱t'a nze̱ye̱ honi da dö ar bojö. Nuje xint'axi ma mfenihe di möñhe nö'ö 'rakagihe Jö, ngetho di pöhe di 'bu̱he hár nthandi'ö, ne di 'bu̱'behe ar tsi Hmu Hesukristo.
