ÁR ÑOHO AR KORINTIO 13

1Nunar hñu'ginu̱ xka map'u̱. Gatho nuya ts'oki ma da thuxa ar mfe̱i, da mö hö njap'u̱, ho̱nse̱ nu'mu̱ yoho wa hñu da da̱majöni. 2Ha nuga da xi'ahu̱ nu nda 'bu̱p'u̱, ne nupya di 'yo yap'u̱ di xi'ahu̱, gatho nu'u̱ xi 'yo̱t'a ya ts'oki ne gatho numa'ra, nú'mu̱ xka map'u̱, hinto ma ga et'atho ma xu̱tha nö'ö xi 'yo̱t'e. 3Nu'mu̱ gi ne gi pöhu̱ xiñho, hage ar tsi Hmu Hesukristo xi'ahu̱ nö'ö di mönga ne hindi mönse̱ga, pöhu̱ ar tsi Hmu hingi k'at'a ár ts'e̱di da zo'ahu̱. Nunu̱ xa pongwatho ár ts'e̱di. 4Ngetho mödi bi tho bi ts'u̱ta har pont'i hinte mi pe̱'sa ar ts'e̱di, nupya 'bu̱i pe̱'spabi ár ts'e̱di Jö. Di njahep'u̱ n'ehe, di 'bu̱'behe hinte di pe̱'se ma ts'e̱dihe. Nuje di pe̱'sfe ár ts'e̱di Jö n'ehe ga zo'ahe. 5Bense̱hu̱, ha gi pe̱'su̱ ar ñ'emu̱i. Tsa̱se̱hu̱ n'a ngu n'a, wa hinxka 'ñethu̱ ha ri mu̱ihu̱ ar tsi Hmu Hesukristo. Wa hinxka thohu̱ xiñho nga tsa̱se̱hu̱. 6Mödi di ka̱xmbenihe gi beñhu̱ xta thohe xiñho nunar tsa̱tinu̱. 7Ne di a̱fe Jö da ma̱x'ahu̱ hingi 'yo̱thu̱ nö'ö hingi ho. Hindi hoñhe da nheki xta thohe xiñho ar tsa̱ti. Di nehe gi 'yo̱thu̱ nö'ö xiñho, mödi da thandgagihe hinxta thohe xiñho nunar tsa̱tinu̱. 8Ngetho hinte tsa̱ ga pe̱he di nemhö ga ko'mhe nö'ö majöni. Ho̱nse̱ tsa̱ ga mpe̱he ga jafe da nu̱ngi. 9Jange di johyahe hindi pe̱'se ar ts'e̱di, ha nu'ahu̱ hö. Ne xa di a̱fe Jö da ma̱x'ahu̱ gi 'bu̱hu̱ n'ar m'u̱i xint'axi. 10Jange di ot'ahu̱ nunar he̱'minu̱ hindi 'bu̱p'u̱tho, di ne xka map'u̱ hinga zo'ahu̱ nts'e̱di. Ga ju̱ka nunar ts'e̱di xi 'raka ar tsi Hmu ga fa̱x'ahu̱ da te ri jamfihu̱, ne hinge ga ts'omp'a ri m'u̱ihu̱. 11Jange tsi kuhu̱, njohyahu̱, umba ri mu̱ihu̱ gi pe̱'su̱ n'ar m'u̱i xint'axi, hñu'mfu̱ ár mu̱i ri ñ'owihu̱ n'a ngu n'a, pe̱'su̱ n'adar mfeni ne ar hogam'u̱i. Ne gi 'bu̱hwihu̱ Jö togo unga ar hogam'u̱i ne ar mhöte. 12Nze̱ngwahu̱ n'a ngu n'a di 'be̱nga ar t'ek'ei. 13Gatho ya ku di 'bu̱hewa, di pe̱ñ'ahe ar nze̱ngwa. 14Dá hwëk'ahu̱ ár nt'uni ar tsi Hmu Hesukristo, dá 'ra'ahu̱ ár mhöte Jö, ne gi 'bu̱hwihu̱ ár Hñö Jö. Dá njap'u̱.

will be added

X\