1 Xömhö gi pe̱'skagihu̱ ar ts'e̱ti nu'mu̱ ga mönga 'ra ya mhö di beni, mödi wande xta 'be̱ ma mfeni. Hö, di ne gi tse̱tkagihu̱. 2 Ngetho xa di tuse̱ di mö'ahu̱, ngu mö'ahu̱ Jö. Xta 'wek'ahu̱ ngu n'ar nxutsi 'bu̱i xint'axi, po̱ntho gi nthötwihu̱ n'adar döme, gehnu̱ ar tsi Hmu Hesukristo. 3 Ha di tsu da mponga ri mfenihu̱, ngu bi pomba ár mfeni ar Eba bi ka ar k'eñö ma nts'o, ne hingi umba ri mu̱ihu̱ gi te̱ñhu̱ ar tsi Hmu Hesukristo. 4 Ngetho gi numañhohu̱ togo tso̱ho̱ ut'ahu̱ man'ar mhö no̱ngar Hesu, hingi ñhe̱hwi nö'ö xta ut'ahe. Ne gi höñhu̱ nu'mu̱ xi'ahu̱ man'ar hñö n'añ'o hingár Hñö Jö xka hñöñhu̱, ne togo mönga man'ar mhö hinge ngu ar hoga mhö xka pöhu̱. Gatho gi tse̱tathohu̱. 5 Di beni hinte tökagi nuya döta mpo̱te ngu eñ'u̱. 6 Ngetho mödi hindi pödi ga ñö xiñho, di pödi te di mö. Go xka hyandase̱hu̱. 7 Hage hinda o̱t'e xiñho nú'mu̱ hinda exka ma nsu ne go da es'ahu̱, ngetho hinte da a̱'ahu̱ nú'mu̱ nda hös'ahe ár hoga mhö Jö. 8 Xta hömba ma'ra ya nijö xi 'raka ma njut'i ne da tsa̱ ga pe̱p'ahu̱. 9 Ne nú'mu̱ ndi 'bu̱p'u̱ ne ndi thohmö ar k'at'i, hinte da a̱'ahu̱. Nuya ku ba e Nmasedonia bi 'rakagi nö'ö ndi honi. Hinte xta a̱'ahu̱, ne hinte ma ga a̱'ahu̱. 10 Di mönga nunar majöninu̱, ngetho ar tsi Hmu Hesukristo 'bu̱ ha ma mu̱i. Gatho ar ha̱i Akaya hinto ma da hñögagi ga exa ma nsu ga petwabi nuna di o̱t'e. 11 Yo'ö. Hage hindi mö'ahu̱. Jö pödi hö, di mö'ahu̱. 12 Ne ma ga jap'u̱tho. Hinga he̱gi nu'u̱ togo honi hanja da 'ñexa yá nsu, enö mpe̱'u̱ mahye̱gi nguje n'ehe. 13 Ngetho nuyu̱ ya kate mpo̱te, ya hya̱te 'be̱go, o̱t'e ngu yá mpo̱tehmö ar tsi Hmu Hesukristo. 14 Hinto da 'yo̱tho, ngetho gese̱ ar ts'ondöhi o̱t'e ngu n'ár e̱nxe̱ Jö n'ehe. 15 Jange hinga 'yo̱thu̱ nu'mu̱ nuyá 'be̱go ar ts'ondöhi o̱t'e ngu ya hoga 'be̱go emp'ö. Katetho, ha m'e̱fa ma da t'umba ár njut'i yá ts'o'be̱fi. 16 Man'agi di xi'ahu̱, hingi nugagihu̱ ngu n'ar jö'i xi 'be̱ ár mfeni. Ha nu'mu̱ gi ne gi nugagihu̱ njap'u̱, nugagihu̱, ne da tsa̱ ga exa n'a tsi tu̱i ma nsu. 17 Nuna di xi'ahu̱ hinxi 'raka Jö, go di exase̱ ma nsu ngu n'a xi 'be̱ ár mfeni. 18 Ngetho nze̱ye̱ exase̱ yá nsu ngu yá mfenise̱'u̱, ma ga exka ma nsu n'ehe 'mu̱. 19 Nu'ahu̱ gi pe̱'su̱ n'ar hoga mfeni, hanja gi johyahu̱ gi o̱xu̱ nu'u̱ xi 'be̱ yá mfeni. 20 Gi tse̱tathohu̱ nu'u̱ togo ja'ahu̱ ngu ne'u̱. Ju̱k'ahu̱ nö'ö ne'u̱, ne hömp'a̱hu̱ nö'ö te gi pe̱'su̱. O̱t'a ndöta, ne gi numañhohu̱ nu'mu̱ wande 'ra'ahu̱ ya mpe̱tgu. 21 Gehnu̱ ma m'e̱tsa̱he, hinda ju̱he ar ts'e̱di ne nga ja'ahu̱ ngu bi ja'ahu̱'u̱. Nu'mu̱ nu ma'ra exa yá nsu, nuga ma ga exa ma nsu n'ehe, mödi di ñö ngu n'a xi 'be̱ ár mfeni. 22 Hage exa yá nsu gehyu̱ ya ebreo. Dar ebreoga n'ehe. Wa eñ'u̱ xpa e ha yá m'u̱i ar hnini Israel. Ja xta ekanu̱ n'ehe. Hage yá 'be̱to ar Abra. Ár 'be̱togi n'ehe. 23 Hage yá 'be̱go ar tsi Hmu Hesukristo. Di töta gatho'u̱. Di ñö ngu n'a xi 'be̱ ár mfeni. Nuga xa xta mpe̱fi. Hingi tsa̱ ga pede hangu ya mfe̱i xi t'akagi. Habu̱ gatho xi jokagi, ne 'bu̱tho xi thogagi. 24 Ku̱t'a mpengi xi me̱bgagi ya xodyo, 'be̱ n'ar mfe̱i da zu̱ yon'a̱te mfe̱i n'a ngu n'a. 25 Hñu'gi xi n'we̱bgagi ya t'o. N'agi bi tho̱xkagi ya nk'ahni. Hñu'gi xi yu̱ ar motsa habu̱ ndi 'yo har dehe. Xta m'e̱ n'apa ne n'axui har ñho̱nthe. 26 Xa xta 'yo ya 'ñu. Xta k'ont'i nga jöt'a ha ya döthe. Xta k'ot'a ha yá 'ye̱ ya bë. Xta k'ont'a hayá 'ye̱ ma mixodyo'be ne nu'u̱ hingya xodyo. 'Bu̱tho nga tu har hnini, ha ya ot'at'o̱ho̱, har ñho̱nthe ne hayá 'ye̱ nu'u̱ ya ku emp'ö. 27 Xa xta tho ar 'be̱fi ne ar nza̱bi. Xta a̱ ma t'öhö. Xta tho ar thuhu ner duthe, himi otho te nga tsi. Xta tho ar tse̱. Xi k'at'a ma dutu. 28 Mödi njap'u̱, nö'ö töte tuka ma mu̱i, hyax'mu̱ di beni tengu 'bu̱ ya ku. 29 Togo thor hñeni ne nuga hindi tsa̱mañ'u̱. Wa togo njapabi da mfets'e, ne nuga hingi tso̱t'a ma mu̱i. 30 Nu'mu̱ mahyoni ar nt'ets'i, ma ga exka ma nsu hinte ja ma ts'e̱di. 31 Jö togo ár Dada ar tsi Hmu Hesukristo, ne ár me̱ti ar nsunda, pödi hindi mönga ar nhemhñö. 32 Núnu̱ Ndamasko nunar ts'u̱t'wi mi fa̱xa ar ndö Aretas, bi got'atho gatho ar hnini nda mhikagihmö. 33 Ha bi t'etkagi ha n'ar 'bo̱ts'e, ne bi jöbgagi ha n'ár oki n'ar ngu mi 'bu̱ har jödo. Njanu̱ da k'ot'a ha yá 'ye̱'u̱.
