ÁR ÑOHO AR KORINTIO 1

1Dar Pablo, ár mpo̱tegi ar tsi Hmu Hesukristo ngetho njap'u̱ bi ne Jö. Nuga ne ar ku Timoteo, di pe̱ñ'ahe nunar he̱'minu̱, nu'ahu̱ gi 'bu̱hu̱ Nkorinto, ne gatho ya ku gi 'bu̱hu̱ har ha̱i Akaya. 2Jö ma tsi Dadahu̱ ne ar tsi Hmu Hesukristo da 'ra'ahu̱ ár nhwëki ne ar hogam'u̱i. 3Nsunda Jö ár Dada ma tsi Hmuhu̱ Hesukristo. Gehnu̱ ma Dadahu̱ hwëgagihu̱ ne ma Jöhu̱ togo hubga ma mu̱ihu̱. 4Gehnu̱ togo hubga ma mu̱ihu̱ nú'mu̱ di thohu̱ ya thogi, ne njap'u̱ da tsa̱ ga hu'mbabihu̱ yá mu̱i togo tho ar thogi ngu xta thohu̱. Di hu'mbabihu̱ yá mu̱i ngu xi njakagihu̱ n'ehe. 5Ngetho jangu xa di thohu̱ ya dumu̱i di te̱ñhu̱ ar tsi Hmu Hesukristo, njap'u̱tho n'ehe di ñhehwihu̱ ár humamu̱i. 6Ha nu'mu̱ xta thohe ya thogi, di to̱'mhe da nhup'a ri mu̱ihu̱ ne da ma̱x'ahu̱ gi k'onju̱. Ha nu'mu̱ nhubgagihe ma mu̱ihe, njap'u̱tho n'ehe di to̱'mhe da nhup'a ri mu̱ihu̱, ne da ma̱x'ahu̱ gi tse̱thu̱ ya thogi, di hñöxa nuya di thohe n'ehe. 7Ne jangu gi thohu̱ ya thogi nguje, hindi tsa̱ya̱he di to̱'mhe njap'u̱ da nhup'a'ihu̱ ri mu̱ihu̱ nguje n'ehe. 8Tsi kuhu̱, di nehe gi pöhu̱ nuya nt'u̱tsa da thohe núnu̱ Asia. Xa bi t'o̱tkagihe ar ts'om'u̱i ne bi the ma ts'e̱dihe, ndi beñhe ja nga kohenu̱. 9Da e̱nt'ase̱he nda thöga ma tehe. Njap'u̱ hinge nga jamfihe ma ts'e̱dise̱he, ho̱nse̱ nga to̱'mhe ár mfa̱ts'i Jö togo ju̱xa nuya xi du. 10Gehnu̱ togo bi ma̱xkagihe, fa̱xkagihepya, ne di ka̱xmbenihe da ma̱xkagihe ga k'onje ma'ra ya thogi ngunu̱. 11Ha nu'ahu̱, nu'mu̱ gi fa̱xkagihe gi 'ya̱fu̱ Jö, ma da nja nze̱ye̱ n'ehe togo da umbabi njamödi xi hwëgagihe nö'ö xka 'ya̱pabihu̱. 12Di johyahe, ngetho ma mfenihe xikagihe xta 'yohe xiñho ngu utkagihe Jö, ne hinxta yo'the ma mfenihe. Hinxta 'bu̱hewa har ximha̱i ngu yá mfeni'u̱, xta te̱mfe ár nhwëki Jö. Xta 'bu̱he n'ar hogam'u̱i hár nthandi ya meximha̱i, m'e̱t'o ha ri nthandihu̱. 13Nö'ö xta ot'ahe, di pöhe gehnu̱ tso ri mfenihu̱, hinge man'ar mfeni. Ne di ka̱xmbenihe ma gi pöhu̱ xiñho xo̱ge. 14Ngu ya xka pökagihe n'a tsi tu̱i, go ma ga ja'ahe gi njohyahu̱. Ha nu'ahu̱ go ma gi jakagihe ga njohyahe n'ehe, nú'mu̱ xta menga ar tsi Hmu Hesukristo. 15Gehnu̱ ar mfeni ndi pe̱ts'i. Jange da bemhö nga thop'u̱ m'e̱t'o nú'mu̱ nda po̱ni nga ekwa Nmasedonia, ne ngi njohyahu̱ ga tso̱ñ'ahu̱ yo'gi. 16Hö, njap'u̱ ndi beni nga thop'u̱tho nga k'ös'ahu̱ ne nga ekwa Nmasedonia. Ne m'e̱fa nga penkp'u̱ man'agi, ne ngi fa̱xkagihu̱ nga ju̱ ma 'ñu nga ma har ha̱i Nhudea. 17Nú'mu̱ nda benga gathoyu̱, hage ndi ñ'önt'u̱tho. Wa ndi ñhe̱'be ya meximha̱i yot'a yá ne n'andi mö hö, ne n'andi hin'ö. 18Jö hingi yot'a ár ne, jange nuje n'ehe hindi möñhe hö ne hin'ö. 19Ngetho ár T'u̱ Jö ar tsi Hmu Hesukristo, nö'ö togo da da̱t'ahe majöni, nuga, ar ku Silbano ne ar ku Timoteo, nunar tsi Hmunu̱ hingi yot'a ár ne. Hár m'u̱inu̱, ka da̱tkagihu̱nu̱ nö'ö majöni. 20Ngetho hár te ar tsi Hmu Hesukristo, ka bi nhekinu̱ gatho yá ñhöt'i Jö. Jange di eñhu̱, hö njap'u̱, nú'mu̱ di e'spabihu̱ ár nsu Jö. 21Jö go bi ze̱tkagihu̱ ma ñ'emu̱ihu̱ hár 'ñu ar tsi Hmu Hesukristo, ne bi hñuskagihu̱ ár Hñö. 22Ne njap'u̱ bi 'wegagihu̱ ngu yá me̱tigihu̱'ö. Gehnu̱ ar Hñö da höñhu̱ ha ma mu̱ihu̱ ngu n'ar 'be̱t'o ñhöt'i, ne di to̱'mhu̱ ga höñhu̱ xo̱ge m'e̱fa. 23Ha nuga hinxta thop'u̱tho Nkorinto, ngetho di tsu ga zo'ahu̱ nts'e̱di, ne ga tso̱t'a ri mu̱ihu̱. Jö pödi di mönga majöni, ne di et'a made ma te hindi kate. 24Hindi nehe ga ja'ahe gi ñ'emu̱ihu̱ ngu di neje. Nö'ö di nehe, ga fa̱x'ahe gi pe̱'su̱ ar johya, ngetho di pöhe xi nze̱di ri ñ'emu̱ihu̱.

will be added

X\