ÁR NDU̱I AR TIMOTEO 6

1Gatho nu'u̱ togo m'e̱go, mahyoni da numañho yá hmu, ne njap'u̱ hinda ñhömañ'u̱ ár thuhu Jö, ne hinda ñhömañ'u̱ ar hoga nt'uti di ñ'emu̱ihu̱. 2Nu'u̱ togo 'ñe yá hmu ya gamfi, xa da umba yá mu̱i da me̱pabi xiñho, yo ma da hye̱gi da 'yo̱te. Ngetho nu'u̱ togo hönga nunar hoga 'be̱finu̱, gehyu̱ yá hmöka ku. Utwabi gathoyu̱ ya ku, ne hñu'mba yá mu̱i da 'yo̱t'e. 3Nu'mu̱ n'a togo te gatho utatho, ne hingi uta ngu mönga ár hoga mhö ma tsi Hmuhu̱ Hesukristo, ne hingi ne da de̱nga ar hoga nt'uti otkagihu̱ ar 'ñu hanja ga 'bu̱hu̱ ngu ne Jö, 4nö'ö ar jö'i'ö ar ñ'ets'i ne hinte pödi, xi 'be̱ ár mfeni, honi togo da ntsa̱hñökiwi. Ka di bo̱hnu̱ hyo̱kwa yá ñho ma'ra, ya tuhni, ya nts'ani, ne hinto ne da ntsixkwi. 5Bi ehnu̱ n'ehe ya ntsa̱hñöki, hinte mañho nju̱ki nö'ö mönga nuya jö'iyu̱. Xi ts'oka yá mfeni ne xi t'ökwa nö'ö majöni. Ho̱nse̱ honga ar ñ'emu̱i, ne njap'u̱ da gu̱ka ar bojö. Hye̱ nuya jö'iyu̱. 6Majöni, döta ár njut'i nunar hogam'u̱inu̱, nu'mu̱ ga ñhogamu̱ihu̱ nö'ö di pe̱'su̱. 7Ngetho hinte xta höhu̱wa har ximha̱i, ne hinte ga höxu̱. 8Nu'mu̱ di pe̱'su̱ te ga tsihu̱ ne te ga hehu̱, gar ñhogamu̱ihu̱. 9Ngetho gatho nu'u̱ togo ne da me̱'sa nze̱ye̱ ya m'e̱ts'i, töta yá ts'omfeni ne yá ts'ohyo̱ke. Hinte mañho ju̱ki, ne njapabi da nhwati ne da m'e̱di. 10Nu'u̱ togo xa mö ar bojö, ka bi po̱p'u̱ gatho ya ts'oki. 'Ra ya ku xi de̱nga ar bojö, xi hye̱p'u̱ yá ñ'emu̱i ne xi tho nze̱ye̱ ya dumu̱i. 11Ha nu'ge Timoteo, ár 'be̱go'i Jö, 'wege hye̱ gatho nuya ts'okiyu̱. Ne umba ri mu̱i gi 'bu̱i xiñho, gi 'yo ngu ne Jö, gi pe̱'sa ar ñ'emu̱i, ar mhöte, ar ts'e̱ti, ne nts'a̱'mtho. 12Tho ar xa̱nthe, xa gi umba ri mu̱i gi ñönga ar ñ'emu̱i. 'Yo̱t'a ar ts'e̱di gi te̱nga xiñho ar te hinda thege xi 'ra'a Jö nú'mu̱ mi zoñ'a'i, ne ga da̱majöni ha yá nthandi nze̱ye̱ ya jö'i. 13Di 'be̱p'a'i hár nthandi Jö nö'ö to umba yá te gatho nö'ö te 'bu̱i, ne hár nthandi ar tsi Hmu Hesukristo togo bi da̱twa majöni ar Pilato ár hoga 'be̱fi, 14gi 'yo̱t'a nö'ö di 'be̱p'a'i, gi 'bu̱ n'ar m'u̱i hinxi ja̱xt'i ne hinto da k'as'a'i, to̱'ma ar pa da penga ar tsi Hmu Hesukristo. 15Ngetho nu xta zo̱ ar pa, da ñ'u Jö nunar mpenginu̱, gehnu̱ togo n'ase̱ 'bu̱i, döta ár nsunda ne pe̱'sa gatho ar ts'e̱di, ár Ndö ya ndö ne ár Hmu ya hmu. 16Nuna höse̱ ár te hiñham'u̱ da thege, ne 'bu̱ ha n'ar hyats'i hinto tsa̱ da zo̱ni. Hinto xi hyandi, ne hingi tsa̱ da thandi. Gehnu̱ di 'ñepabi ar nsunda ne ar ts'e̱di hiñham'u̱ da göts'i. Dá njap'u̱. 17'Be̱pa nu'u̱ pe̱'sa yá m'e̱ts'iwa har ximha̱i, yo ma da ñ'ets'i. Hinda hñuxyá da̱ har hya̱te bojö. Dá hñuxyá da̱ Jö togo hö ar te, ne xi 'rakagihu̱ töte nö'ö di k'athu̱, ne njap'u̱ ga 'bu̱hu̱ ter entho. 18Xipabi da 'yo̱t'a nö'ö xiñho, ne da me̱ ya hoga 'be̱fi, gehyu̱ yá m'e̱ts'i. Di pödi da 'yo̱t'a n'ar ñho, ha nu'mu̱ te da uni, di po̱nga ha yá mu̱i. 19Njap'u̱ to̱'ma n'ar hoga m'e̱ts'i, gehnu̱ umbabi n'ar ndo̱'mi nuya pa di 'ñep'u̱, ne ze̱twa yá mu̱i honga ar te hiñham'u̱ da göts'i. 20Nupya tsi Timu, su ar 'be̱fi bi t'e̱nt'a ha ri 'ye̱. Yo gi japamasu nuya ts'o'bede hinter me̱'u̱. Hingi 'yo̱'spa yá mhö xi hñuxase̱ nu'u̱ enö xa pe̱'sa n'ar hoga mfödi emp'ö. 21Nu'u̱ togo xi de̱nga nuya mfödiyu̱, xi hye̱p'u̱ yá ñ'emu̱i.

will be added

X\