ÁR NDU̱I AR TIMOTEO 5

1Yo gi tsu̱ ar tsi dönzia, zofo ngu ri dada emp'ö, ha nu'u̱ bötsitho, ngu ri jödö. 2Nuya tsi txu, zofo ngu ri nönö, nu'u̱ nxutsitho ngu ri nju, gi pe̱'sa n'ar mfeni xint'axi nú'mu̱ gi xipa hanja da m'u̱i. 3Xipa ar nijö da ma̱xa nuya n'anxu hinto 'ñehe togo da ma̱ts'i. 4Ha nu'mu̱ 'ñe yá bötsi wa yá 'be̱to, dá böhyu̱ da su, ne da 'yo̱t'wa ar ñho m'e̱t'o yá mëni. Ne njap'u̱ da ko'spa n'a tu̱i nunar ñho xi hñöñ'u̱, ngetho gehnu̱ xiñho ne numañho Jö. 5Nö'ö majöni ar 'ranxu, 'bu̱se̱ ne hinjo'o togo da su, ho̱nse̱ to̱'mba ár mfa̱ts'i Jö, ne parxui mat'i ne a̱pabi da ma̱ts'i. 6Ha nö'ö ar 'ranxu o̱t'a gatho nö'ö ne, ha hingi 'yomañho ár m'u̱i, hinga mahyoni da ma̱xa ar nijö, ngetho nuya 'ranxu'u̱ mödi te, po̱ntho xi du. 7Xipa ya ku nö'ö di xi'a'i, ne njap'u̱ hinte di ja te da nk'a'spabi. 8Ngetho nu'mu̱ n'ar ku hingi japamasu nu'u̱ te yá njawi ne nuyu̱ 'bu̱ hár nguse̱, xi ts'oka ár jamfi ne töta n'a nö'ö hinxi ñ'emu̱i. 9Nu habu̱ di huxa yá thuhu ya 'ranxu t'umba ar mfa̱ts'i, hindi huxp'u̱ nu'u̱ hinxi thota hñun'a̱te nje̱ye̱, ne hinxi 'ñe ho̱nse̱ n'ár döme. 10Ne di födi bi m'u̱ n'ar hogam'u̱i, bi te xiñho yá bötsi. Xi umba ar se̱ki gatho nu'u̱ mi tso̱ hár ngu, ne xi xu̱kwa yá wa ya gamfi. Bi ma̱xa nu'u̱ mi tho ar thogi, ne xi bödi xi me̱ xiñho gatho ya hoga 'be̱fi. 11Yo gi huxa nu'u̱ tse̱tho, ngetho zo̱ta ar pa da ne da mengi da nthöti, ne hinda jwata ar 'be̱fi bi ndu̱i bi me̱pa ar tsi Hmu. 12Ne da duxa ar ts'oki, ngetho himbi 'yo̱t'a ngu xki mönga m'e̱t'o. 13Da nzöñ'u̱ hinte pe̱fi, ho̱nse̱ 'yo ne ya ngu. Hinge ho̱nse̱ da bö ya döhñe, te yá nemhñö 'yo pede ño'ö hindi 'ñepi da möñ'u̱. 14Jange di 'be̱p'a'i, nuya 'ranxu di tse̱tho, dá nthöti, dá te yá bötsi ne da su xiñho ár ngu. Njap'u̱ hinte da za̱ te da mönga nu'u̱ togo hingi ne da nugagihu̱. 15Ngetho 'ra xi 'wege xi de̱nga ar Ts'ondöhi. 16Nu'mu̱ n'ar ku ar ñ'o̱ho̱ wa ar 'be̱hñö 'ñe n'ár mëni hár ngu di 'ranxu, mahyoni da umba nö'ö te k'at'i, ne hindar ñhembibi ar nijö da su, ne da tsa̱ da ma̱xa ma'ra nu'u̱ majöni hinto 'ñehe to da ma̱ts'i. 17Nuya ma̱'yo tsixa xiñho ár nijö ar tsi Hmu, mahyoni xa da nhumansu, ne töte nu'u̱ mpe̱fi mömba ár mhö Jö ne uta ma'ra. 18Ngetho hár T'ofo Jö enö njawa: Yo gi tut'wa ár ne ar boi ne'mi töka ar t'e̱i. Ne enö n'ehe: Nö'ö togo mpe̱fi, di 'ñepi da t'umba ár nthöhö. 19Nu'mu̱ togo ne te da hyo̱xa n'ar ma̱'yo, mahyoni di 'bu̱ yoho wa hñu togo da tsa̱ da da̱majöni. 20Nuya ma̱'yo hingi he̱gi o̱t'a ar ts'oki, tsu̱i habu̱ da hyanda gatho ya ku, ne njap'u̱ da zu nu ma'ra n'ehe. 21Di 'be̱p'a'i hár nthandi Jö, ar tsi Hmu Hesukristo ne yá e̱nxe̱ xi hwañ'ö, 'yo̱t'a ngu di xi'a'i, yo ma gi fa̱xa n'a wa man'a. 22Yo gi hu'spa ri 'ye̱ gi 'ñexa ngut'a nu'u̱ togo ne da me̱pa Jö. Ngetho nu'mu̱ hingi 'yo xiñho, da mhö gi et'atho ri xu̱tha. Pe̱'ske n'ar hogam'u̱i hinxi ja̱xt'i. 23Yo gi tsi ho̱nse̱ ar dehe, tsi n'a tsi tu̱i ar t'afi'obxi, da hñök'a nö'ö ar u̱mu̱i gi ntsa̱wi hingi ne da hye̱k'a'i. 24'Ra dama nhekitho yá ts'oki mödi hinxi thö'spatho majöni, ma'ra da fö m'e̱fa. 25Njap'u̱tho nu'u̱ to o̱t'a ar ñho n'ehe, 'ra ya hoga 'be̱fi ngut'a da nheki, ha ma'ra da nheki m'e̱fa, ngetho hingi tsa̱ da ts'e̱'ma n'ar hoga 'be̱fi.

will be added

X\