ÁR NDU̱I AR TIMOTEO 4

1Ár Hñö Jö xi 'yotkagihu̱ xiñho ar 'ñu, ne enö hár ngöts'i ya pa, 'ra ya ku ma da hye̱ ar ñ'emu̱i, da 'yo̱'spa yá nhemhñö nt'uti ya jö'i te̱mba yá nt'uti ya ts'ondöhi. 2Nuya kate jö'i ma da mönga ya nhemhñö, ngetho xi ts'oka yá mfeni. 3Ma da hñökwa ya jö'i da nthöti. Ne hinda hye̱gi da zi 'ra ya ñhuni xi 'rakagihu̱ Jö ga tsihu̱ di umfu̱ njamödi, nuju̱ dar gamfihu̱ ne xta pöhu̱ nö'ö majöni. 4Gatho nö'ö bi hyoka Jö xiñho, hinte ga tsanthu̱, ho̱nse̱ nú'mu̱ xka tsihu̱ ga umfu̱ njamödi. 5Ngetho ár mhö Jö ne nú'mu̱ di a̱fu̱, japi da t'axki. 6Nu'mu̱ gi uta ya ku gatho nö'ö xta xi'a'i, ne nu'mu̱ gi 'ñet'a ri mu̱i gatho nuya mhö no̱nga ma jamfihu̱, ne ar hoga nt'uti xka te̱ni, njap'u̱ hö, gár hoga 'be̱go ar tsi Hmu Hesukristo. 7Yo gi japamasu nuya ts'o'bede hinte o yá 'ñu no̱nga ya meximha̱i. Nö'ö gi 'yo̱t'e, hyonga hanja gi 'bu̱i xiñho. 8Ngetho nö'ö togo japi da 'ñönga ár ndo'yo ne da me̱'sa ar ts'e̱di, hints'u̱ ju̱kwa nze̱ye̱ ar ñho. Ha nö'ö umbár mu̱i da m'u̱i xiñho, ju̱kwa nze̱ye̱wa, ne har te xi 'ñep'u̱ n'ehe. 9Nunar mhönu̱ xta xi'ahu̱ majöni, ne mahyoni gatho ya jö'i da ñ'emu̱i. 10Jange xa di umba ma mu̱ihu̱ di mpe̱hu̱, ne di thohu̱ ya thogi, ngetho di ñ'emu̱ihu̱ Jö togo te. Gehnu̱ ár ñönte gatho ya meximha̱i, 'be̱t'ogihu̱ nuya xta jamfihu̱. 11Gehnu̱ gi xipabi ne gi uta ma'ra. 12Yo gi ñhe̱gi da nhu'a'i ngu hinte gi pödi ngetho gi bötsitho. Nö'ö gi pe̱fi: Gi ñö xiñho, gi 'yomañho, gi pe̱'sa ar mhöte, umba ri mu̱i gi mpe̱fi, tse̱ta ri ñ'emu̱i, gi 'bu̱ n'ar m'u̱i xint'axi, ne njap'u̱ da de̱ñ'a ya ku. 13Nuya pa hindi tso̱mp'u̱tho, gi népa ya ku ár mhö Jö, hñu'mba yá mu̱i, ne gi utwabi. 14Jamasu nunar hogant'uni xi 'ra'a Jö, ne bi xi'a'i nú'mu̱ bi hñus'a yá 'ye̱ yá ndö ar nijö. 15Umba ri mu̱i gi pe̱ nuya 'be̱fiyu̱, ne yo ma gi hye̱gi. Njap'u̱ gatho da hyandi 'yo di xu nuya ñho xi 'ra'a Jö. 16Nsuse̱ge ne jamasu ar nt'uti. Yo gi tsa̱ya̱ gi 'yo̱t'a njap'u̱, ngetho gi mpo̱se̱ge, ne da mpo̱ gatho nu'u̱ da 'yo̱x'a'i.

will be added

X\