ÁR NDU̱I AR TIMOTEO 3

1Majöni nunar mhönu̱: Nu'mu̱ togo ne da nma̱'yo, n'ar hoga 'be̱fi ne'ö. 2Ne mahyoni da me̱'sa n'ar hogam'u̱i, hinte di ja te da nk'a'spabi. Di 'ñe n'adar 'be̱hñö, di pödi xiñho nö'ö pe̱fi, di pe̱'sa ar hoga mfödi. Di pödi da 'yo̱t'wa ar ñho ma'ra, di ungar se̱ki hár ngu, ne di pödi da uta ma'ra. 3Hindi nti, hindi honga ya tuhni, hindar nts'o da dö ar bojö. Ar hogajö'i, hindar kwe̱, hindi ne da me̱'sa nze̱ye̱ ya bojö. 4Di pödi hanja da zixa xiñho ár ngu, ne nuyá bötsi di o̱t'a nö'ö ne Jö. 5Ngetho nö'ö hingi pödi da zixa ár ngu, hanja da tsa̱ da zi'spa ár nijö Jö 'mu̱. 6Hinda tsa̱ da nma̱'yo n'ar 'ra'yo gamfi, ngetho yo ma da ñ'ets'i, ne njap'u̱ da hñönga ar mfe̱i bi hñönga ar ts'ondöhi. 7Mahyoni di numañho nu'u̱ hingya gamfi. Njap'u̱ hinda 'be̱ ár tsa̱, ne hinda zo hár 'ye̱ ar ts'ondöhi. 8N'ar ma̱xte har nijö mahyoni di nhumañho, hindi yot'a ár ne, hindi nti, hindar nzibjö. 9Di su xiñho nuna ñ'emu̱i xi t'uti, ne di ñ'u n'ar mfeni xint'axi. 10Mahyoni da nts'a̱ti m'e̱t'o ha hinte pe̱'sa te da k'ats'i, ne nu'mú̱ hö, da tsa̱ da t'ets'i. 11Njap'u̱ nuya 'be̱hñö n'ehe di mpe̱ har nijö, mahyoni di nhumañho, hindi ju̱xya nhemhñö, di pödi xiñho nö'ö pe̱fi, ne di o̱t'a xiñho gatho. 12Nuya ma̱xte di 'ñe n'adar 'be̱hñö, di pödi hanja da zixa xiñho ár ngu ne yá bötsi. 13Nö'ö togo fa̱xte xiñho hár 'be̱fi Jö, dá t'e'spa ár nsu, ne njap'u̱ hinda ntsu da xipa ma'ra ar ñ'emu̱i pe̱'spabi ar tsi Hmu Hesukristo. 14Di pe̱ñ'a nunar he̱'minu̱, mödi di beni ngut'a ga map'u̱ ma ga k'ös'a'i. 15Ha nu'mu̱ da tho 'ra ya pa hindi tso̱mp'u̱tho, gi pödi hanja gi 'yo̱t'a ar 'be̱fi hár ngu Jö. Getnu̱ ár nijö Jö togo te, ne nunar nijönu̱ su ne ñönga nö'ö majöni. 16Xa döta nunar ñ'emu̱i xi t'utkagihu̱. Nunar mhönu̱ hinjo'o togo da k'ats'i: Jö ba e bi njö'i. Ár Hñö Jö bi da̱majöni bi 'yo̱t'a xiñho. Bi hyanda yá e̱nxe̱ Jö. Bi mhömba ár 'bede gatho ya ha̱i ja har ximha̱i. Gatho ár nxidi ar ximha̱i bi ñ'emu̱ibi ne bi ts'ixa mhets'i hár nsunda.

will be added

X\