ÁR NDU̱I AR TIMOTEO 1

1Nuga dar Pablo, ár mpo̱tegi ar tsi Hmu Hesukristo, ngu xki hñuxkagi Jö ma Po̱ho̱tehu̱ ne ma tsi Hmuhu̱ Hesukristo, gehnu̱ ma ndo̱'mihu̱. 2Di ot'a nunar he̱'minu̱, Timoteo, ngu ma t'u̱'i, ngetho da zo'a'i ár mhö Jö ne ga ñ'emu̱i. Jö ma Dadahu̱ ne ma tsi Hmuhu̱ Hesukristo da hwëk'a yá ñho, ne da ko ár mu̱i da ma̱x'i gi 'bu̱ n'ar hogam'u̱i. 3Ngu da a̱'anu̱ Efeso ngi kohnu̱, ne ngi hñökwa nu'u̱ togo utwa ya ku ma'ra ya nt'uti himbi zogagihu̱ ar tsi Hmu. Da xi'a njap'u̱ nú'mu̱ ndi 'ba̱ ar 'ñu ngar ma Nmasedonia. 4Da a̱'i n'ehe ngi xipa ya ku hinge nda japamasu nuya 'bede hinte o yá 'ñu, ne hiñ'otho ár ngöts'i. Möñ'u̱ ho̱nse̱ da ntsa̱mfödi, hinte fa̱'spa ár 'be̱fi Jö habu̱ mpe̱ ar ñ'emu̱i. 5Da a̱'a'i ngi xipa ya ku njap'u̱, nda mhö n'a ngu n'a, ndi pe̱'sa n'ar hogamu̱i, n'ar mfeni xint'axi, ne n'ar ñ'emu̱i hindi ñ'entho. 6Ngetho 'ra xi hye̱hyu̱, ne nupya hinte mañho möñ'u̱. 7Xa o̱t'u̱ pömpa ár t'ofo ar Moise emp'ö, hingi pöhmö tema di bo̱nga nö'ö möñ'u̱. 8Di pöhu̱ ár t'ofo ar Moise xiñho, nu'mu̱ da t'uta ngu möñ'ö. 9Di pöhu̱ n'e, ya 'be̱pate hinge mahyonibi ya hogajö'i. Go honga nuya ts'oka t'ofo, nu'u̱ hingi o̱t'a nö'ö nsipabi, nuya 'yo̱t'ats'oki ne ya ts'ojö'i, nuya hingi honga Jö ne hingi nsundabi, nu'u̱ ho yá dada, yá nönö, ne gatho numa'ra ya hyote. 10Bi t'uni honi nu'u̱ 'be̱ngwi hingyá nthöti, nu'u̱ 'be̱ngwi yá mindo̱wi, nu'u̱ pë yá mijö'iwi, nu'u̱ mönga ya nhemhñö, ne nu'u̱ et'a Jö made kate, ne gatho nu'u̱ to̱'sa ar hoga nt'uti. 11Jangu mönga ár hoga mhö Jö xa nsunda, bi zogagi ga mö. 12Di umba njamödi ma tsi Hmuhu̱ Hesukristo, togo bi 'raka ar ts'e̱di, ne bi nugagi ngu n'ar hoga 'be̱go, bi 'ye̱ntk'a ha ma 'ye̱ ár 'be̱fi'ö. 13Mödi mam'e̱t'o ndi tsanga ar tsi Hmu Hesukristo, ne xa ndi u̱tsa gatho nu'u̱ mi te̱ni, ne ndi nku'be, te gatho ndi japabi'u̱. Ha nunar tsi Dada bi hwëgagi, ngetho hinge ndi pöka tema ndi o̱t'e, ne hinge ndi ñ'emu̱i. 14Ne bi gobgatho ár nhwëki, ne njap'u̱ bi tsa̱ da ñ'emu̱i ar tsi Hmu Hesukristo, ne bi tsa̱ da hönga nunar mhöte uñ'ö. 15Nunar mhönu̱ majöni ne mahyoni gatho da ñ'emu̱i: Nunar tsi Hmu Hesukristo ba ekwa har ximha̱i da po̱ gatho ya 'yo̱t'ats'oki, ha nuga ndi töka gatho. 16Ar tsi Dada bi hwëgagi togo ndi töpa ár nts'o gatho nu ma'ra, ne njap'u̱ nda nheki ár ts'e̱ti ar tsi Hmu Hesukristo. Gehnu̱ n'ar nt'udi da hyanda nu'u̱ nda jamfi, ne nda me̱'sa ar te hiñham'u̱ da göts'i. 17Jange nunar Ndö hiñham'u̱ da göxa ár ts'u̱t'wi, dá hñönga ar nsunda ne da t'e'spa ár nsu. Gehnu̱ hingi tu ne hingi nheki, ho̱nse̱nu̱ ar Jö ne töte ár mfödi. Dá njap'u̱. 18Ma tsi t'u̱'i Timoteo, di tsok'a'i gi umba ri mu̱i gi mpe̱ hár 'be̱fi ar tsi Dada, ngu xki xi'a Jö ngi 'yo̱t'e, ne gi mpe̱ ngu n'ár hoga ndogu ar tsi Hmu. 19Su ri ñ'emu̱i, ne gi pe̱'sa n'ar mfeni xint'axi, ngetho 'ra bi hye̱p'u̱ ne bi 'be̱ yá jamfi, hingi pödi te da me̱pya. 20'Rayu̱, ar Imeneo ne ar Handro nu'u̱ togo xta e̱nt'wa hár 'ye̱ ar Ts'ondöhi, njap'u̱ da dits'i ne hinda mengi da zanga Jö.

will be added

X\