ÁR NDU̱I AR TESALONISENSE 3

1Himbi tsa̱ da to̱'mhe nga pöhe tengu xka 'bu̱hu̱, jange da beñhe nga kose̱henu̱ Atena. 2Ne da pe̱ñhe ma tsi kuhu̱ Timoteo ár 'be̱go Jö, ne ma ma̱xtehe hár 'be̱fi ar tsi Hmu Hesukristo. Da pe̱ñhe ma nda k'ös'ahu̱ nda hñup'a ri mu̱ihu̱, ne nda ma̱x'ahu̱ nda te ri jamfihu̱. 3Njap'u̱ hinto di tupa yá mu̱i ya nt'u̱tsa gi thohu̱. Gi pöse̱hu̱ xi ts'onkagihu̱ ga thohu̱yu̱. 4Nú'mu̱ ndi 'bu̱hwihu̱, da xi'ahe mi mahyoni nga thohu̱ nze̱ye̱ ya nt'u̱tsa ngu gi thohu̱pya. 5Jange himbi tsa̱ da to̱'ma ma'ra ya pa. Dama da pe̱hna togo nda ñ'a̱ni tengu xka 'bu̱hu̱, xömhö hinxi hya̱'ahu̱ ar ts'ohya̱te, ne nunar 'be̱fi xta pe̱he da m'e̱di. 6Ha nú'mu̱ mba penkp'u̱ ar ku Timoteo, ba hönkagihe ar hoga mhö tengu ri jamfihu̱ ne ri mhötehu̱. Bi xije xa gi bengagihe, ne gi ne gi hyandgagihe, nguje di nehe ga nu'ahe n'ehe. 7Jange tsi kuhu̱, nú'mu̱ nda o̱he nunar mhönu̱, xa da njohyahe, mödi ndi thohe nze̱ye̱ ya thogi ne ya nt'u̱tsa, ngetho da pöhe mi tse̱ ri jamfihu̱. 8Nu nda pöhe ngi umba ri mu̱ihu̱ ngi te̱ñhu̱ ar tsi Hmu, da hñöhñöhe. 9Xi'mu̱, hanja hinga umfe njamödi Jö di beñ'ahe. Ngetho xa di pe̱'se n'ar döta johya hár nthandi ar tsi Dada. 10Parxui di a̱fe Jö da 'raje ar se̱ki ma ga k'ös'ahe ga fa̱x'ahe da nxo̱ge ri jamfihu̱ habu̱ 'be̱di. 11Jö ma Dadahu̱ ne ma tsi Hmuhu̱ Hesukristo da zixkagihe ma ga k'ös'ahe. 12Ma tsi Hmuhu̱ da ma̱x'ahu̱ da te ri mhötehu̱ n'a ngu n'a, ne gi möhu̱ gatho nu ma'ra ngu di mö'ahe n'ehe. 13Ne da ma̱x'ahu̱ dar nze̱di ri mu̱ihu̱, ne gi hye̱hu̱ gatho ya ts'oki. Gi 'bu̱hu̱ xint'axi hár nthandi Jö ma Dadahu̱, ne gi to̱'mhu̱ xta penga ma tsi Hmuhu̱ Hesukristo di ñ'owi gatho nu'u̱ xi ñ'emu̱i.

will be added

X\