ÁR NDU̱I AR TESALONISENSE 2

1Tsi kuhu̱, gi pöse̱hu̱ himbi m'e̱ ma 'be̱fihe nú'mu̱ nda hös'ahe ár mhö Jö. 2Mödi m'e̱t'o xa da thohe nze̱ye̱ ya mfe̱i ne ya nts'ani núnu̱ Nfilipo, ngu xka 'yo̱hu̱, Jö bi 'raje ar ts'e̱di, ne bi tsa̱ da hös'ahe ár hoga mhö. Mödi da thohe ya thogi, hinda ntsuhe. 3Da zo'ahe nö'ö majöni. Ma mhöhe hinge hongar hñö, wa ar hya̱te. 4Ngu bi numañhogihe Jö nda zokagihe nga möñhe ar hoga mhö, jange go ge'ö di möñhe, hinge njangu nu'u̱ ne da gohwi xiñho yá mijö'iwi. Ngetho nö'ö di neje, ga ko'behe xiñho Jö ma Dadahu̱ togo pötka ma mfenihu̱. 5Hinxta ka'ahe xta xi'ahe ya nza̱tho mhö. Hinxta ne xta ha̱'ahe nga hömp'ahe ri bojöhu̱. Ar tsi Dada pödi njap'u̱ ngu di möñhe. 6Hinxta hoñhe da 'ñeska ma nsuhe ya jö'i, ngu'ahu̱ wa ma'ra, mödi mi tsa̱ nga a̱'ahe, ngetho yá mpo̱tegihe ar tsi Hmu Hesukristo. 7Nö'ö da pe̱he, da mö'ahe ngu n'ar nönö mödi ne su ár bötsi. 8Xa da mö'ahe. Ne hinge ho̱nt'a ndi 'bu̱he nga 'ra'ahe ár hoga mhö Jö; ndi 'bu̱he nga 'ra'ahe ma tehe nu'mu̱ mahyoni nga o̱the, ngetho xa xta mö'ahe. 9Tsi kuhu̱, gi pöse̱hu̱ parxui mi tsa̱je ndi mpe̱he, ne njap'u̱ nda tsa̱ nga ta̱ñhe nö'ö ndi k'athe. Ne hinge nga o̱t'ahe ar xuhña nú'mu̱ ndi hös'ahe ár hoga mhö Jö. 10Ngu pö Jö ne nu'ahu̱ n'ehe, nú'mu̱ nda 'bu̱hep'u̱, da 'yohe xiñho ha ri nthandihu̱ nu'ahu̱ xka jamfihu̱. Ne da 'bu̱he n'ar hogam'u̱i, hinte da o̱the nda k'as'ahu̱ m'e̱fa. 11Gi pöhu̱ hanja ndi zo'ahe, ne ndi hup'a ri mu̱ihu̱ n'a ngu n'a, ngu n'ar dada zo yá bötsi. 12Ndi 'be̱p'ahe ngi 'bu̱hu̱ ngu mahyoni da m'u̱ nu'u̱ togo xi zohna Jö da m'u̱ hár ts'u̱t'wi, ne da hyandwa ár nsunda. 13Nuje n'ehe hindi tsa̱ya̱he di umfe njamödi Jö, ngetho nú'mu̱ nga 'yo̱xu̱ ar mhö da xi'ahe, ga nuhu̱ hinge ngu ár mhö n'ar ñ'o̱ho̱tho. Ga nuhu̱ ngu ar mhö majöni ár me̱ti Jö, mpe̱ ha ri mu̱ihu̱, nu'ahu̱ xka da̱thwu̱ ri tehu̱. 14Tsi kuhu̱, xka thohu̱ ya nt'u̱tsa mahye̱gi ngu xi tho nu'u̱ ya ku 'bu̱ ha yá nijö ar tsi Hmu Hesukristo 'bu̱hnu̱ har ha̱i Nhudea. Gi njahu̱p'u̱ xi u̱tsase̱'ihu̱ ya mengu ri ha̱ihu̱, njangu xi u̱tsase̱'u̱ yá mixodyowi. 15Nuya xodyo go bi hyo'u̱ ar tsi Hmu Hesukristo, ne gese̱'u̱ bi hyo yá m'e̱hni Jö, ha nuje bi gukagihe. Hingi ne da me̱pa Jö'u̱, ne u̱tsa gatho ya jö'i. 16Ngetho hingi he̱gagihe ga zohe nu'u̱ hingya xodyo da mpo̱'u̱. Xa xi nt'a̱ta yá ts'oki, jange Jö xi 'ye̱kwatho ár döta mfe̱i. 17Ma tsi kuhu̱, 'ra ya tsi pa hinxta 'bu̱hu̱ mahye̱gi. Mödi hinxta ñhanthu̱, ha ma mu̱ihe mi oda ar mfeni ga hant'ahe, jange xa di nehe ga nthe̱hu̱ man'agi. 18Ndi nehe nga möhe ma nga k'ös'ahe, mödi ar Ts'ondöhi xi k'askagihe. Gese̱gi ar Pablo ri kuhu̱, xa xta nemhö ga map'u̱, ne hinxi tsa̱. 19Ngetho teme nö'ö di to̱'mhe, teme ma johyahe, ne hanja ga tsu̱he ma nthöhöhe nu xta e ar tsi Hmu Hesukristo. Ha hinge ga höñhe ngetho xka jamfihu̱. 20Hö, ngetho xka ñ'emu̱ihu̱ ma da t'eska ma nsuhe ne ma ga njohyahe.

will be added

X\