ÁR NDU̱I AR TESALONISENSE 1

1Nuga dar Pablo, ar ku Silbano ne ar ku Timoteo, di pe̱ñ'ahe nunar he̱'minu̱ nu'ahu̱ gar gamfihu̱ me Ntesalonika, gi 'bu̱hwihu̱ Jö ar tsi Dada mhets'i ne ar tsi Hmu Hesukristo. Jö ma Dadahu̱ da 'ra'ahu̱ n'ar hogam'u̱i ne da hwëk'ahu̱ yá ñho. 2Hyax'mu̱ di umfe njamödi Jö xka jamfihu̱ gi gathohu̱, ne hindi tsa̱ya̱he di a̱fe Jö da ma̱x'ahu̱. 3Nú'mu̱ di a̱fe Jö ma Dadahu̱, di beñhe hangu xka mpe̱hu̱, ne tengu ar ts'e̱di xi 'ra'ahu̱ ri jamfihu̱ ne ri mhötehu̱, ne hanja gi pe̱'su̱ ar ts'e̱ti gi to̱'mhu̱ da penga ar tsi Hmu Hesukristo. 4Tsi kuhu̱ xa mö'ahu̱ Jö, di pöhe xi hwañ'a'ihu̱'ö. 5Nú'mu̱ nda hös'ahe ar hoga mhö, hinge ho̱nse̱ ya mhö da xi'ahe. Da möñhe hár ts'e̱di ár Hñö Jö, ne ndi pöhe xiñho majöni nö'ö da xi'ahe. Ga hyandase̱hu̱ ma m'u̱ihe nú'mu̱ ndi 'bu̱hwihu̱p'u̱ ndi hoñhe ngi 'bu̱hu̱ xiñho. 6Nu'ahu̱ ga te̱ñhu̱ ma m'u̱ihe ne ár m'u̱i ar tsi Hmu Hesukristo. Ga hñömfu̱ ár mhö, mödi ga thohu̱ nze̱ye̱ ya nt'u̱tsa. Ne ngi johyahu̱ ngetho ngi pe̱'sfu̱ ár mfa̱ts'i ár Hñö Jö. 7Jange gatho ya ku me Nmasedonia ne Akaya te̱mp'atho ri m'u̱ihu̱. 8Xka jafu̱ xi nxanga ár mhö Jö, hinge ho̱nse̱ Nmasedonia ne Akaya, hagatho födi xka jamfibihu̱ ár mhö Jö. Jange nuje 'mu̱, hinge mahyoni te ga möñhe, gatho födi. 9Ngetho gese̱'u̱ mpede benga nú'mu̱ nda tso̱ñ'ahe, ne hanja ga 'yo̱xu̱ nö'ö ndi möñhe. Ne hanja ga hye̱hu̱p'u̱ ngi ndöñhu̱ ri tsitahu̱ emp'ö, ne gi pe̱fu̱ Jö togo majöni ne hö ar te. 10Ne pe'u̱ hanja gi to̱'mhu̱ ár T'u̱ Jö xta 'ñe mhets'i nö'ö bi mengi bi nte. Gehnu̱ ar Hesu po̱kagihu̱ hinda zu̱kagihu̱ ar döta mfe̱i ba ep'u̱.

will be added

X\