ÁR NDU̱I AR PEDRO 5

1Di zo nu'u̱ ya ndö har nijö gi 'bu̱hwihu̱p'u̱. Di a̱pabiga dar ndöse̱ n'ehe, ne da handwa yá u̱gi bi tho ar tsi Hmu Hesukristo, ne di to̱'mi ga 'bu̱'benu̱ mhets'i xta nheki ár nsunda. 2Suhu̱ ya tsi de̱ti gi 'bu̱hwihu̱p'u̱ yá me̱ti ar tsi Hmu. Yo gi o̱thu̱ ngetho nja'ahu̱, go gi nese̱hu̱. Yo gi homfu̱ yá bojö, njohya gi suhu̱. 3Hingi 'yo̱thu̱ ndöta gi ne gi hyo̱maha̱ihu̱ nu'u̱ togo gi suhu̱. Nö'ö gi 'yo̱thu̱, 'ñuhu̱ n'ar hogam'u̱i. 4Ne xta ep'u̱ ar Döngama̱'yo, ma gi hñöñhu̱ ar nthöhö nsunda hinda ma da thege. 5Mahye̱gi di xi'ahu̱ nu'ahu̱ gi bötsihu̱, 'yo̱thu̱ te da xi'ahu̱ ya ndö har nijö. Gatho'ihu̱ ñ'o̱thu̱ n'a ngu n'a, ne di nhekitho ri hogamu̱ihu̱, ngetho: Jö nto̱xkwi nu'u̱ ya ñ'exte, ne hwëkwa ár mfa̱ts'i nu'u̱ hingya ñ'ets'i. 6Nts'a̱'mhu̱ hár nthandi Jö togo xa ja ár ts'e̱di, ne go da 'ñes'ahu̱ ri nsuhu̱ nú'mu̱ xta zo̱nga ar pa xi beñ'ö. 7Tsokwabihu̱ Jö gatho ri dumu̱ihu̱, nö'ö hingi tsa̱ya̱ su'ahu̱. 8Zo̱t'a xiñho ri da̱hu̱ ne yo gi öthu̱, ngetho ri ñ'u̱nihu̱ ar ts'ondöhi 'yo ngu n'ar 'muhu honi togo da 'ye̱nt'a ár ne. 9No̱xju̱ gi to̱'spabihu̱ xi nze̱ ri jamfihu̱. Gi pöhu̱ nuya thogiyu̱, bí thopya nze̱ye̱ ya ku xo̱ge ár nxidi ar ximha̱i. 10Ne Jö togo ár me̱ti ar nhwëki, bi zokagihu̱ ga 'bu̱hu̱ hár nsunda hingi thege, ngetho di te̱ñhu̱ ar tsi Hmu Hesukristo. Nu xta tho 'ra ya tsi pa gi thohu̱ ya thogi, gese̱'ö da ma̱x'ahu̱ gi 'bu̱hu̱ n'ar m'u̱i xint'axi, da ze̱t'a ri jamfihu̱, da 'ra'ahu̱ ar ts'e̱di, ne da zix'ahu̱ xiñho hár 'ñu'ö. 11Jö go ár me̱ti'ö ar nsunda ne ar ts'u̱t'wi hiñham'u̱ da göts'i. Dá njap'u̱. 12Di pe̱ñ'ahu̱ nunar he̱'minu̱ da hñös'ahu̱ ar ku Silbano, togo di handi n'ar ku o̱ta xiñho ar tsi Hmu. Xta ot'ahu̱ n'a tsi tu̱i, di ne ga hup'a ri mu̱ihu̱, ne di da̱majöni gehnu̱ ár nhwëki Jö nö'ö gi te̱ñhu̱. 13Ar nijö 'bu̱ Mbabilonia, mahye̱gi ngu'ahu̱ xi hwahna Jö, pe̱ñ'ahu̱ ar nze̱ngwa n'ehe. Ar ku Mörko togo po̱ntho ma t'u̱ ze̱ngwa'ihu̱ n'ehe. 14Nze̱ngwahu̱ n'a ngu n'a xa gi mhötehu̱. Gi 'bu̱hu̱ n'ar hogam'u̱i gatho nu'ahu̱ xka nthe̱xu̱ ar tsi Hmu Hesukristo. Dá njap'u̱.

will be added

X\