ÁR NDU̱I AR PEDRO 4

1Ar tsi Hmu Hesukristo bi ze̱ta nuya thogiyu̱ hár ndo'yo, jange pe̱'su̱ nunar mfeninu̱ n'ehe. Ngetho nu'u̱ togo xi tho ya u̱gi hár ndo'yo, xi ñ'ehwi ar ts'oki. 2Nuya pa xi 'ñep'u̱ hinda m'u̱ ngu nese̱, te̱mtho yá ts'onhe ya meximha̱i. Nupya da 'yo̱t'a gatho ngu ne Jö. 3Hye̱hu̱p'u̱ nö'ö ngi o̱thu̱ mi numañho nu'u̱ hingya gamfi. Nu'u̱ 'be̱ngwi ya jö'i, te gatho ne'u̱, xa ya nti, xa ne da 'be̱ yá mfeni ha ya da̱ngo, ne ndönga ya tsita emp'ö, xa xi nts'otho nö'ö o̱t'u̱. 4Nuyu̱ 'yo̱tho hingi ñ'owihu̱ ha yá ts'o'be̱fi, ne theñ'ahu̱. 5Ha ma da da̱twa majöni nö'ö togo xi ñhoki da umbyá mfe̱i nu'u̱ te, ne nu'u̱ xi du. 6Jange xi nsipabi ar hoga mhö nu'u̱ togo xi dupya, ne da tsa̱ da m'u̱'u̱ ngu ar hñö di hñöxkwi Jö, mödi bi hñönga ar ndöte ngu ar njut'i ar ts'oki tho gatho ya jö'i. 7Nö'ö ar pa da göxa xo̱ge, 'ba̱p'u̱tho da zo̱ho̱. Jange hyanthu̱ xiñho tema gi pe̱hu̱, ne ndö'mhu̱ hingi tsa̱ya̱hu̱ gi zohu̱ Jö. 8Ne gi umba ri mu̱ihu̱ m'e̱t'o xa gi mhöhu̱ n'a ngu n'a, ngetho ar mhöte punga nze̱ye̱ ya ts'oki. 9Gi nethohu̱ gi uñhu̱ ar tsa̱ya̱ n'a ngu n'a. 10Ngu yá hoga 'be̱go'ihu̱ xi t'e̱nt'a ha ri 'ye̱hu̱ nuya nze̱ye̱ ya hogant'uni unga Jö, jafu̱ da mpe̱ ha yá m'u̱i ma'ra ngu ar nt'uni xi nhwëk'ahu̱. 11Nu'mu̱ ja n'a togo ñö, dá ñö ngu mönga ár mhö Jö. Ha nu'mu̱ ja n'a togo pe̱pa ma'ra, dá 'yo̱t'e ngu ár döta ár ts'e̱di Jö xi thembabi. Ne njap'u̱ gatho nö'ö gi pe̱hu̱ da nsundabi Jö, ngetho gi pe̱fu̱ ar tsi Hmu Hesukristo. Jö ár me̱ti ar nsunda ne ar ts'u̱t'wi hiñham'u̱ da göts'i. Dá njap'u̱. 12Ma tsi hmöka kuhu̱, yo gi tu ri mu̱ihu̱ nu'mu̱ xta ep'u̱ ya thogi, ne da zu̱'ahu̱ ngu n'ar tsibi da tsa̱t'ahu̱ ri ñ'emu̱ihu̱. Yo ma gi 'yo̱hu̱ xta ep'u̱ gathoyu̱. 13Nö'ö gi 'yo̱thu̱, njohyahu̱ ngetho gi thohu̱ n'a tsi tu̱i ya u̱gi ngu bi tho ar tsi Hmu Hesukristo, ne nú'mu̱ xta nheki ár nsunda xa ma gi njohyahu̱. 14Nu'mu̱ nt'u̱tsa'ihu̱ ngetho gi te̱ñhu̱ ar tsi Hmu Hesukristo, xa nza̱tho'ö, njap'u̱ nheki gi 'bu̱hwihu̱ ár Hñö Jö. Majöni nu'u̱ tsani, ha nu'ahu̱ gi nsundabihu̱ ha ri m'u̱ihu̱. 15Yo ma gi thohu̱ ya thogi ngetho gar hyotehu̱, gar bëhu̱, gar ts'oktehu̱, wa gi ñ'öxtehu̱ tengu yá m'u̱i ma'ra. 16Ha nu'mu̱ gi thohu̱ ya thogi ngetho xka ñ'emu̱ihu̱, yo ma gi ntsa̱hu̱. Nsundabihu̱ Jö gi thohu̱yu̱. 17Ngetho bi zo̱ ar pa da nja ár mfe̱i Jö, ne ma da du̱'ma m'e̱t'o hár nijö. Ha nu'mu̱ xi ndu̱i xi gu̱tka ma guhu̱, tema ngöts'i to̱'ma nu'u̱ hinxi ñ'emu̱i ár hoga mhö Jö. 18Ne enga har T'ofo n'ehe: Nu'mu̱ xa xi ñhembi da mpo̱ho̱ n'ar hogajö'i, habu̱ di gohmö nö'ö hingi benga Jö, ne ar ts'okte 'mu̱. 19Jange nu'u̱ togo gi thohu̱ ya thogi ngu ne Jö, 'ye̱nt'athohu̱ ri tehu̱ ha yá 'ye̱ ar tsi Dada togo bi hyogagihu̱, ne xa gi umba ri mu̱ihu̱ gi 'yo̱thu̱ ar ñho.

will be added

X\