ÁR NDU̱I AR PEDRO 3

1Di zo'ahu̱ nu'ahu̱ gar 'be̱hñöhu̱ n'ehe, gi 'yo̱thu̱ ri dömehu̱, ne njap'u̱ nu'mu̱ togo hinxi ñ'emu̱i, da hñönga ár mhö Jö hant'ahu̱ ri hogam'u̱ihu̱, hinge mahyoni gi zohu̱. 2Ho̱nse̱ da hyant'a ri hogam'u̱ihu̱ xint'axi ne gi tsufu̱ Jö. 3Nuna ri ñhokihu̱, hinge xa gi hyoñhu̱ nö'ö oxta mañö xa di thotho gi ñhoju̱. Yo xa gi ñho̱xu̱ ya hwe̱xkabo̱jö, ne hingi hyehu̱ ya he gi ñ'exu̱. 4Hyoñhu̱ nö'ö di 'ñe mbo ri mu̱ihu̱. Nunar ñhokinu̱ hiñham'u̱ da thege. Gi umba ri mu̱ihu̱ gi 'bu̱hu̱ n'ar hogam'u̱i, ne gi 'yo̱thwu̱ ar ñho ma'ra. Gehnu̱ numañho Jö. 5Ngetho njap'u̱ mi ñhoka maham'u̱ nu'u̱ ya tsi 'be̱hñö mi 'bu̱ n'ar m'u̱i xint'axi. Ne mi to̱'mba ár mfa̱ts'i Jö, mi o̱ta gatho nö'ö mi xipa yá döme. 6Jangu ar Sara mi o̱ta ar Abra, ne mi embabi ár hmu. Ha nu'ahu̱ xka ehu̱ di bo̱ni yá t'inxu'ihu̱, nu'mu̱ gi 'yo̱thu̱ ar ñho ne hiñ'otho te gi tsuhu̱. 7Di zo'ahu̱pya nu'ahu̱ gar dömehu̱, 'bu̱hwihu̱ ri 'be̱hñöhu̱ gi pe̱'su̱ n'ar döta mfödi, ne gi umfu̱ ar nsu di 'ñepi, ngetho hints'u̱ nze̱ye̱ yá ts'e̱di. Beñhu̱ gehnu̱ ri ñ'owihu̱ gi hñöngwi mahye̱gi yá njöpi Jö, ne njap'u̱ hinte di ja te da k'a'sa da t'a'ahu̱ nö'ö gi a̱fu̱ Jö. 8Hár ngöts'i di xi'ahu̱ gi beñhu̱ n'adar mfeni, di ko ri mu̱ihu̱ gi mhöhu̱ ngu ya tsi ku, gi pe̱'su̱ ar nhwëki ne gi ntsixkwihu̱ gatho. 9Yo gi ko'spabihu̱ yá ñöni togo o̱t'ahu̱ ar ts'oki, ne hingi ntsa̱nts'aniwi ma'ra. Nö'ö gi 'yo̱thu̱, te̱twathohu̱ Jö, ngetho xi ts'oñ'ahu̱ da t'a'ahu̱ ar njöpi. 10Ngetho ngu enga har T'ofo: Nö'ö togo ne da mö ár te, ne da hyanda ya hoga pa, hinda hye̱ ár ne da mönga nö'ö hingi ho, ne hinda hye̱gi da mönga ya nhemhñö. 11Dá hye̱ ar ts'oki ne da 'yo̱t'a nö'ö xiñho. Da hyonga ar hogam'u̱i, ne xta dini hinda hye̱gi. 12Ngetho ar tsi Hmu handa xiñho nu'u̱ pe̱'sa n'ar m'u̱i xint'axi, ne o̱xtho to̱'mi tema da 'ya̱pabi. Ne 'bu̱tho da umba yá mfe̱i nu'u̱ togo hingi o̱t'a xiñho n'ehe. 13Ha nu'mu̱ gi o̱thu̱ nö'ö xiñho, togo tsa̱ te da ja'ahu̱ 'mu̱. 14Ne nu'mu̱ ja te da nja'ahu̱ ngetho gi o̱thu̱ xiñho, nza̱tho'ö. Yo gi jafu̱masu ne da pi'ahu̱, ne hingi tu ri mu̱ihu̱. 15Nö'ö gi pe̱hu̱, nsundahu̱ Jö ar tsi Hmu ha ri mu̱ihu̱. Ne hyax'mu̱ gi 'bu̱hu̱ xka ñhoju̱ gi thöthu̱, hingi ñ'exu̱ ne di 'be̱nga nt'ek'ei nu'u̱ togo a̱ñ'ahu̱ teme di bo̱nga ri ndo̱'mihu̱ gi pe̱'su̱. 16'Bu̱hu̱ hinte di tsu̱'a ri mfenihu̱. Ne njap'u̱ nu'u̱ ju̱s'ahu̱ ri 'bedehu̱ enö gar ts'oktehu̱, da 'be̱ yá tsa̱ xta nu hingi njap'u̱. Xta nu'ahu̱ gi pe̱'su̱ n'ar hogam'u̱i, ngetho gi 'bu̱hwihu̱ ar tsi Hmu Hesukristo. 17Xiñho'ö nu'mu̱ gi thohu̱ ya thogi ngetho gi o̱thu̱ nö'ö xiñho, nu'mu̱ njap'u̱ ne ar tsi Hmu, hinge gi thohu̱ ya thogi ngetho gi o̱thu̱ ya ts'oki. 18Nunar tsi Hmu Hesukristo bi tho n'agitho ar ndöte, njap'u̱ bi hñöga ma ts'okihu̱. Ar hogajö'i bi unga ár te bi po̱kagihu̱ nuju̱ xta o̱thu̱ ya ts'oki, ne da zixkagihu̱ ma ga 'bu̱hwihu̱ Jö. Majöni bi du ár ndo'yo, ha nu ár hñö himbi du, po̱ntho bi mengi bi nte nú'mu̱ mi nanga man'agi ár ndo'yo. 19Nunár hñö bi ma ba humbyá hmi nu'u̱ yá hñö ya jö'i bi jot'i. 20Nu'u̱ maham'u̱ himbi ne bi 'yo̱de, hangu bi do̱'mahmö Jö, gatho ya pa bi zi'spa ar Noe bi hyoka ar motsa. Himbi k'ont'a nze̱ye̱ ya jö'i, ho̱nse̱ hñöto bi bongi nda jöt'a har dehe. 21Nunar dehenu̱ bi ñu'sa ar ximha̱i, ñhe̱hwi ar xixthe nuya payu̱. Nunar xixthenu̱, hinge di nehu̱ ga xu̱ju̱ ma ndo'yohu̱. Gehnu̱ n'ar nt'udi di uñhu̱ hár nthandi Jö hinte tsu̱ka ma mfenihu̱, ne xta mpo̱hu̱. Gathonu̱ xta höñhu̱ ngetho bi mengi bi nte ar tsi Hmu Hesukristo. 22Gehnu̱ mi wadi bi bo̱xa mhets'i, bi hñuxa hár ñ'e̱i Jö. Ne gatho ya e̱nxe̱, ya ndö ne ya ts'u̱t'wi o̱ta nö'ö möñ'ö.

will be added

X\