ÁR NDU̱I AR PEDRO 2

1Jange hye̱hu̱ n'agitho gatho ya ts'oki, ya nhemhñö, nö'ö gi yot'a ri hmihu̱, ya hyo̱kte, ne ya 'yonga 'bede. 2Xa gi hyoñhu̱ ngu n'ar tsi t'u̱lo bötsi ar 'ba di 'ñe mhets'i hinte xi nthönts'i. Njap'u̱ gi tehu̱ xiñho ne gi pe̱'su̱ ar mpo̱ho̱. 3'Yo̱thu̱ njap'u̱ ngetho xka pöthwu̱ ár nhwëki ar tsi Hmu. 4Kwathu̱ gi hyoñhu̱ ar tsi Hmu Hesukristo, togo ngu n'ar do pe̱'sa ar te. Mödi nunar donu̱ bi zanda nu'u̱ togo mi ho̱ ar ngu, ha Jö go bi hyandi ngu n'ar do xi thahni ne nza̱tho. 5Gi njahu̱p'u̱ n'ehe, di hñöx'ahu̱ ar do hö ar te, n'a ngu n'a gi jafu̱ da he'sa ár nijö Jö. Ne di hñöx'ahu̱ ar möjö pe̱'sa n'ar m'u̱i xint'axi, gi e̱nt'a ri tehu̱ ngu n'ar m'o̱ñho̱ numañho Jö, gi hömfu̱ ár ts'e̱di ar tsi Hmu Hesukristo. 6Jange enga har T'ofo: Pöhu̱ di exnu̱ Nsion ar mu̱dido du̱'ma ar jödo xi thahni nza̱tho. Nu'u̱ togo da ñ'emu̱ibi, hinda ma da 'be̱ ár tsa̱. 7Jange nu'ahu̱ xka ñ'emu̱ihu̱, gi hanthu̱ nza̱tho'ö. Ha nu'u̱ togo hinxi ñ'emu̱i, ngu enga har T'ofo: Nunar do bi zanda ya ho̱ngu, nupya ar mu̱dido du̱'mba ár jödo ar ngu. 8Ne enö n'ehe: Gehnu̱ ar do da japi da fe'sa yá wa ne da hwangi. Ngetho nthe̱wi ar mfets'e hár mhö Jö, gehyu̱ ya me̱'sku. Njap'u̱ xki thuts'i nda njap'u̱'u̱. 9Ha nu'ahu̱ yá bötsi'ihu̱ Jö xi hwañ'ahu̱, yá möjö'ihu̱ ar ndö mhets'i. Go ge'ahu̱ ár hnini Jö 'bu̱ xint'axi, ne ár me̱ti'ihu̱'ö. Gese̱'ö bi hwañ'ahu̱ gi xifu̱ ma'ra tengu ár ts'e̱di ne ár nsunda nö'ö togo bi zo'ahu̱ ngi po̱ñhu̱ har 'be̱xui, ne gi 'bu̱hu̱pya har hoga hyats'i xa nza̱tho. 10Maham'u̱ hinge ngar hnini'ihu̱ Jö, ha nupya hö, yá hnini'ihu̱'ö. Maham'u̱ hinge ngi pe̱'sfu̱ ár nhwëki'ö, ha nupya hö, xka hñömfu̱ ár nhwëki. 11Tsi kuhu̱, di zo'ahu̱ ngu ya nzo̱ho̱ ne ngu ya ne'ñu. Di xi'ahu̱ gi hye̱hu̱ nuya te gatho ne ri ndo'yohu̱, gehyu̱ nto̱xkwi nö'ö ne ri mu̱ihu̱. 12'Bu̱hu̱ n'ar hogam'u̱i madeda nu'u̱ togo hinxi jamfi, mödi 'yomp'a ri 'bedehu̱ eñ'u̱ xi nts'otho nö'ö gi o̱thu̱. Ne xta ep'u̱ ar tsi Hmu Hesukristo, ma da nsundabi Jö xta xo yá da̱, da bö'u̱ mar ñho nö'ö ngi o̱thu̱. 13Ngetho gi jamfihu̱ ar tsi Hmu, 'yo̱thu̱ gatho nu'u̱ togo pe̱'sa n'ar nsu. 'Yo̱thu̱ ar ndö xi t'exa mañö, 14ne gatho yá ma̱xte, ngetho xi m'e̱hni da umbya mfe̱i ya ts'okte, ne da 'ñe'spa yá nsu nu'u̱ o̱t'a xiñho. 15Ne Jö gi 'yo̱thu̱ xiñho, ne njap'u̱ gi kothwu̱ yá ne nu'u̱ ya jö'i hingi numañho nö'ö di pe̱hu̱. 16'Bu̱hu̱ wande hinto su'ahu̱, ho̱nse̱ hingi jahu̱ gi ne gi 'yo̱thu̱ nö'ö hingi ho. 'Yohu̱ ngu yá 'be̱go'ihu̱ ar tsi Dada. 17'Ñe'sfu̱ ár nsu gatho. Möhu̱ ya tsi ku. Tsufu̱ Jö. 'Ñe'sfu̱ ár nsu ar ndö n'ehe. 18'Be̱gohu̱, pe̱'su̱ n'ar hogamu̱i gi 'yo̱thu̱ ri hmuhu̱. Hinge ho̱nse̱ nu'u̱ togo ya hogajö'i, 'yo̱thu̱ nu'u̱ xi ñhembi gi tse̱thu̱ n'ehe. 19Jö handa xiñho nu'u̱ tho ya mfe̱i hindi 'ñepabi, nuya thogi tse̱ti, o̱t'e da gohwi xiñho Jö. 20Tema ñho gi ju̱ju̱ nu'mu̱ gi tse̱thu̱ ar mfe̱i ngetho xka nts'oju̱. Ha nu'mu̱ gi thohu̱ ar mfe̱i ngetho gi o̱thu̱ nö'ö xiñho, njap'u̱ hö, hant'ahu̱ xiñho Jö. 21Xi ts'oñ'ahu̱ gi tse̱thu̱; ngetho ar tsi Hmu Hesukristo go bi tho'ö ya thogi ma nga thohu̱hmö, ne njap'u̱ bi utkagihu̱ ár m'u̱i ga te̱ñhu̱. 22Nö'ö hinte ma ts'oki bi 'yo̱t'e, ne hinte mar nhemhñö bi bo̱nga hár ne. 23Núm'u̱ mi ts'ani, himi ko'sa ar nts'ani. Núm'u̱ mi tho ya u̱gi, hinge mi xipabi nda njapabip'u̱ n'ehe. Mi tsokwa gatho hár 'ye̱ nö'ö togo o̱t'a ar hoga ts'u̱t'wi. 24Gese̱ bi hñöska ma ts'okihu̱ hár ndo'yo nú'mu̱ mi ts'u̱ta har pont'i, ne njap'u̱ nu'u̱ di 'bu̱hu̱, hinte tsa̱ te da jaju̱ ar ts'oki. Nupya ga 'bu̱hu̱ ga o̱thu̱ nö'ö xiñho. Bi tho ar u̱gi'ö, ne njap'u̱ gi pe̱'su̱ ar nzaki. 25Ngetho ngi ñhe̱hwihu̱ 'ra ya tsi de̱ti xki mfont'i, ha nupya xka penju̱ xka tsu̱hu̱ ar ma̱'yo su'a ri tehu̱.

will be added

X\