ÁR NDU̱I AR XUWA 5

1Gatho nu'u̱ togo ñ'emu̱i ar tsi Hmu Hesu ngu ar Kristo, gehnu̱ n'ár bötsi Jö. Ne gatho nu'u̱ togo mö ar dada, mötwa yá bötsi n'ehe. 2Njanu̱ di pöhu̱ di möthwu̱ yá bötsi Jö, nu'mu̱ di möhu̱'ö ne di o̱thwu̱ nö'ö xi 'be̱pkagihu̱. 3Nu'mu̱ xa majöni di möhu̱ Jö, ga o̱thwu̱ nö'ö xikagihu̱ 'mu̱, ne nö'ö 'be̱pkagihu̱ hingi hembi ga o̱thu̱. 4Ngetho gatho nu'u̱ togo yá bötsi Jö, ho̱maha̱i ar ximha̱i, ne ar ñ'emu̱i gehnu̱ tö ar ximha̱i. 5Nu'u̱ ñ'emu̱i ar Hesu ár T'u̱ Jö, gehyu̱ xi dö ar ximha̱i. 6Ar tsi Hmu Hesukristo ba ekwa har ximha̱i, bi ñ'udi har dehe ne har ji. Hinge ho̱nse̱ har dehe, har ji n'ehe. Ne ár Hñö Jö da̱majöni, ngetho nunu̱ mönga majöni. 7Ngetho hñu nu'u̱ togo da̱majöninu̱ mhets'i: ar Dada, ar Mhö, ne ár Hñö Jö. Gatho hñuyu̱ n'atho. 8Ne njap'u̱ hñu nu'u̱ togo da̱wa majöni har ximha̱i: ár Hñö Jö, ar dehe ne ar ji. Gatho hñuyu̱ n'at'wu̱ mö. 9Nu'mu̱ di ñ'emu̱ibihu̱ nö'ö da̱majöni ya jö'i, Jö töte ga ñ'emu̱ibihu̱, ne gese̱nu̱ xi da̱majöni togo ár T'u̱. 10Nö'ö togo ñ'emu̱ibi ár T'u̱ Jö, pe̱'sase̱ hár mu̱i nö'ö xi da̱majöni Jö. Ha nö'ö togo hinxi ñ'emu̱i, ho̱xa Jö ar nemhñö, ngetho himbi ñ'emu̱ibi nö'ö xi da̱majöni togo ár T'u̱. 11Ne go gehnu̱ ar mhö xi da̱majöni: Jö xi 'raju̱ ar te hiñham'u̱ da göts'i, ne nunar tenu̱ go unga ár T'u̱. 12Nö'ö togo pe̱'spa ár T'u̱ Jö hár mu̱i, pe̱'sa ar te hiñham'u̱ da göts'i. Ha nö'ö togo hingi pe̱'spa ár T'u̱, hingi to̱'ma ar te hiñham'u̱ da göts'i. 13Di ot'ahu̱ nuya mhöyu̱, di xi'ahu̱ nu'ahu̱ gi ñ'emu̱ibihu̱ ár T'u̱ Jö, njap'u̱ gi pöhu̱ gi pe̱'su̱ ar te hiñham'u̱ da göts'i. 14Gehnu̱ ar ñ'emu̱i di pe̱'spabihu̱, nu'mu̱ ga a̱fu̱ ngu ne'ö, da 'yo̱xkagihu̱. 15Ha nu'mu̱ di pöhu̱ da 'yo̱xkagihu̱ nö'ö di a̱pabihu̱, nu'mu̱ di ñ'emu̱ihu̱ gatho nö'ö xta a̱fu̱, da 'raju̱. 16Nö'ö togo da hyanda ár ku da 'yo̱t'a n'ar ts'oki hinge nuya da 'be̱ ár te, dá 'ya̱pa Jö, ne nunu̱ hinda hye̱gi da m'e̱di, ho̱nse̱ nu'mu̱ ar ts'oki hinda thökwa ár te. Ja ya ts'oki di 'ñepa ar ndöte, nuyu̱ hindi enö da t'a̱pa Jö da ma̱ts'i. 17Mödi gatho nö'ö hingi ho, ar ts'oki, hinga gatho di 'ñepa ar ndöte. 18Di pöhu̱ gatho nu'u̱ togo 'bu̱hwi Jö ngu ár Dada, hingi 'bu̱ har ts'oki, ngetho ár T'u̱ Jö su, ne ar ts'ondöhi hinte tsa̱ te da japabi. 19Di pöhu̱ n'ehe, nuju̱ yá me̱tigihu̱ Jö, ha gatho nuya meximha̱i o hár 'ye̱ ar ts'ondöhi. 20Ne di pöhu̱ nunár T'u̱ Jö xpa e xi 'raju̱ ar hoga mfeni, ne njap'u̱ ga pöhu̱ Jö togo majöni. Gehnu̱ di 'bu̱hwihu̱, ár T'u̱ Hesukristo, nunar Jö majöni togo unga ar te hiñham'u̱ da göts'i. 21Ma tsi bötsi'ihu̱, yo gi ndöñhu̱ ya tsita emp'ö. Dá njap'u̱.

will be added

X\