ÁR NDU̱I AR XUWA 4

1Tsi hmöka kuhu̱, yo gi jamfibihu̱ gatho nu'u̱ togo ñö. Hyanthu̱ m'e̱t'o ha hömpa ár Hñö Jö wa hin'ö, ngetho nze̱ye̱ ya kate m'e̱hni xi nxanga har ximha̱i. 2Njanu̱ ma gi pöhu̱ ha hömpa ár Hñö Jö wa hin'ö: Gatho nu'u̱ enö, ar tsi Hmu Hesukristo ba e bi njö'i, xi me̱hna Jö. 3Ne gatho nuya ko̱nga ar tsi Hmu Hesukristo ba e bi njö'i, hingo xpa pe̱hna Jö. Nunu̱ ár me̱ti ár ñ'u̱ni ar tsi Hmu xka 'yo̱hu̱ nda ehe, ne di xi'ahu̱ 'bu̱kwapya har ximha̱i. 4Ma tsi bötsi'ihu̱, yá me̱ti'ihu̱ Jö xka ntötehu̱, ngetho nö'ö togo 'bu̱ ha ma mu̱ihu̱ töpa ár ts'e̱di nö'ö togo 'bu̱kwa har ximha̱i. 5Nuyu̱ ya meximha̱itho ne mönga gatho nö'ö te jawa, ha nuyá mimeximha̱iwi o̱xa nö'ö te möñ'u̱. 6Nuju̱ yá me̱tigihu̱ Jö, nu'u̱ togo pö Jö o̱xa nö'ö di xifu̱. Ne nu'u̱ hingyá me̱ti Jö hingi o̱xa nö'ö di xifu̱. Njap'u̱ di pöhu̱ togo mönga majöni ne togo mönga ar nhemhñö. 7Ma tsi hmöka kuhu̱, ma ga nmhöhu̱ n'a ngu n'a, ngetho ar mhöte gor me̱ti Jö, ne gatho nu'u̱ möte gehyu̱ yá bötsi Jö, ne pödi togo'ö. 8Nö'ö togo u̱tsa ár ku, hinxi bö Jö, ngetho Jö xa möte. 9Njanu̱ bi utkagihu̱ Jö, go ba pe̱nkwa har ximha̱i nö'ö n'ase̱ ár T'u̱, bi du, ne njap'u̱ bi 'raju̱ ar 'ra'yo te. 10Ma ga xi'ahu̱ ndana ar mhöte majöni: Nuju̱ hinge da möhu̱ Jö, go bi mökagihu̱. Jange ba pe̱hna ár T'u̱ bi unga ár te ngu n'ar m'o̱ñho̱, ne njap'u̱ xi mpumgagihu̱ ma ts'okihu̱. 11Ma tsi hmöka kuhu̱, nu'mu̱ Jö bi mökagihu̱ njap'u̱, ma ga nmhöhu̱ n'a ngu n'a n'ehe. 12Hinto xi hyanda Jö, ha nu'mu̱ ga nmhöhu̱ n'a ngu n'a, gese̱'ö 'bu̱ ha ma mu̱ihu̱, ne ár mhöte xi nxo̱ge ha ma mu̱ihu̱. 13Di pöhu̱ di 'bu̱hwihu̱, ngetho xi 'rakagihu̱ ár Hñö. 14Ha nuje xta hanthe ne di da̱he majöni, Jö ar Dada xpa pe̱hna ár T'u̱, gehnu̱ ár Po̱ho̱te ya meximha̱i. 15Gatho nu'u̱ togo da̱majöni ar Hesu ár T'u̱ Jö, nuyu̱ 'bu̱hwi Jö. 16Ne nuju̱ xta pöhu̱ ne xta jamfihu̱ nunar mhöte pe̱'skagihu̱ Jö. Jö xa möte, ne gatho nu'u̱ togo möte 'bu̱hwi Jö. 17Njap'u̱ xi ñuxa ár mhöte ha ma mu̱ihu̱, ne nu xta göxa ar ximha̱i ga njohyahu̱ hinga ntsuhu̱, ngetho di hñöxkagihu̱'ö di 'bu̱hu̱wa har ximha̱i. 18Nu'mu̱ xa majöni di pe̱'su̱ ar mhöte, hiñ'otho ar ntsu, ngetho ar mhöte majöni höka ar ntsu. Nö'ö togo ntsu, tsupa ár mfe̱i Jö, ne hinxi ñuxa ár mhöte hár mu̱i. 19Nuju̱ di möhu̱ Jö, ngetho m'e̱t'o bi mökagihu̱'ö. 20Nu'mu̱ da 'ñenga n'a: Nuga di mö Jö, ha u̱tsa ár ku, n'ar nemhñö'ö. Ngetho nu'mu̱ hingi mö ár ku togo handi, hanja da mö Jö togo hinxi hyandi. 21Di pe̱'su̱ nunar 'be̱patenu̱ xi 'rakagihu̱ Jö: Nö'ö togo mö Jö, mahyoni da mö ár ku n'ehe.

will be added

X\