ÁR NDU̱I AR XUWA 3

1Beñhu̱ tengu xi mökagihu̱ Jö, bi 'ñengagihu̱ yá bötsigihu̱. Jange nu'u̱ togo hingi jamfi, hingi pöju̱, ngu himbi bö'ö. 2Ma tsi kuhu̱, nupya yá bötsigihu̱ Jö, mödi hindi pöthu̱ xiñho tengu nor m'u̱i ma ga pe̱'su̱ m'e̱fa. Nö'ö di pöhu̱ hö, nú'mu̱ xta ep'u̱, ma ga ñhe̱hwihu̱ ngetho ma ga hanthu̱ tengu'ö. 3Ne gatho nu'u̱ togo di to̱'mhu̱ da njap'u̱, hyax'mu̱ di umba ma mu̱ihu̱ da t'axkagihu̱ ngu xint'axi'ö. 4Gatho nu'u̱ togo o̱t'a ya ts'oki, ts'okwa yá 'be̱pate Jö, ngetho n'ar ts'oki hinda 'yo̱ta ya 'be̱pate. 5Ne gi pöhu̱ xiñho, ar tsi Hmu ba ekwa bi hñögagihu̱ ma ts'okihu̱, ne nö'ö hinte ma ts'oki bi 'yo̱t'e. 6Gatho nu'u̱ togo 'bu̱hwi ar tsi Hmu, hingi o̱t'a ya ts'oki. Ha nu'u̱ o̱t'atho ya ts'oki, hinxi hyandi ne hinxi bö'ö. 7Ma tsi bötsi'ihu̱, yo ma gi ñhe̱hu̱ togo da hya̱'ahu̱. Pöhu̱ nunar tsi Hmu ar hogajö'i, ne nö'ö togo ne da ñhogajö'i, te̱mbatho ár m'u̱i'ö. 8Nö'ö togo o̱t'a ya ts'oki, ár me̱ti ar ts'ondöhi, ngetho ar ts'ondöhi hár ndu̱itho o̱t'a ya ts'oki. Jange ba e ár T'u̱ Jö da jö'spa ár 'be̱fi ar ts'ondöhi. 9Gatho nu'u̱ togo xi hñönga ar 'ra'yo te unga Jö, xi ñ'ehwi ar ts'oki, ngetho di hñöxa Jö ar Dada. Hingi tsa̱ da gohnu̱tho har ts'oki, ngetho xi umba ár te ar tsi Dada. 10Njanu̱ nheki togo yá bötsi Jö ne togo yá bötsi ar ts'ondöhi: Gatho nu'u̱ togo hingi o̱t'a nö'ö xiñho ne hingi mö ár ku, hingyá bötsi Jö. 11Ngetho gehnu̱ ar mhö xka 'yo̱hu̱ ya maham'u̱: Ga nmhöhu̱ n'a ngu n'a. 12Hinga njahu̱ ngu ar Kain, mi te̱nga ar ts'ondöhi ne bi hyo ár jödö. Bi hyonu̱ ngetho mar nts'oda ár 'be̱fise̱, ha nuyá 'be̱fi ár jödö mar ñho. 13Ma tsi kuhu̱, yo gi tu ri mu̱ihu̱ nu'mu̱ da u̱tsa'ihu̱ nu'u̱ hingya gamfi. 14Nuju̱ di pöhu̱ xta po̱ñhu̱ har ndöte ndi 'bu̱hu̱, ne xta thohu̱ har te, ngetho di möhu̱ ma kuhu̱. Nu togo hingi mö ár ku, po̱ntho xi du. 15Gatho nu'u̱ togo u̱tsa ár ku, gehnu̱ ar hyote. Ne di pöhu̱ nuya hyote hingi pe̱'sa ar te hiñham'u̱ da göts'i. 16Ar tsi Hmu Hesukristo bi utkagihu̱ ndana ar mhöte majöni nú'mu̱ mi po̱kagihu̱ bi unse̱ ár te. Nuju̱ n'ehe ga e̱nthu̱ ma tehu̱ ga homfu̱ yá ñho ma kuhu̱. 17Nu'mu̱ n'a togo pe̱'sa ya ñho, ne handa ár ñ'ohu̱ hinte pe̱ts'i, ne hinte da umbabi, hanja da nheki pe̱'spa ár mhöte Jö 'mu̱. 18Ma tsi bötsi'ihu̱, hinge ma ga mhöhu̱ di oxta mañö. Ma ga ñ'u ma mhötehu̱ di o̱thwu̱ ar ñho ma kuhu̱ di po̱nga ha ma mu̱ihu̱. 19Njap'u̱ di pöhu̱ tsixkagihu̱ nö'ö majöni, ne hinte di tuka ma mu̱ihu̱ hár nthandi Jö. 20Ha nu'mu̱ tsu̱ka ma mu̱ihu̱ xikagihu̱ hindi 'bu̱hu̱ xiñho hár nthandi'ö, Jö töpa ár mfödi ma mu̱ihu̱, ne pö gatho. 21Ma tsi hmöka kuhu̱, nu'mu̱ hingi tsu̱ka ma mu̱ihu̱, hinga ntsuhu̱ ga 'bu̱hu̱ hár nthandi Jö. 22Ne gatho nö'ö te ga a̱fu̱, ga höñhu̱, ngetho di o̱thwu̱ yá 'be̱pate, ne di pe̱hu̱ nö'ö numañho'ö. 23Ne go gehnu̱ ár 'be̱pate Jö, ga jamfibihu̱ ár T'u̱ Hesukristo, ne ga nmhöhu̱ n'a ngu n'a, jangu xi 'be̱pkagihu̱. 24Nö'ö togo o̱ta ngu xi 'be̱pkagihu̱ Jö, 'bu̱hwi'ö. Di pöhu̱ xiñho di 'bu̱hwihu̱, ngetho xi 'rakagihu̱ ár Hñö.

will be added

X\