ÁR NDU̱I AR XUWA 2

1Ma tsi bötsi'ihu̱, di ot'ahu̱ nunar he̱'minu̱, ngetho hindi ne gi nts'oju̱. Ha nu'mu̱ bi hya̱'ahu̱, di 'ñehu̱ togo ñöngagihu̱ hár nthandi Jö. Gehnu̱ ar Hesukristo ngu ma ñöntehu̱, hinte ma ts'oki xi 'yo̱t'e. 2Bi unse̱ ár te ngu n'ar m'o̱ñho̱, ne bi mpumgagihu̱ gatho ma ts'okihu̱. Hinge ho̱nse̱ nuju̱, gatho nu ma'ra 'bu̱kwa har ximha̱i n'ehe. 3Njanu̱ da nhekitho ha di pöhu̱ Jö wa hin'ö, nu'mu̱ di o̱thu̱ nö'ö te 'be̱pkagihu̱. 4Nu'mu̱ n'a togo da 'ñenö: Nuga di pö ar tsi Hmu, ne hingi o̱t'a nö'ö xi 'be̱pkagihu̱ Jö, n'ar kate ne hingi pe̱'sa nö'ö majöni hár mu̱i. 5Ha nö'ö togo da 'yo̱t'a nö'ö xi 'be̱pkagihu̱, majöni xi ñuxa ár mhöte Jö hár mu̱i. Njap'u̱ hö, di pöhu̱ di 'bu̱hwihu̱'ö. 6Nö'ö togo enö hyax'mu̱ 'bu̱hwi Jö, mahyoni da m'u̱i ngu bi m'u̱ ar tsi Hmu Hesukristo. 7Tsi kuhu̱, hindi ot'a n'ar 'ra'yo 'be̱pate ga pe̱ñ'ahu̱, ho̱nse̱ di bemp'ahu̱ nö'ö xki nsi'ahu̱ har ndu̱i. Nunar 'be̱patenu̱ get'ö ngu nuna xka 'yo̱hu̱. 8Mödi hö, ma ga xi'ahu̱ n'ar 'ra'yo 'be̱pate gehnu̱ majöni, bi ñ'u'ö ne nupya di 'ñuhu̱ n'ehe. Ngetho ar 'be̱xui ma da thogi, ne nunar ñot'i majöni fu̱di ungar hyats'i. 9Nö'ö togo enö 'bu̱ har hyats'i ne u̱tsa ár ku, 'bu̱ta har 'be̱xui'ö. 10Nö'ö togo mö ár ku, hyax'mu̱ 'bu̱ har hyats'i, ne hinda ma da nthe̱wi ar mfets'e. 11Ha nö'ö togo u̱tsa ár ku, 'bu̱ta har 'be̱xui ne ja 'yonu̱tho. Ne hingi pödi habu̱ di ma, ngetho ar 'be̱xui hingi he̱gi da hyandi. 12Ma tsi bötsi'ihu̱, di pe̱ñ'ahu̱ nunar he̱'minu̱, ngetho hár thuhu ar tsi Hmu Hesu xi mpump'a ri ts'okihu̱. 13Di ot'ahu̱ dadahu̱, ngetho gi pöhu̱ nö'ö togo mi 'bu̱i nú'mu̱ hinte mi otho. Di ot'ahu̱ bötsithohu̱, ngetho xka töhu̱ ar ts'ondöhi. 14Xta ot'ahu̱ dadahu̱, xka pöhu̱ nö'ö togo mi 'bu̱i nú'mu̱ hinte mi otho. Xta ot'ahu̱ gi bötsithohu̱, ngetho xka ze̱ta ri jamfihu̱, ne xka töhu̱ ar ts'ondöhi ga te̱ñhu̱ ár mhö Jö xka kwathu̱ ha ri mu̱ihu̱. 15Yo gi möhu̱ ar ximha̱i ne nuya te jawa. Nu togo mö ar ximha̱i, hingi pe̱'spa ár mhöte Jö ar Dada. 16Ngetho gatho nö'ö te ja har ximha̱i, ngu ya ts'onhe benga ya jö'i ne handi, ne ar ñ'ets'i, hingi pe̱hna Jöyu̱, go unga ar ximha̱i. 17Ar ximha̱i ne yá ts'onhe ma da thotho, ha nu'u̱ togo o̱t'a nö'ö ne Jö, ma da m'u̱ n'ar m'u̱i hiñham'u̱ da göts'i. 18Ma tsi bötsi'ihu̱, di 'bu̱hu̱pya ya ngöxapa. Ngu xka 'yo̱hu̱ ma nda e n'a togo nda nto̱xkwi ar tsi Hmu Hesukritso, ne nupya ja nze̱ye̱ togo nto̱xkwi. Jange di pöhu̱ xi zo̱ ya ngöxapa. 19Xi 'wege xi hye̱ju̱, ngetho hinxki jamfi xiñho ngu xta jamfihu̱. Nu'mu̱ xi jamfihmö xiñho'u̱, hinxi 'wehmö'u̱. Ne xi 'wege, njapu̱ da nheki hinga gatho nguju̱ di n'at'wihu̱ ar tsi Hmu. 20Ha nu'ahu̱ hingi njahu̱p'u̱, ngetho xi t'a'ahu̱ ár Hñö Jö, jange gi pöhu̱ xiñho gathoyu̱. 21Hindi pe̱ñ'ahu̱ nunar he̱'minu̱ ngu nu'u̱ hingi pö nö'ö majöni. Di ot'i ngetho gi pöhu̱, ha nor nhemhñö hindi 'ñe habu̱ ja nö'ö majöni. 22Togo ar nemhñö. Ar nemhñö nö'ö togo ko̱nga ar Hesu gehnu̱ ar Kristo. Nuyu̱ yá ñ'u̱ni ar tsi Hmu, ngu gatho nu'u̱ togo ko̱nga ar Dada ne ár T'u̱. 23Gatho nu'u̱ togo ko̱nga ár T'u̱ Jö, hingi pe̱'sa ar Dada ha yá mu̱i. Nö'ö togo da̱majöni ár T'u̱ Jö, pe̱'spa ár Dada n'ehe. 24Yo ma gi hye̱hu̱p'u̱ nö'ö xka pöhu̱ ár ndu̱i. Nu'mu̱ hingi hye̱hu̱p'u̱, gi 'bu̱hwihu̱ ár T'u̱ ne ar Dada. 25Ne gehnu̱ ar ñhöt'i bi ñötkagihu̱: ar te hiñham'u̱ da göts'i. 26Di ot'ahu̱ tengu yá 'be̱fi nu'u̱ ne da ka'ahu̱. 27Ha nunár Hñö Jö xi 'ra'ahu̱ ar tsi Hmu, gehnu̱ 'bu̱ ha ri mu̱ihu̱. Ne hinga mahyoni togo da ut'ahu̱, ngetho gese̱'ö go xi ut'ahu̱, ne mönga majöni. 'Bu̱hwihu̱ ar tsi Hmu ngu xi ut'ahu̱'ö. 28Ha nupya ma tsi bötsi'ihu̱, 'bu̱hwihu̱ n'ar hogam'u̱i ar tsi Hmu, ne nú'mu̱ xta ñ'udi hinga ntsa̱hu̱, ne xta pengi hinga 'be̱ ma tsa̱hu̱ ga 'wehu̱. 29Nu'mu̱ gi pöhu̱ ar tsi Hmu Hesukristo pe̱'sa n'ar hogamu̱i, pöhu̱ n'ehe, gatho nu'u̱ pe̱'sa ar hogamu̱i go yá bötsi Jö.

will be added

X\