ÁR NDU̱I AR KORINTIO 9

1Xi'mu̱, hage hindar mpo̱tegi ar tsi Hmu. Hage hinda tsa̱ ga o̱tka nö'ö di handi xiñho. Hage hinxta handga ma tsi Hmuhu̱ Hesukristo. Wa hinxka ñ'emu̱ihu̱, ne njap'u̱ xi nheki ma 'be̱fi ndi pe̱pa ar tsi Hmu. 2Mödi 'ra enö hindar mpo̱te ar tsi Hmu, ho̱nse̱ nu'ahu̱ gi hanthu̱ hö njap'u̱. Ngetho xka ñ'emu̱ihu̱, ja nhekip'u̱ ár mpo̱tegi ar tsi Hmu. 3Gehnu̱ di xipabi nu'u̱ togo thengagi eñ'u̱ hindar mpo̱te: 4Hage hindi 'ñepkagihe ga höñhe te ga tsihe 'mu̱. 5Hage hindi 'ñepkagihe ga tsihe n'ar nju ngu ma 'be̱hñöhe, jangu nu ma'ra ya mpo̱te, yá jödö ar tsi Hmu ne ar ku Pedro. 6Wa ho̱nse̱ nuga ne ar ku Berhnabe, mahyoni ga mpe̱he ga töhe te ga tsihe. 7Hage xka nuhu̱ n'ar ndogu honse̱ n'amp'u̱ te da zi. Habu̱ xka nuhu̱ n'ar ñ'o̱ho̱ et'a ya obxi ne hingi ju̱xa ar sofo. Ne nu'u̱ togo su ya me̱ti, hage hingi tsa̱ da zipa ár 'ba. 8Hage di mönse̱ga ngu mönga ya jö'i. Hage hingi e hár t'ofo ar Moise n'ehe. 9Ngetho hár t'ofo ar Moise enö njawa: Yo gi kotwa ár ne ar boi ne'ma ar t'e̱i töki. Hage Jö ho̱nse̱ mi benga ya me̱ti nú'mu̱ mi mönga njap'u̱. 10Wa mi bengagihu̱ n'ehe. Hö, bi t'ot'a mi bengagihu̱; ngetho pe̱'sa n'ar ndo̱'mi nö'ö togo mpot'i, jangu nö'ö togo töki, to̱'mi da dö n'a tu̱i n'ehe. 11Nuje po̱ntho xta pothe ár mhö ar tsi Hmu ha ri mu̱ihu̱, hage di a̱the nze̱ye̱ nu'mu̱ di a̱he te ga tsihe, po̱ntho di xohe. 12Nu'mu̱ ma'ra xi hñönga nunar mfa̱ts'inu̱, töte di 'ñepkagihe ga höñhe n'ehe. Hinxta ne xta a̱he, ne di tse̱tathohe gatho, di nehe hinte da do̱'spa ár hoga mhö ar tsi Hmu Hesukristo. 13Ha hingi pöhu̱, nu'u̱ togo mpe̱ har nijö, ka po̱nu̱ nö'ö te da zi. Ha nu'u̱ mpe̱ har m'o̱xm'o̱ñho̱, ka po̱nu̱ te da zi n'ehe. 14Ar tsi Hmu bi 'be̱pkagihu̱ njanu: Nu'u̱ togo mönga ar hoga mhö, har 'be̱finu̱ ka da dimp'u̱ te da zi. 15Hinte xta höngaga. Hindi pe̱ñ'ahu̱ nunar he̱'minu̱ di ne ga ja'ahu̱ gi 'yo̱thu̱ njap'u̱. Di 'bu̱i ga tu m'e̱t'o, ne hindi ne da thömga nunar nsu di mpe̱ njap'u̱tho. 16Ngetho nu'mu̱ di mönga ar hoga mhö, hinda tsa̱ ga exa ma nsu. Xi njakagi ga mönganu̱. Hwëkategi nu'mu̱ hinga mömba ár hoga mhö ar tsi Hmu. 17Jange nu'mu̱ ga netho ga o̱t'e, ma ga pe̱'sa ma nthöhö. Ha nu'mu̱ hindi ne ga o̱t'e, mahyoni ga o̱t'e, ngetho go xi zoga ar tsi Hmu nunar 'be̱finu̱. 18Ndana ma nthöhö 'mu̱. Nö'ö ma nthöhö, gehnu̱ da tsa̱ ga mömba ár hoga mhö ar tsi Hmu ne hinte ga a̱di, ne njap'u̱ hinte ga ju̱ nö'ö di 'ñepkagi ga höni. 19Mödi hinto ár 'be̱gogi, xta m'e̱gose̱ ga pe̱pa gatho, di ne ga tö nze̱ye̱ da hñömba ár hoga mhö ar tsi Hmu. 20Di te̱mba yá m'u̱i ya xodyo, ne njap'u̱ da yu̱t'u̱ hár 'ñu ar tsi Hmu n'ehe. Di fe̱ta nu'u̱ togo te̱mba ár t'ofo ar Moise, njap'u̱ ga tsi'u̱ n'ehe, mödi nuga hindi te̱mhö. 21Di fe̱ta nu'u̱ togo hingi te̱mba yá 'be̱pate ar Moise, ne njap'u̱ di ne ga tö nu'u̱ hingi te̱ni. Mödi nuga hinge xa majöni hindi te̱mba yá 'be̱pate Jö, ngetho di te̱mba yá 'be̱pate ar tsi Hmu Hesukristo. 22Xta ñhe̱'be nu'u̱ togo hiñ'otho yá ts'e̱di, di honi ga töhö da e hár 'ñu ar tsi Hmu. To gatho di fe̱ti, ne njap'u̱ hagatho da tsa̱ ga tö 'ra'u̱. 23Gathonu̱ di o̱t'e di honi da nu̱nga ár hoga mhö ar tsi Hmu, ne ga hönga nuya ñho n'ehe. 24Ha hingi pöhu̱, nu'u̱ togo ntö har nhixt'i, majöni gatho nixt'i, ne n'atho nö'ö togo ma da hñöxa ar nthöhö. Umba ri mu̱ihu̱ gi hñöñhu̱ nunar nthöhönu̱. 25Nu'u̱ togo ñhoki da ntöhö, hingi o̱t'a nö'ö te da k'a'spabi da ntöte. Nuyu̱ xa umba yá mu̱i da dö n'ar nthöhö da nhwati, ha nuju̱ di hoñhu̱ n'ar nthöhö hiñham'u̱ da thege. 26Nuga di honi ga ntöte, hinge njangu nu'u̱ togo ñ'entho, ne n'a ngu nu'u̱ ntuhni, e̱nse̱ ya mpe̱tgu har ndöhi. 27Hin'ö, nuga di fe̱ ma ndo'yo da 'yo̱t'a nö'ö di nega, hinge nö'ö ne'ö. Ngetho hindi ne da t'e̱ngagi, mödi di fa̱xa ma'ra da ntöte.

will be added

X\