ÁR NDU̱I AR KORINTIO 8

1Nupya ma ga xi'ahu̱ nö'ö ngi ne gi pöhu̱: ngi a̱ngagihu̱, ha xiñho da ts'ipa yá ñhuni ya tsita emp'ö. Gatho di pöhu̱ tema ga pe̱hu̱. Ho̱nse̱ nunar mfödi jakagihu̱ ga ñ'exu̱, ha nunar mhöte utkagihu̱ ga fa̱xu̱ ma'ra. 2Nu'mu̱ 'ra beni xa pö nze̱ye̱, hinte pö nö'ö mahyoni da bödi. 3Ha nu'mu̱ 'bu̱ n'a togo mö Jö, Jö go pö'ö n'ehe. 4Ma ga no̱ñhu̱ nuya ñhuni m'o̱'spa ya tsita emp'ö. Di pöhu̱, nuya tsita hinter m'e̱piwa har ximha̱i, ne di pöhu̱ n'ehe, n'adar Jö 'bu̱i, hingi 'bu̱ nze̱ye̱. 5Mödi enga 'ra janu̱ nze̱ye̱ ya jö mhets'i ne nuwa har ximha̱i. Hö, ja nze̱ye̱ ya tsita ne ya tsi hmu emp'u̱. 6Ha nuju̱ di pöhu̱, ho̱nse̱ n'ar Jö 'bu̱i, togo ma Dadahu̱ habu̱ xpa e gatho te ja, ne nuju̱ go yá me̱tigihu̱. Ne di 'ñehu̱ n'ar tsi Hmu, ar Hesukristo togo bi hyoka gatho ne bi 'raju̱ ar te. 7Hinga gatho ya ku handi njap'u̱. 'Ra xki bödi mi pe̱pa ya tsita emp'ö, ne nupya nú'mu̱ tsipa yá ñhuni xi m'o̱'spabi, tsu̱pa yá mfeni, ngetho hingi tse̱ yá ñ'emu̱i. 8Di pöhu̱, nunar ñhuni hingi kwakagihu̱ Jö. Nu'mu̱ ga tsihu̱ wa hinga tsihu̱, hinte hu'skagihu̱, ne hinte högagihu̱. 9Hyanthu̱ xiñho, yo ma gi jafu̱ da mfe'sa nu'u̱ hingi tse̱ yá ñ'emu̱i, da 'yent'a nö'ö gi beñhu̱ xiñho da t'o̱t'e. 10Ngetho nu'mu̱ nu'ge ja ri mfödi gi huxkwi habu̱ ñunga ya me̱pate, ne da thop'u̱ n'a ri ku hingi tse̱ ár ñ'emu̱i, beni hingi ho da ts'i. Ha da hyant'a'i gi tsi nuya ñhuni'u̱, hage hinda ne da zi n'ehe. 11Ne njap'u̱ nuna ri mfödi bi japi bi m'e̱ n'ar ku togo hingi tse̱ ár ñ'emu̱i, nuna n'e xki da̱nga ar tsi Hmu Hesukristo nú'mu̱ mi unga ár te. 12Nu'mu̱ gi o̱t'wa ar ts'oki ya ku ne gi ts'okwa yá mfeni, po̱ntho gi ts'okwa ar tsi Hmu Hesukristo. 13Jange nu'mu̱ nunar ñhuni di tsi, japa ma ku da mfets'e, hinga ma ga tsi, ne hinga japka ma ku da da̱gi.

will be added

X\