ÁR NDU̱I AR KORINTIO 6

1Nu'mu̱ xka ntunkwihu̱ n'a ri kuhu̱, yo'ö dama gi ka̱xu̱ nu'u̱ hingya gamfi, ne hingi ka̱xu̱ ya ku. 2Ha hingi pöhu̱, nuju̱ dar gamfihu̱ ma ga hö'sfu̱ majöni gatho nu'u̱ hingya gamfi. Nu'mu̱ go ma gi hñö'sfu̱ majöni ya meximha̱i, hage hinda tsa̱ gi hñö'sfu̱ majöni n'ar tsi t'u̱lo hñö 'mu̱. 3Wa hingi pöhu̱ ma ga hö'sfu̱ majöni ya e̱nxe̱. Hage töte ár ñhembi nuya tema gi thohu̱pu̱ 'mu̱. 4Nu'mu̱ gi thohu̱ nuya hñöyu̱ thokwa har ximha̱i, yo'ö gi exu̱ da hñös'ahu̱ majöni nu'u̱ hinter m'e̱fi har nijö. 5Di 'be̱t'a ri tsa̱hu̱ di xi'ahu̱ njawa: Hage hinte gi 'ñehu̱p'u̱ n'ar ku di pe̱'sa ar mfödi da japi da ñhanda nuya ku ntuhni. 6Ngetho gi 'ba̱hwihu̱ ri kuhu̱ ha ya ts'u̱t'wi, ne gi ñhandwihu̱ ha yá nthandi nu'u̱ hingya gamfi. 7Nu'mu̱ gi ntuñhu̱ n'a ngu n'a, xka nts'oju̱. Yo'ö hingi tse̱tathohu̱ togo bi ts'ok'ahu̱. Xiñho gi ñhe̱thu̱ te gatho nja'ahu̱. 8Ngetho nu'ahu̱ hingi jahu̱ njap'u̱. Gi ts'ojwu̱ ne gi pëfu̱ ri kuhu̱. 9Ha hingi pöhu̱, nuya ts'okte hinda ma da yu̱t'a hár ts'u̱t'wi Jö. Yo gi kase̱ ri mfenihu̱. Pöhu̱, nu'u̱ 'be̱ngwi ya jö'i, nu'u̱ ndönga yá tsita emp'ö, nuya tsinganthöti, nu'u̱ togo 'be̱ngwi yá mi ndo̱wi, 10ya bë, nu'u̱ togo xa mö ar bojö, ya nti, ya ts'one, nu'u̱ ha̱t'a yá ñ'ohu̱ da hñömba ár bojö, gathoyu̱ hinda ma da yu̱t'a hár ts'u̱t'wi Jö. 11'Ra ngi njahu̱p'u̱ nú'mu̱ hinge ngi ñ'emu̱ithohu̱. Ha nupya xi nsu̱k'ahu̱, xi thök'ahu̱ gatho ri ts'okihu̱, ne hinte ma ts'oki gi tuhu̱, ngetho bi gut'a ar tsi Hmu Hesukristo, ne ár Hñö ma tsi Dadahu̱ o̱t'a ar 'be̱fi ha ri tehu̱. 12Nuju̱ tsa̱ ga eñhu̱, nza̱tho ga o̱thu̱ gatho nö'ö di beñhu̱, mödi hinga gatho fa̱xkagihu̱ ga tsu̱hu̱ ar ñho. Mödi nza̱thohmö, hinga ñhe̱hu̱ da dökagihu̱. 13Majöni nunar ñhuni bi thoki da ts'i da ma har mu̱i, ha nu ar mu̱i honga ar ñhuni, mödi Jö ma da jö'sa n'a ne man'a. Numa ndo'yohu̱ himbi thoki da me̱mpa ar ts'oki, bi thoki da me̱mpa ar tsi Hmu, ne ar tsi Hmu nda m'u̱ ha ma ndo'yohu̱. 14Ne Jö togo bi ko'spa ár te ar tsi Hmu Hesukristo, ma da 'ñu ár ts'e̱di da ko'ska ma tehu̱ n'ehe. 15Wa hingi pöhu̱, nuna ri ndo'yohu̱ gehnu̱ n'a xe̱ni ár ndo'yo ar tsi Hmu Hesukristo. Hage ma ga hömfu̱ n'a xe̱ni ár ndo'yo, ne ga te̱thwu̱ ár ndo'yo n'ar ts'o'be̱hñö. Hin'ö, hinga jahu̱p'u̱. 16Ha hingi pöhu̱, nö'ö togo da m'e̱ngwi n'ar ts'o'be̱hñö, da n'adar ndo'yowi. Ngetho enga har T'ofo: Nuya yoho da n'adar ndo'yo. 17Ha nö'ö togo da m'u̱hwi ar tsi Hmu, da n'at'witho ár Hñö. 18'Wehu̱ gi tsohu̱ yap'u̱ ar ts'oki gi 'be̱ngwihu̱ ya jö'i. Gatho nu ma'ra ya ts'oki o̱t'a n'ar jö'i, 'yoda nthi ár ndo'yo, ha nö'ö 'be̱ngwi ya jö'i, ts'okase̱ ár ndo'yo. 19Ha hingi pöhu̱, nuna ri ndo'yohu̱ hingo ri me̱tihu̱, gehnu̱ ar ngu habu̱ 'bu̱ ár Hñö Jö xi t'a'ahu̱. 20Jö bi gut'a xi mhödi bi da̱ngagihu̱. Jange ndöñhu̱ Jö ha ri ndo'yohu̱ ne ha ri hñöhu̱, ngetho gatho go yá me̱ti'ö.

will be added

X\