ÁR NDU̱I AR KORINTIO 3

1Tsi kuhu̱, hinxi tsa̱ xta zo'ahu̱ ngu nu'u̱ togo pe̱'spa ár Hñö Jö. Xta zo'ahu̱ ngu gar jö'ithohu̱, jangu n'ar tsi t'u̱lo bötsi ja xi m'u̱i; gi njahu̱p'u̱ hár 'ñu ar tsi Hmu Hesukristo. 2Po̱ntho di 'ra'ahu̱ ar 'ba, hinge mahye̱gi ngu ar ñhuni tsi ya döta jö'i. Ngetho himi tsa̱ ngi tsihu̱, ha nuya payu̱ hingi tsa̱ gi tsithu̱. 3Gar jö'ithohu̱ ngetho xa gi gese̱hu̱, xa gi ntuñhu̱, ne hingi pe̱'su̱ n'adar mfeni. Hage hingya jö'itho'ihu̱ 'mu̱, di hñöx'athohu̱ gatho nu ma'ra. 4Ngetho nú'mu̱ gi eñhu̱: Nuga ár me̱tigi ar Pablo, ne ma'ra enö: Nuga ár me̱tigi ar Apolo; hage hingar jö'itho'ihu̱ njap'u̱ 'mu̱. 5Ter me̱ka, ne ter me̱ ar Apolo. Nuje ho̱nse̱ yá 'be̱gogihe ar tsi Hmu togo da hös'ahe ár mhö'ö, ne da mfa̱xtehe ga ñ'emu̱ihu̱. Da jahep'u̱ n'a ngu n'a da o̱the ngu bi 'rakagihe ar tsi Dada. 6Ngu n'ar 'bot'i, nuga da pot'i, ar Apolo bi 'ñunthe. Ha Jö go bi japi bi te'ö. 7Nu'mú̱, hinter m'e̱fi nö'ö togo mpot'i wa nö'ö 'ñunthe, ngetho Jö go jap'ö da te. 8Nö'ö togo mpot'i, ñhe̱hwitho nö'ö togo 'ñunthe, mödi ma da hñönga n'a ngu n'a ár nthöhö ngu xi 'yo̱t'a ar 'be̱fi. 9Ngetho nuje yá ma̱xtegihe Jö, ha nu'ahu̱ ár 'bot'i'ihu̱, ne ár ngu'ahu̱ Jö n'ehe. 10Nuga, Jö xi hwëgagi ngu n'ar ho̱ngu pödi xiñho, da du̱'mba ár wa ar ngu, ha man'a bi guts'i di hets'i. Dá jamasu n'a ngu n'a da hyandi hanja juxa ar ngu. 11Ngetho hinjo'o togo da gu̱xa man'ár ndu̱i ar ngu. Nunar tsi Hmu Hesukristo gehnu̱ ar ndu̱i'ö. 12Ha mañö nunar ndu̱inu̱, tsa̱ da t'u̱xya k'axt'i wa ya t'axbo̱jö, ya nza̱tho do, ar za, ya t'e̱i, ya xiza. 13Ha nu xta zo̱nga ar pa da thö'spa majöni, ka ma da nhekinu̱ ár 'be̱fi n'a ngu n'a; ngetho ma da thoka har tsibi, ne njap'u̱ da födi tema bi gu̱ bi hyoka ár 'be̱fi. 14Nö'ö togo hinda zöt'a ár 'be̱fi bi guts'i, ma da me̱'sa ár nthöhö. 15Nu'mu̱ ár 'be̱fi n'a da zöt'i, da m'e̱p'u̱, ne ho̱nse̱ ma da k'ont'i ngu nú'mu̱ da k'ont'a ha n'ar tsibi. 16Ha hingi pöhu̱ go ár nijö'ihu̱ Jö, ne ár Hñö Jö 'bu̱ ha ri mu̱ihu̱. 17Nu'mu̱ togo da hwatwa ár nijö Jö, ma da nhwat'ö n'ehe, ngetho ár nijö Jö go ár me̱ti'ö, ne go ge'ahu̱. 18Yo gi nkase̱hu̱. Ha nu'mu̱ n'a gi beñhu̱ gi pe̱'sfu̱ ár mfödi ar meximha̱i, 'yo̱thu̱ ngu hinte gi pöhu̱, ne njap'u̱ majöni gi pe̱'su̱ ar hoga mfödi. 19Ngetho nunar mfödi jawa har ximha̱i, Jö handi ar 'be̱mfeni, ngu enga har T'ofo: Jö bi japi bi mfe'sase̱ ha yá ts'omfeni. 20Man'agi enö: Jö emba yá mfeni ya bömfödi, hinter me̱'u̱. 21Jange hinto gi 'ñexa ri nsuhu̱ gi te̱ñhu̱ ya jö'i, ngetho gatho ri me̱tihu̱. 22Nu'mu̱ ar Pablo, ar Apolo, wa ar Pedro, ar ximha̱i, ar te, ar ndöte, ár pania, nö'ö xi 'ñep'u̱, gatho'u̱ go ri me̱tihu̱. 23Ne nu'ahu̱ ár me̱ti'ihu̱ ar tsi Hmu Hesukristo, har Hesukristo ár me̱ti Jö.

will be added

X\