ÁR NDU̱I AR KORINTIO 16

1Nupya di xi'ahu̱, nunar mfa̱ts'i 'be̱mpa ya ku hyoya, te̱nthu̱ nunar mhö da 'be̱pa ya nijö 'bu̱hnu̱ har ha̱i Ngalasia. 2Ta̱t'a hñöto har 'be̱t'o mpa, n'a ngu n'a gi 'weju̱ n'a tsi tu̱i tengu ár nze̱ye̱ xka töhu̱. Nzöñhu̱ gi kwathu̱, ne nú'mu̱ xka tso̱mp'u̱, hinge ka gi ndu̱i gi johu̱. 3Ne xka tso̱mp'u̱, ga pe̱hna nu'u̱ xka hwañhu̱, ne xka umfu̱ n'ar he̱'mi da hñöxa ar mfa̱ts'i ma da umba ya ku me Herusalen. 4Ha nu'mu̱ xiñho ga maga n'ehe, ga me̱'be'u̱. 5Ma ga map'u̱ ga k'ös'ahu̱ nu xka jwadi ga tho har ha̱i Nmasedonia, ngetho mahyoni ga thohnu̱tho. 6Di beni ga kohwihu̱ 'ra ya tsi pa. Nu'mu̱ da tsa̱ ga 'bu̱hwihu̱ ga to̱'mi da tho ya tse̱, ne m'e̱fa gi 'raju̱ n'ar hoga nt'edi, ga ju̱ ma 'ñu habu̱ gar ma. 7Ngetho nupya hindi ne ga nu'ahu̱ nhixt'itho. Di ne ga 'bu̱p'u̱ 'ra ya tsi pa, nu'mu̱ da 'raka nse̱ki Jö. 8Ma ga 'bu̱kwatho Efeso, ga to̱'mi da tho ar da̱ngo Pentekoste. 9Ngetho xa xi xo ar goxthi tsa̱ ga pe̱pa ar tsi Hmu. Di to̱'mi ga tö nze̱ ya jö'i, mödi ja nze̱ye̱ togo hingi ne da hye̱gagi. 10Nú'mu̱ da zo̱mp'u̱ ar ku Timoteo, hyanthu̱ di 'bu̱i xiñho, ngetho nö'ö, o̱t'wa ár 'be̱fi Jö nguga n'ehe. 11Jange numansuhu̱ ne umfu̱ n'ar hoga nt'edi da pengi da e da k'öskagi, ngetho di to̱'mi da zo̱hwi nu ma'ra ya ku. 12Ha nu ar tsi ku Apolo, da a̱pa ar möte nda me̱wi ya ku ma nda k'ös'ahu̱. Himbi ne bi mapya, mödi da map'u̱, nu xta nja ár mpongi. 13Zo̱t'a ri da̱hu̱, ze̱ta ri ñ'emu̱ihu̱. Yo gi wenthu̱, ne xa gi no̱xju̱. 14Gatho nö'ö te gi 'yo̱thu̱, gi pe̱'su̱ ar mhöte gi 'yo̱thu̱. 15Tsi kuhu̱, gi pöhu̱ ar ku Tefa ne yá mëni. Gehyu̱ ya 'be̱t'o ku xi jamfi núnu̱ Akaya, ne xi 'ye̱ntyá teyu̱ da ma̱xa ya gamfi. 16Di a̱'ahu̱ ar möte gi 'yo̱thu̱ gatho nuya fa̱xte ngu'u̱, ne nu'u̱ tsa̱bi mpe̱ hár 'be̱fi Jö. 17Da njohya bi zo̱ ar ku Tefa, ar Fortunato ne ar Akaiko, gehyu̱ togo po̱t'ahu̱ 'bu̱kwa. 18Ngetho bi hubga ma mu̱i ne ri mu̱ihu̱ n'ehe, jange numañhobihu̱ nuya kuyu̱. 19Ze̱ngwa'ihu̱ ya ku mhunts'a ha ya nijö 'bu̱kwa har ha̱i Asia. Ne ar Akila, ar Prisila ne ya ku mhunts'a ha yá ngu'u̱, gathoyu̱ ze̱ngwa'ihu̱ har mhöte unga ar tsi Hmu. 20Ze̱ngwa'ihu̱ gatho ya ku 'bu̱ ingekwa. Nze̱ngwahu̱ n'a ngu n'a, ñhu̱hu̱ ngu gar kuhu̱. 21Nuga dar Pablo, di pe̱ñ'ahu̱ nunar nze̱ngwanu̱ di ot'ase̱. 22Nö'ö togo hingi mö ar tsi Hmu Hesukristo, dá zu̱twa ár kwe̱ Jö. Ar tsi Hmu Hesukristo 'ba̱p'u̱tho da ehe. 23Dá hyex'atho'ihu̱ ár nhwëki ar tsi Hmu Hesukristo. 24Di mö'ahu̱ gi gathohu̱ har mhöte unga ar tsi Hmu Hesukristo. Dá njap'u̱.

will be added

X\