ÁR NDU̱I AR KORINTIO 14

1Umba ri mu̱ihu̱ gi pe̱'su̱ ar mhöte. Hyoñhu̱ ya hogant'uni unga Jö, ne nuya hogant'uniyu̱, hyoñhu̱ m'e̱t'o gi möñhu̱ nö'ö xi'ahu̱ Jö. 2Ngetho nö'ö togo ñö ya n'añ'o hñö, hingi zo ya jö'i, ñöwise̱ Jö. Hinto pödi tema mö, mödi mönga nö'ö himi fö mam'e̱t'o ngu umba ár Hñö Jö da mö. 3Ha nö'ö togo mönga tema xipa Jö, zo ya jö'i da te yá ñ'emu̱i, da humbyá mu̱i, ne da hot'i. 4Nö'ö togo ñö ya n'añ'o hñö, japase̱ ár ñ'emu̱i da te. Ha nö'ö mönga te xipa Jö, fa̱xa gatho ya ku da te yá ñ'emu̱i. 5Jange nuga di nemhö gatho gi ñömhöhu̱ ya n'añ'o hñö, mödi to̱te ár ñho gi mömfu̱ te da xi'ahu̱ Jö. Ngetho nö'ö togo mönga te xipa Jö, töpa ár nsu togo ñö ya n'añ'o hñö. Nuyu̱ xiñho, ho̱nse̱ nu'mu̱ ja togo da mö tema di bo̱ni, ne da ma̱xa ar nijö. 6Tsi kuhu̱, xi'mu̱ ga map'u̱ di ñö ya n'añ'o hñö, tema ñho di hös'ahu̱. Gar hös'ahu̱ n'ar ñho nu'mu̱ gar xi'ahu̱ nö'ö xi utkagi ne xi 'raka Jö ga mö, ne di ut'ahu̱ ya hoga mfeni xi t'akagi. 7Njangu nuya nthu̱za ne ya 'bida, nu'mu̱ hindi n'añ'o yá nzu̱ni, hindi födi tema thuhu da thut'i di zu̱nt'a n'a wa man'a. 8Ha nu'mu̱ n'ar k'axt'athu̱xi hinda unga xiñho ár m'e̱i, nuya ndogu hinda ñhoki da ntunm'u̱. 9Gi njahu̱p'u̱ n'ehe, nu'mu̱ hinto tso yá mfeni nö'ö te gi möñhu̱, po̱ntho gi ñöse̱hu̱. 10Xa ja nze̱ye̱ ya hñö har ximha̱i, ne gatho'u̱ o yá 'ñu tema di bo̱ni. 11Ha nu'mu̱ hindi pöhu̱ tema di bo̱nga n'a ngu n'a nuya hñö mönga nö'ö togo ñö, handgagihu̱ ngu dar me yap'u̱hu̱, ne njap'u̱ di hanthu̱'ö n'ehe. 12Jange nu'ahu̱, xa gi nehu̱ gi pe̱'spabihu̱ 'ra ya hogant'uni unga Jö, umba ri mu̱ihu̱ xa gi pe̱'su̱ nu'u̱ da ma̱xa ya ku da te yá ñ'emu̱i. 13Jange nö'ö togo ñö ya n'añ'o hñö, 'ya̱fu̱ Jö da tsa̱ gi pöhu̱ ne gi xifu̱ ya ku tema di bo̱ni n'ehe. 14Ngetho nu'mu̱ di ñöwihu̱ Jö ha man'ar hñö hingi födi, ma hñöhu̱ mat'ajö, ha numa mfenihu̱ hinte fa̱ts'i. 15Te ga pe̱hu̱ 'mu̱. Ma ga ñöwihu̱ Jö ha ma hñöhu̱, ga pöhu̱ n'ehe tema di xipabihu̱. Ma ga tuthwu̱ Jö ha ma hñöhu̱, ga pöhu̱ tema di tuthwu̱ n'ehe. 16Ngetho nu'mu̱ di nsundahu̱ Jö di möñhu̱ ya mhö hingi po̱nga ma mfenihu̱, ho̱nse̱ po̱ ha ma hñöhu̱, nö'ö togo xi ma da 'yo̱xtho, hanja tsa̱ da 'ñenö, hö njap'u̱ nö'ö di umfu̱ njamödi Jö, nu'mu̱ hingi pödi tema di möñhu̱. 17Nuju̱ majöni di umfu̱ njamödi Jö, ha nö'ö man'a o̱xkagihu̱, hinte fa̱xa nö'ö di möñhu̱. 18Di umba njamödi Jö di tö'ahu̱ ga ñö ya n'añ'o hñö. 19Mödi har nijö, töte ár ñho ga mönga ku̱t'a ya mhö ne ga pödi tema di bo̱ni, ne njap'u̱ ga uta ma'ra, hinge ga mönga n'anthebe ya nthebe ya mhö ha ma'ra ya hñö hingi födi. 20Tsi kuhu̱, hye̱hu̱p'u̱ gi beñhu̱ ngu n'ar tsi bötsi. Hö, di hñöx'ahu̱ n'ar tsi bötsi hingi pö ar ts'oki, ha gi hyanthu̱ xiñho tema gi beñhu̱ ngu n'ar döta jö'i n'ehe. 21Jangu xi t'ot'a hár T'ofo Jö: Ma ga zo nunar hnininu̱ ha ya n'añ'o hñö ñö ya jö'i 'bu̱ ma'ra ya ha̱i, mödi njap'u̱ hinda ma da 'yo̱de, njanu̱ enga ar tsi Hmu. 22Nuya n'añ'o hñö gehnu̱ n'ar nt'udi, hingi t'umba ya gamfi, t'umba nu'u̱ hingya gamfi. Ha nu'u̱ togo mönga te xipa Jö, hingi nsipa nu'u̱ hingya gamfi; nuyu̱ hö, nsipabi nuya gamfi. 23Nu'mu̱ gatho ya ku n'at'wu̱ da mhunts'i ne gatho di ñö ya n'añ'o hñö, ne da yu̱t'a n'ar 'ra'yo wa n'a hingar gamfi hinte pödi, ha hinda 'ñenö xka 'be̱ ri mfenihu̱. 24Hingi njap'u̱ nu'mu̱ gatho gi möñhu̱ nö'ö te xi 'ra'ahu̱ Jö, ne da yu̱t'a n'ar 'ra'yo, wa n'a hingar gamfi, ne da 'yo̱x'ahu̱, ma da zo ár mu̱i nö'ö te gi xifu̱, ne da zo ár mfeni. 25Ne da nhekitho gatho tema pe̱'sa hár mu̱i, jange dama da nda̱ndihmö da nsundabi Jö, ne da 'ñenö, majöni gi 'bu̱hwihu̱ Jö. 26Tsi kuhu̱, nö'ö gi pe̱hu̱ nú'mu̱ xki mhunsu̱, n'a ngu n'a möñhu̱ nö'ö gi höhu̱: gi tuthu̱ ya nsa̱di, gi uthu̱ ya ku. Thokwabihu̱ nö'ö xi ut'ahu̱ Jö, gi möñhu̱ ya n'añ'o hñö, wa gi möñhu̱ te di bo̱nga nuya hñöyu̱. Gathonu̱ 'yo̱thu̱, hyoñhu̱ da te yá jamfi ya ku. 27Ha ho̱nse̱ ngu yoho hñu, ne 'raman'a di ñö ma'ra ya n'añ'o hñö, ne di 'bu̱ n'a togo da mönga tema di bo̱nga nö'ö mö. 28Ha nu'mu̱ hinjo'o togo da mönga tema di bo̱nga nuya hñöyu̱, dá ñhe har nijö, ne di ñöwise̱ Jö. 29Njap'u̱ nuya mönga te xipa Jö da ñö, dá ñö yoho wa hñu, ne nuya ma'ra da nu ha xiñho te mö wa hin'ö. 30Ne nu'mu̱ nö'ö to hudi, da t'umba ár mhö Jö, dá ñhe nö'ö man'a, ne da ñö'ö. 31Ngetho tsa̱ gi möñhu̱ te xi 'ra'ahu̱ Jö, 'raman'a gi ñöhu̱. Njap'u̱ da bö gatho nö'ö hingi pödi, ne gatho da nhu'mba yá mu̱i. 32Nuya togo mönga te xi xipa Jö, dá bödi da zixa nunar nt'uninu̱. 33Ngetho Jö hingi numañho ar ñöxhnatho, ne'ö ar hogam'u̱i. Jangu o̱t'a ha ya mhunts'i gatho nu ma'ra ya nijö, gehnu̱ gi te̱nthu̱. 34Nuya 'be̱hñö da ñhetho ha ya mhunts'i, ngetho hingi t'umba ar se̱ki da ñö. Dá 'yo̱xtho nö'ö nsipabi, ngu mönga har T'ofo. 35Ha nu'mu̱ ne te da bödi, xta zo̱nga hár ngu da 'ya̱mba ár döme, ngetho hingi nheki xiñho da ñö n'ar 'be̱hñö har mhunts'i. 36Beñhu̱ hinxpa po̱mp'u̱ ár mhö Jö, ne hingi ho̱nse̱'ihu̱ togo xka 'yo̱hu̱. 37Ne nu'mu̱ n'a gi ka̱xmbenihu̱ gi möñhu̱ nö'ö xi'ahu̱ Jö, wa gi pe̱'su̱ ma'ra ya nt'uni unga ár Hñö Jö, pöhu̱ 'mu̱ nuya mhöyu̱ di ot'ahu̱, yá 'be̱pate ar tsi Hmu. 38Ha nö'ö hingi ne da japamasu, yo gi jafu̱masu n'ehe. 39Jange tsi kuhu̱, umba ri mu̱ihu̱ gi möñhu̱ te xi'ahu̱ Jö, ne hingi hñöjwu̱ togo ne da ñö ya n'añ'o hñö. 40Gatho gi 'yo̱thu̱ ngu di 'ñepi, ne di o ár 'ñu.

will be added

X\