ÁR NDU̱I AR KORINTIO 13

1Tsi kuhu̱, nu'mu̱ gar ñömhö ma'ra yá hñö ya jö'i, wa gar ñömhö ngu ya e̱nxe̱, ne hindi pe̱'sa ar mhöte, di ñhe̱'betho n'ar xiujö nga̱ni, wa n'ar bo̱jö fat'i. 2Nu'mu̱ di mömba nö'ö xika Jö, gar pö gatho nö'ö hindi födi, di tso ma mfeni gatho nö'ö pö ya jö'i, ne gar pe̱'sa n'ar ñ'emu̱i da tsa̱ ga japa ya t'o̱ho̱ da mponi, ha hindi pe̱'sa ar mhöte, hinter me̱kagi. 3Mödi ga umhö gatho ma ñho da themba ya hyoya, ne ga umhö ma ndo'yo da ts'öt'i, ne hindi pe̱'sa ar mhöte, hinte da ma̱xkagi'ö. 4Nö'ö togo pe̱'sa ar mhöte, xa ja ár ts'e̱ti, ar hogajö'i, ne hingi hyo̱kwa yá ñho nu ma'ra. Hingar ñ'ets'i, hingar gese̱. 5Hingar bo̱ka, hingi honse̱ ár ñho. Hingi mbo̱ ár kwe̱, ne hingi kwatatho hár mu̱i. 6Hingi johya handa ma'ra o̱t'a nö'ö hingi ho, ngetho nö'ö togo pe̱'sa ar mhöte johya da hyanda ar ñho. 7Nö'ö togo pe̱'sa ar mhöte, tse̱tatho gatho te da 'ñepabi, ñ'emu̱itho gatho, hingi tsa̱ya̱ to̱'ma ar ñho, hingi ñhe̱gi da dö ya thogi. 8Nunar mhöte hiñ'otho ár ngöts'i. Ma da göxa ar ts'e̱di xi t'umbabi nu'u̱ togo mönga te xipa Jö, ma da göxa ya n'añ'o hñö, ne ma da the ar pa di ja ar hoga mfeni. 9Ngetho n'a xe̱nitho di pöhu̱, ne man'a xe̱ni xi utkagihu̱ Jö ga möñhu̱. 10Ha nu xta ep'u̱ ar pa ga pöhu̱ xiñho, nuna tsi xe̱nitho di pöhu̱ da göx'ö. 11Nú'mu̱ ndar bötsi ndi ñö ngu n'ar bötsi, ndi pe̱'spa ár mfeni n'ar bötsi, ne ndi handa gatho ngu handa n'ar bötsi. Ha nú'mu̱ nda te, ne da ñ'o̱ho̱, da he̱p'u̱ nö'ö ndi hñöxkagi n'ar bötsi. 12Nupya di hanthu̱ ngu n'ar ñhe xi mboitho; nuya pa'u̱ ma ga hanthu̱ xiñho. Nupya di pöhu̱ n'a xe̱nitho, ha nu'mú̱ hö, ma ga pöhu̱ ngu xi bökagihu̱ Jö. 13Nupya di pe̱'su̱ ar ñ'emu̱i, ar ndo̱'mi ne ar mhöte, nuya hñuyu̱, ha nunar mhöte go töte ár nsu'ö.

will be added

X\