ÁR NDU̱I AR KORINTIO 12

1Tsi kuhu̱, di ne gi pöhu̱ xiñho nuya hogant'uni unga Jö. 2Ha hingi beñhu̱, nú'mu̱ hinge ngi pöhu̱ ár mhö Jö, ngi m'e̱thu̱ habu̱ gatho mi ts'ix'ahu̱ ma ngi ndöñhu̱ ya gone tsita. 3Jange di ne ga xi'ahu̱, hinjo'o n'ar jö'i da 'ñenö ñö xi nzimba ár ts'e̱di ár Hñö Jö, ne tsanga ar tsi Hmu Hesu. Ne hinjo'o n'a da 'ñemba ar Hesu gehnu̱ ar Hmu, nu'mu̱ hingi pe̱'spa ár Hñö Jö. 4Ma ga xi'ahu̱ hö, ja nze̱ye̱ ya hogant'uni, mödi n'adár Hñö Jö togo uni. 5Ne ja nze̱ye̱ ya 'be̱fi hanja ga mpe̱hu̱, mödi n'adar tsi Hmu di pe̱fu̱. 6Ja nze̱ye̱ hanja nheki ár ts'e̱di Jö, ha gese̱'ö togo ungar ts'e̱di ne o̱t'a gatho. 7Gathogihu̱ xi nheki ha ma tehu̱ ár ts'e̱di ár Hñö Jö, ne njap'u̱ ga mfa̱xu̱ n'a ngu n'a. 8Ár Hñö Jö xi umba 'ra da me̱'sa ar hoga mfödi da ñö, ma'ra xi t'umba n'ar hoga mfeni da uta ma'ra. Gathoyu̱ get'ár Hñö Jö togo uni. 9Ma'ra xi t'umba n'ar döta ñ'emu̱i, ma'ra xi t'umba ar ts'e̱di da o̱the ya da̱thi. Nuyu̱ n'ehe get'ár Hñö Jö togo xi umbi. 10Ma'ra xi t'umba ar ts'e̱di da 'yo̱t'a ya nt'udi, ma'ra da mönga ya hñö xi umba Jö. Ma'ra xi t'umba ar mfödi da bödi ha hömpa ár Hñö Jö n'a togo ñö wa hin'ö. Ma'ra xi t'umbabi da ñö ya hñö n'añ'o, ne ma'ra xi t'umbabi da bödi tema di bo̱nga nuya hñö'u̱. 11Ne gatho nuya 'be̱fiyu̱, n'ase̱ togo o̱t'e, gehnu̱ ár Hñö Jö togo hemba n'a ngu n'a ngu ne'ö da umbabi. 12Ngetho njangu ár ndo'yo n'ar jö'i, mödi nze̱ye̱ yá xe̱ni, n'adar ndo'yo. Njap'u̱tho ár nijö ar tsi Hmu Hesukristo n'ehe. 13Di n'adar ndo'yohu̱, ngetho n'at'wu̱ da nxixthehu̱ gatho hár Hñö Jö, wa ya xodyo wa nu'u̱ hingya xodyo, ya 'be̱go wa ya hmu, gatho bi t'akagihu̱ ga höñhu̱ n'adár Hñö Jö. 14Nunar ndo'yo 'mu̱, hingi n'adar xe̱ni, nze̱ye̱. 15Nu'mu̱ da 'ñenga ar wa: Nuga hingár me̱tigi ar ndo'yo ngetho hindar 'ye̱. Hage njap'u̱ hingár me̱ti ar ndo'yo 'mu̱. 16Wa nu'mu̱ da 'ñenga ar gu: Hingár me̱tigi ar ndo'yo ngetho hindar da̱. Hage hingár me̱ti ar ndo'yo njap'u̱ 'mu̱. 17Nu'mu̱ har da̱ da nxo̱gep'u̱ ar ndo'yo, hanja nda tsa̱ nga o̱hu̱ 'mu̱. Wa nu'mu̱ har gu nda nxo̱gep'u̱ ar ndo'yo, hanja nda tsa̱ nga mpöhu̱ 'mu̱. 18Ne Jö go xi tuta n'a ngu n'a ya xe̱ni har ndo'yo, ngu xi ne'ö. 19Ngetho nu'mu̱ n'adar xe̱ni di jwata xo̱ge ar ndo'yo, hage ar ndo'yo njap'u̱ 'mu̱. 20Majöni nze̱ye̱ ya xe̱ni, ha n'adar ndo'yo. 21Nunar da̱ hingi tsa̱ da 'ñemba ar 'ye̱: Hindi hoñ'i. Nunar ñö hingi tsa̱ da 'ñemba ar wa: Hingi jaka ar 'be̱di. 22Hin'ö, hingi njap'u̱. Di xi'ahu̱, nu'u̱ nheki hinte pe̱'sa yá ts'e̱di, go xa mahyoni'u̱. 23Nuya xe̱ni hints'u̱ pe̱'sa yá nsu, go xa di japamasuhu̱ di hethu̱. Ha nu'u̱ ya xe̱ni hingi nza̱tho, go di hethu̱ xiñho'u̱. 24Ngetho nu'u̱ ya xe̱ni xi nza̱tho, hinga mahyoni da njapamasu. Jö bi to̱ka ar ndo'yo, ne bi umba ár nsu nu'u̱ mi k'at'wi. 25Ne njap'u̱ hinda nja ar ñhege, ne n'a ngu n'a da ma̱xa ár ñ'ohu̱. 26Njap'u̱ nu'mu̱ n'a xe̱ni tho ar u̱gi, gatho ar ndo'yo tsa̱mañ'u̱. Ha nu'mu̱ n'a xe̱ni t'e'spa ár nsu, gatho ar ndo'yo johyawi. 27Di njahu̱p'u̱ n'ehe. Nguju̱ ár ndo'yogihu̱ ar tsi Hmu Hesukristo, ne n'a ngu n'a, n'a xe̱nigihu̱ di jwathwu̱ ár ndo'yo'ö. 28Ne xi 'ñexkagihu̱ Jö har nijö: M'e̱t'o xi 'ñexa yá mpo̱te ar tsi Hmu, m'e̱fa nu'u̱ mönga ya hñö xi umba Jö. Ár hñu ya utate, m'e̱fa nu'u̱ o̱t'a ya nt'udi. M'e̱fa nu'u̱ togo o̱the, ne nu'u̱ fa̱xte, nu'u̱ togo ya ndö, ne nu'u̱ ñö ya n'añ'o hñö. 29Hage gatho ya mpo̱te. Wa gatho mönga ya hñö xi umba Jö. Wa gatho ya utate. Wa gatho o̱t'a ya nt'udi. 30Hage gatho xi t'umbabi ar ts'e̱di da o̱the ma'ra. Hage gatho ñö ya n'añ'o hñö. Wa gatho pödi te di bo̱nga nuya hñöyu̱. 31Umba ri mu̱ihu̱ gi pe̱'su̱ nuya hogant'uni töte yá nsu. Ha nuga ma ga ut'ahu̱ n'ar 'ñu töte ár ñho.

will be added

X\