ÁR NDU̱I AR KORINTIO 11

1Te̱ngagihu̱ ma m'u̱i ngu di te̱mbaga ár m'u̱i ar tsi Hmu Hesukristo. 2Tsi kuhu̱, di es'a ri nsuhu̱, ngetho hinxka pumhnigihu̱, ne gi te̱nthu̱ nuya nt'uti da tsok'ahu̱. 3Di ne gi pöhu̱ n'ehe, ar tsi Hmu Hesukristo gehnu̱ ár ñöxhmu gatho ya ñ'o̱ho̱, ha nunar ñ'o̱ho̱ ár ñöxhmu ár 'be̱hñö, ngu Jö gehnu̱ ár ñöxhmu ar tsi Hmu Hesukristo. 4Jange nu'mu̱ n'ar ñ'o̱ho̱ ko'ma ár ñö da mat'a Jö, wa da mömba ár mhö Jö, hingi numansu togo ár ñöxhmu. 5Ha gatho nuya 'be̱hñö mat'a Jö, wa mönga ya mhö umba Jö, ne hingi ko'ma ár ñö, hingi numansu ár ñöxhmu, jangutho nu'mu̱ da 'ñöxt'a ár ñö. 6Ngetho nu'mu̱ ar 'be̱hñö hingi ne da go'ma ár ñö, dá ñ'öxt'mu̱. Ha nu'mu̱ n'ar m'e̱tsa̱ da ñ'öxi wa da 'ñöxt'a ár ñö, dá go'ma 'mu̱. 7Nu ar ñ'o̱ho̱ hingi ho da go'ma ár ñö, ngetho di hñöxa Jö, ne ka nhekinu̱ ár nsunda'ö, ha nu ar 'be̱hñö ka nhekinu̱ ár nsu ar ñ'o̱ho̱. 8Ngetho nunar ñ'o̱ho̱ hinxpa e har 'be̱hñö. Nunar 'be̱hñö xpa e har ñ'o̱ho̱. 9Nunar ñ'o̱ho̱ himbi thoki ngetho mi honga ar 'be̱hñö, nunar 'be̱hñö hö, bi thoki ngetho mi honga ar ñ'o̱ho̱. 10Jange ar 'be̱hñö mahyoni da go'ma ár ñö, ne da nheki numansu ár ñöxhmu, ngetho handa ya e̱nxe̱. 11Ha nuya xta jamfihu̱ ar tsi Hmu, hingi tsa̱ ga eñhu̱, nunar ñ'o̱ho̱ hingi honga ar 'be̱hñö, wa ga eñhu̱ ar 'be̱hñö hingi japa ar 'be̱di ar ñ'o̱ho̱. 12Ngetho jangu ar 'be̱hñö ba po̱nga har ñ'o̱ho̱, ar ñ'o̱ho̱ m'u̱ har 'be̱hñö nuya payu̱. Mödi Jö go umba ár te gatho. 13Bense̱hu̱, hage xiñho hinda go'ma ár ñö ar 'be̱hñö nú'mu̱ ñöwi Jö. 14Gi pöhu̱ xiñho, njanu̱ bi hyogagihu̱ Jö, ngetho n'ar m'e̱tsa̱ n'ar ñ'o̱ho̱ da hye̱ ár xtö da te xi ma. 15Ha nu ar 'be̱hñö nza̱tho nu'mu̱ da hye̱gi da te ár xtö, ngetho xi t'umba ár xtö ngu ar njöxañö. 16Ha nu'mu̱ ja togo ne da ntsa̱ñhöki, nuje hindi te̱ñhe man'ar nt'umbi, ne njap'u̱ nu ma'ra ya gamfi. 17Nupya ja tema ga xi'ahu̱ n'ehe, ne hinga ma ga es'ahu̱ ri nsuhu̱, ngetho hingi mhunsu̱ gi 'yo̱thu̱ nö'ö xiñho, gi o̱thu̱ nö'ö hingi ho. 18M'e̱t'o ma ga xi'ahu̱, enö nú'mu̱ gi o̱thu̱ ri mhunts'ihu̱ har nijö, di o̱de jar ñhege, ne di beni hö njap'u̱ n'a tsi tu̱i. 19Ngetho mahyoni da njap'u̱, ne da nheki togo majöni ma da de̱mba ár 'ñu ar tsi Hmu. 20Jange nú'mu̱ gi o̱thu̱ ri mhunts'ihu̱, nö'ö gi tsihu̱ hingár t'oxi ar tsi Hmu. 21Ngetho nú'mu̱ gi nt'oxihu̱, n'a ngu n'a 'be̱t'o da zise̱ ár ñhuni. Njap'u̱ 'ra kotho tunthu, ha ma'ra thotho nö'ö xi zi. 22Hage hinte gi pe̱'su̱ ri nguhu̱ habu̱ gi ñuñhu̱ ne gi ntsithehu̱. Wa hinte gi nuthwu̱ ár nijö Jö, ne gi ne gi 'be̱thwu̱ yá tsa̱ nu'u̱ hinte pe̱ts'i. Te ga xi'ahu̱. Nuwa hö, hinga es'ahu̱ ri nsuhu̱. 23Ngetho nuga xta ut'ahu̱ nö'ö xi utkagi ar tsi Hmu n'ehe: Nö'ö ar pa bi nda̱ ar tsi Hmu Hesu, nor nxui'ö bi gu̱ ar thuhme. 24Ne mi wadi bi unga njamödi, bi hyeke ne bi 'ñenö: Hñöñhu̱ gi tsihu̱, gehnu̱ ma ndo'yo ma da theni da gut'a ri ts'okihu̱. 'Yo̱thu̱ njanu̱ gi bengagihu̱. 25Nu mi wadi bi nt'oxi, bi gu̱ ar t'e̱ni ne bi 'ñenö: Nunar t'e̱ninu̱ jangu n'ar 'ra'yo nkohi ma da zok'ahu̱ Jö xta nhö'ma ma ji. 'Yo̱thu̱ njanu̱ nú'mu̱ gi tsihu̱ gi bengagihu̱. 26Jange nú'mu̱ gi tsihu̱ ar thuhme ne gi tsihu̱ te po nunar t'e̱ninu̱, gi da̱hu̱ majöni ár ndöte ar tsi Hmu Hesukristo. Gi jahu̱p'u̱ gi to̱'mhu̱ ar pa da zo̱ho̱. 27Nu'mu̱ n'a togo da zi nunar thuhmenu̱ ne nunar t'e̱ninu̱, ne hingi o̱t'a ngu di 'ñepi, ma da tho̱xa ár ji bi nhö'mbabi ar tsi Hmu, ne ár ndo'yo bi ts'u̱t'wabi. 28Jange tsa̱se̱hu̱ n'a ngu n'a tengu gi 'bu̱hu̱, ne tsihu̱ nunar thuhmenu̱ ne nunar t'e̱ninu̱. 29Ngetho nö'ö togo tsi ar thuhme ne tsi ar t'afi po har t'e̱ni, ne hingi japamasu tema di bo̱nga ár ndo'yo ar tsi Hmu, nts'okse̱ njap'u̱. 30Jange nze̱ye̱ gi hñeñhu̱, ne xi went'ahu̱, ma'ra xi hyoñ'ahu̱ Jö. 31Nu'mu̱ ga tsa̱se̱hu̱ tengu di 'bu̱hu̱, hinte da tho̱xkagihu̱. 32Ha nu'mu̱ da thimgagihu̱ xta nts'oju̱, ar tsi Hmu 'raju̱ ma nju̱tguhu̱, ne njap'u̱ hinga möhu̱ har tsibi mahye̱giwi nu ma'ra ya meximha̱i. 33Jange di xi'ahu̱ tsi kuhu̱, nú'mu̱ gi mhunsu̱ gi nt'oxihu̱, to̱'mhu̱ n'a ngu n'a ri ñ'ohu̱. 34Nu'mu̱ gi tunthuhu̱, ñuñhu̱ ha ri nguhu̱, hinte di ja te da tho̱x'ahu̱ nú'mu̱ gi kwathu̱ har mhunts'i. Nu ma'ra ya nt'a̱ni ga 'ya̱ngagihu̱, ga xi'ahu̱ xka ñöhu̱ m'e̱fa xka map'u̱.

will be added

X\