ÁR NDU̱I AR KORINTIO 1

1Nuga dar Pablo, xi ts'onkagi ga po̱ta ar tsi Hmu Hesukristo, ngetho njap'u̱ bi ne Jö. Nuga ne ar ku Sostene, 2di pe̱ñ'ahe nunar he̱'minu̱, nu'ahu̱ ár nijö'ihu̱ Jö gi 'bu̱hu̱nu̱ Nkorinto. Xi xu̱k'ahu̱ ar tsi Hmu Hesukristo, ne xi 'wek'ahu̱ go ár me̱ti'ihu̱ Jö, mahye̱giwi nu'u̱ habu̱ gatho mat'wa ár thuhu ar tsi Hmu Hesukristo, ár Hmu'u̱ ne ma Hmuhu̱ n'ehe. 3Jö ma tsi Dadahu̱ ne ar tsi Hmu Hesukristo da 'ra'ahu̱ n'ar hogam'u̱i ne da hwëk'ahu̱ yá ñho. 4Hindi tsa̱ya̱ di umba njamödi Jö, di beñ'ahu̱ ne ya ñho xi hwëk'ahu̱ Jö, ngetho gi 'bu̱hwihu̱ ar tsi Hmu Hesukristo. 5Ngetho gi 'bu̱hwihu̱, xa xi nhwëk'ahu̱ nze̱ye̱ ya ñho, xa ja te gi möñhu̱, ne gi pe̱'su̱ ar mfödi xiñho. 6Ne xi nheki xi mpe̱ ha ri m'u̱ihu̱ nunar mhö da xi'ahu̱ ndi no̱nga ar tsi Hmu Hesukristo. 7Xa gi pe̱'sfu̱ gatho yá nt'uni Jö, hinte gi k'athu̱, gi to̱'mthohu̱ da penga ar tsi Hmu Hesukristo. 8Nö'ö n'ehe ma da ze̱t'a ri ñ'emu̱ihu̱, ne njap'u̱ da za̱ gi tso̱ñhu̱ hár ngöts'i ar 'ñu, ne hinte di ja te da thös'ahu̱ majöni har ngöxapa da penk'ö. 9Jö o̱t'a nö'ö mö, ne go gehnu̱ togo bi zo'ahu̱ gi ntsixkwihu̱ ár T'u̱, gehnu̱ ma tsi Hmuhu̱ Hesukristo. 10Tsi kuhu̱, di a̱'ahu̱ ar möte hár thuhu ar tsi Hmu Hesukristo, gi ñöhu̱ n'adar mhö, ne hinda nja ya ñhege. Mahyoni gi pe̱'su̱ n'adar mfeni ne n'at'wu̱ gi pe̱hu̱. 11Tsi kuhu̱, xta o̱de xi mönga yá mëni ar Kloe, enö hingi beñhu̱ mahye̱gi ne gi ntsa̱hñökihu̱. 12Gehnu̱ di ne ga beñ'ahu̱, 'ra gi eñhu̱: Nuga ár me̱tigi ar Pablo. Ma'ra gi eñhu̱: Ár me̱tigi ar Apolo. Ha ma'ra: Ár me̱tigi ar Pedro. Ne ma'ra gi eñhu̱: Ár me̱tigi ar Kristo. 13Hage xi nxe̱nga ar tsi Hmu Hesukristo 'mu̱. Hage bi ts'u̱ta har pont'i ar Pablo ne njap'u̱ xka mpo̱hu̱. Wa ga nxixthehu̱ hár thuhu ar Pablo. 14Di umba njamödi Jö hinto xta xixthe'ihu̱, ho̱nse̱ ar ku Krispo ne ar ku Gayo. 15Njap'u̱ hinto da tsa̱ da ñ'enö xi nxixthe ha ma thuhu. 16Da xixthe yá mëni ar ku Estefana n'ehe. Hindi beni ha xta xixthe ma'ra. 17Ar tsi Hmu Hesukristo himbi me̱nkagi ga xixthe. Bi me̱nkagi ga mönga ar hoga mhö; hinge ngu ár mfödi ya meximha̱i, ne njap'u̱ da hñökwa ár ts'e̱di ár ndöte ar tsi Hmu Hesukristo har pont'i. 18Nunar mhö no̱nga ár ndöte ar tsi Hmu bi ts'u̱ta har pont'i, handa ngu n'ar 'be̱mfeni nu'u̱ togo xi m'e̱di. Ha nuju̱ togo xta mpo̱hu̱, gehnu̱ ár ts'e̱di Jö xi t'akagihu̱. 19Ngetho njanu̱ enga hár T'ofo Jö: Ma ga hwatwabi yá mfödi nu'u̱ togo ja yá mfödi, ne ma ga e̱mba yá mfeni nu'u̱ togo xa ti yá mfeni. 20Hinjo'o n'ar nimfenipya. Hingi thinga n'ar böt'ofo. Habu̱ tsa̱ da thinga n'a togo thö xiñho nuya payu̱. Ngetho Jö handwa yá mfeni ya meximha̱i ngu n'ar 'be̱mfeni. 21Jö xa döta ár mfödi, ne bi hñuts'i hinge nda bö ya jö'i togo'ö di te̱nda yá mfödise̱. Jange bi beñ'ö mar ñho nda po̱ nu'u̱ nda ñ'emu̱i ar hoga mhö xi t'enö, mödi handa ya jö'i ngu ar 'be̱mfeni. 22Nuya xodyo a̱di da hyanda ya nt'udi, ne nu'u̱ hingya xodyo a̱di da t'uta ar mfödi. 23Ha nuju̱, di möñhu̱ ar hoga mhö no̱nga ar tsi Hmu Hesukristo bi ts'u̱ta har pont'i. Nunar mhönu̱ japi da mfe'sa nuya xodyo, ne handa ngu n'ar 'be̱mfeni nu ma'ra hingya xodyo. 24Ha nu'u̱ togo xi zohna Jö, ngu ya xodyo wa hingya xodyo, nunar tsi Hmu Hesukristo gehnu̱ ár döta mfödi ne ár ts'e̱di Jö xi ñ'udi. 25Ngetho nö'ö benga ya jö'i n'ar 'be̱mfeni pe̱ Jö, töpatho yá mfödi gatho ya jö'i. Ha nö'ö hant'u̱ hinte ja ár ts'e̱di Jö, töpatho ár ts'e̱di gatho ar meximha̱i. 26Hyanthu̱ xiñho tsi kuhu̱, tengu xi zo'ahu̱ Jö. Hinge ngar nze̱ye̱hu̱ ngi pe̱'su̱ ar mfödi ngu benga ya meximha̱i, hinte mi ja ri ts'e̱dihu̱, hinte mi ja ri nsuhu̱. 27Nö'ö handa ya meximha̱i hinte pe̱'sa ár mfödi, go xi hwahna Jö da 'be̱twa yá tsa̱ ya nimfeni. Ne nö'ö beñ'u̱ hinte ja ár ts'e̱di, gehnu̱ xi hwahna Jö da 'be̱twa yá tsa̱ nu'u̱ ja yá ts'e̱di emp'ö. 28Ne nö'ö xi nt'u̱tsa, xi t'e̱i, ne nö'ö hinter me̱'ö, gehnu̱ xi hwahna Jö da hwata nö'ö pe̱'sa ár nsu. 29Njap'u̱ hinto tsa̱ da 'ñexa ár nsu hár nthandi'ö. 30Jö bi te̱tju̱ nga 'bu̱hwihu̱ ar tsi Hmu Hesukristo. Ne njap'u̱ bi t'akagihu̱ ar hoga mfödi, bi t'engagihu̱ hinte ma ts'oki di tuhu̱, xi nt'axkagihu̱, ne xi ts'imgagihu̱ har ts'oki ndi 'bu̱hu̱. 31Bi tho njap'u̱ ngu enga har T'ofo: Nu togo exa ár nsu, dá 'ñexa ár nsu 'bu̱hwi ar tsi Hmu.

will be added

X\