RA ROMANU 5

1Nubyá Ajua̱ xa ma̱ gue ya hinte ma ts'oqui dí tuhʉ ngue'a̱ stá camfrihʉ'a̱, hangue ya dí 'bʉhʉ te rá entho con gue'a̱ por ma Zidadahʉ ra Jesucristo. 2Nehe ngue'a̱ dá camfrihʉ ma zi Hmuhʉ ra Jesucristo, hangue ya stá jonihʉ co Ajua̱ ra Dada ne stá tsʉtuahʉ rá hñoja̱'i'a̱. Y nubyá ya dí 'bʉhʉ ja nú'a̱ ra hñoja̱'i'a̱, ne dí tø'mhʉ co ndunthi ra johya nú'a̱ ra pa ga 'bʉhʉ ja rá nsunda Ajua̱. 3Y hingue hønsɛ dí johyahʉ por gue'a̱, nehe rí 'ñepi ga johyahʉ ora dí thohʉ ya ts'othogui, ngue'a̱ dí pa̱dihʉ gue ya ts'othogui ri jacjʉ ga zɛdihʉ. 4Y nu'bʉ ga zɛdihʉ, ga pøñhʉ 'radyá hoga gamfrihʉ, y por guehna ma'na da nda̱ngui ma nthø'matehʉ. 5Y nuna nthø'matena̱ hinda ma da njabʉtho nepʉ ga 'bɛ ma tsahʉ, ngue'a̱ ra Ma̱ca Nda̱hi nú'a̱ xa t'acaguihʉ xa 'ñutcahʉ xá hño gue Ajua̱ ma̱caguihʉ. 6Dí pa̱hʉ gue Ajua̱ ma̱caguihʉ, ngue'a̱ ja nú'a̱ ra pa xqui beni'a̱, bá pɛhna ma zi Hmuhʉ ra Jesucristo pa bi du po rá nguecjʉ nújʉ ndyá da̱dits'oquihʉ, ngue'a̱ nujʉ otho ma ts'ɛdihʉ pa ga mpøhøsɛhʉ. 7Xi xá hñei to da ne da du po rá ngue 'nará miqu'eiui nú'a̱ di øthma̱ xá hño, pe ja ra ora da za 'na da rezga da du po rá ngue 'nara hoja̱'i. 8Pe Ajua̱ xa 'ñutcaguihʉ tengu rá nda̱ngui rá hma̱te nú'a̱ pɛscahʉ, ngue'a̱ masque 'nandyá da̱dits'oquihʉ, pe bá pɛhna ma zi Hmuhʉ ra Jesucristo pa bi du po rá nguecjʉ. 9Y núbya ya gue nu'á̱ bi du pa bi ña̱ngaguihʉ co rá ma̱ca ji, ne ya hinte ma ts'oqui dí tuhʉ, nu'bʉ́ nubyá go dí tø'mhʉ gue nu'á̱ da ña̱ngaguihʉ de rá cuɛ Ajua̱ sta 'ñepʉ. 10Nujʉ ndí ncontrahʉ co Ajua̱, pe nubyá dí má̱dihʉ con gue'a̱ po rá du rá ma̱ca T'ʉ. Y núbya stá má̱dihʉ con gue'a̱, dí pa̱dihʉ gue ma ga mpøhøhʉ po rá te'a̱. 11Pe hingue hønsɛ'a̱, nehe nujʉ dí johyahʉ ndunthi ngue'a̱ dí 'bʉhʉ xá hño co Ajua̱ por nú'a̱ bi 'yøt'e ma zi Hmuhʉ ra Jesucristo, ngue'a̱ por nú'a̱ bi 'yøt'e'a̱ ya stá má̱dihʉ co Ajua̱. 12Hangue nu mi yʉt'a ra ts'oqui gatho ja ra meximhai, bi yʉt'i po nú'a̱ bi 'yøt'a 'nara 'ñøhø, y go gue'a̱ numa mʉdi dadahʉ. Nehe po rá nts'o'yøde'a̱ ra du bi yʉt'i ja gatho ya ja̱'i, ngue'a̱ xa t'øt'a ra uɛnda gue gatho bi 'yøt'a ra ts'oqui. 13Hangue ante da thuxa ra ley ya mi ja ra ts'oqui ja ra ximhai, pe nú'ʉ ya ts'oqui bi t'øt'e himbi tha̱nga nguɛnda ngue'a̱ hinxqui thusta ra ley, ngue'a̱ hingui tsa da tha̱nga nguɛnda ya ts'oqui nu habʉ otho ni 'nara ley. 14Pe madi njabʉ, ra du bi nta̱te ja ya ja̱'i desde ra Adá asta ra Moise, masque nú'ʉ ya ja̱'i'ʉ himbi 'yøt'a ngu nú'a̱ ra nts'o'yøde bi 'yøt'a ra Adá. Nura Adá po nú'a̱ bi 'yøt'asɛ hangue bi nja ra du pa gathoguihʉ; njabʉ nehe bi 'ñehe ra Zidada Jesucristo bi 'yøt'asɛ pa bi nja ra te pa nza̱ntho. 15Pe nú'a̱ ra ts'oqui bi 'yøt'a ra Adá hinga ra da̱ngui ngu nú'a̱ ra 'baha bi unga Ajua̱ dega hñoja̱'i. Po rá ngue rá ts'oqui 'nadra 'ñøhø bi nja ra du pa gatho, pe Ajua̱ po rá hñoja̱'i bá pɛhna 'nadra 'ñøhø nehe pa da unga ra te pa nza̱ntho ngu 'nara 'baha pa gatho ya ja̱'i po rá hñoja̱'i nú'a̱ 'nadra 'ñøhø. Y nura 'ñøhø'a̱ go gue'a̱ ma Zidadahʉ ra Jesucristo. 16Ra ts'oqui dí tuhʉ por nú'a̱ bi 'yøt'a 'nada ra ja̱'i hinga ra da̱ngui ngu nú'a̱ ra 'baha xa t'acjʉ. Ajua̱ bi hña̱'mba nguɛnda de nú'a̱ 'nadra ts'oqui, ne bi 'yɛ'mba ra du pa gatho ya ja̱'i; pe 'mɛfa Ajua̱ po rá hñoja̱'i bi unga nura 'baha'a̱ masque ya ja̱'i xi xqui 'yøthma̱ ndunthi ya ts'oqui, pe Ajua̱ bi ma̱ gue ya hinte ma ts'oqui mi tu. 17Ya gue bi nta̱te ra du po nú'a̱ ra ts'oqui bi 'yøt'a 'nada ra 'ñøhø, pe nubyá nú'ʉ to'o xa hña̱ni nú'a̱ ra 'baha xa unda Ajua̱ po rá hñoja̱'i y xa hña̱ni nura noya gue nu'ʉ́ ya hinte ma ts'oqui tu, nu'ʉ́ ma go da nda̱'ʉ ja nú'a̱ ra te xa 'ñepʉ po rá ngue nú'a̱ bi 'yøt'a 'nada ra 'ñøhø, y nura 'ñøhø'a̱ go gue'a̱ ma zi Hmuhʉ ra Jesucristo. 18Hangue por nú'a̱ ra ts'oqui bi 'yøt'a 'nada ra 'ñøhø, Ajua̱ bi 'yɛ'mba ra du pa gatho ya ja̱'i, y nehe por nú'a̱ ra hoga 'bɛfi bi 'yøt'a 'nada ra 'ñøhø, Ajua̱ ena pa gatho ya ja̱'i gue ya hinte ma ts'oqui tu'ʉ ne umbabi'ʉ ra te. 19Po 'nara ts'o'yøde gá 'ñøhø, bi japi bi nts'oqui gatho ya meximhai, njabʉ nehe po 'nara hoga'yøde, ndunthi da t'embi gue ya hinte ma ts'oqui tu. 20Pe 'mɛfa bi nja ra ley pa ma'na bi ndunthi ya nts'o'yøde. Y masque xa ndunthi ya nts'o'yøde, ma'na xa nda̱ngui rá hñoja̱'i Ajua̱. 21Masque ra ts'oqui xi bi nta̱tehma̱ ngue'a̱ bi nja ra du, pe ma'na bi nta̱te rá hñoja̱'i Ajua̱, ngue'a̱ po rá hñoja̱'i'a̱ nu'á̱ ma̱ gue nujʉ ya hinte ma ts'oqui dí tuhʉ, ne xa 'racaguihʉ ra te pa nza̱ntho po ma Zidadahʉ ra Jesucristo.

will be added

X\