RA ROMANU 14

1Umfʉ nsɛqui da 'mʉi ja ri nija̱hʉ nú'a̱ to'o otho ndunthi rá jamfri, pe hingue pa gui ntsanoyahʉ con gue'a̱ de nú'ʉ ya mfeni xa gʉ. 2Ngue'a̱ 'ra camfri gue tsa da zi gatho nú'a̱ ja te da ts'i; ha nu'ʉ ma'ra tó'o otho ndunthi yá jamfri hingui ne da zi nu'a̱raza, hønsɛ ya zi c'ani. 3Nu'a̱ tó'o tsi gatho nú'a̱ te ts'i, odi ʉtsa nú'a̱ to'o hingui tsi. Ha nu'a̱ tó'o hingui tsi gatho nú'a̱ te ts'i, odi 'yø de nú'a̱ to'o tsi, ngue'a̱ nu Ajua̱ bi 'yøt'a rá ba̱tsi nu mi camfri'a̱. 4¿To'o'ihʉ pa guí 'yøbihʉ rá 'bɛgo ma'na ra ja̱'i? ¿Ha hinguí pa̱hʉ gue nurá hmu nú'a̱ ra 'bɛgo'a̱ go gue'a̱ da ma̱ ua 'yo xá hño ua hina? Y njabʉtho nehe nuya cu'ʉ, go guesɛ Ajua̱ ma da ma̱ ua xá hño o hingui ho nú'a̱ øt'e'ʉ, hangue nu'ʉ́ ma da 'mʉi xá hño ja rá thandi Ajua̱ ngue'a̱ go guesɛ'a̱ ja rá ts'ɛdi pa da mats'i'ʉ. 5'Ra camfri gue mathoni da thahna 'raya pa pa dra søcambeni Ajua̱, ha nu ma'ra camfri gue gatho ya pa rí 'ñepi da thandi mahyɛgui. Cada 'na rí 'ñepi da ba̱di xá hño de nú'a̱ te beni. 6Nu'ʉ tó'o ri jamasu de ra pa, øt'e njabʉ pa da ho ra Zidada, ha nu'ʉ tó'o hini jamasu de ra pa, nehe øt'e njabʉ pa da ho ra Zidada. Y nu'ʉ tó'o tsi gatho nú'a̱ te ts'i, nu'ʉ́ tsi pa rá nsunda Ajua̱, ngue'a̱ ri umba njama̱di Ajua̱. Ha nu'ʉ hingui tsi gatho nú'a̱ te ts'i, nu'ʉ́ øt'e'ʉ pa rá nsunda Ajua̱, y umba njama̱di Ajua̱ nehe. 7Ngue'a̱ ni 'na de guecjʉ hindí tehʉ pa ga øthʉ nú'a̱ go ga nesɛhʉ, y nu xcrá tuhʉ, hingo nú'a̱ ra ora go ga huansɛhʉ. 8Ngue'a̱ nu'bʉ dí tehʉ dí ohʉ ja rá 'yɛ ra Zidada ne dí 'bʉhʉ pa rá nsunda'a̱, y nu'bʉ ga tuhʉ guet'atho dí ohʉ ja rá 'yɛ ne dí 'bʉhʉ pa rá nsunda'a̱. Hangue nujʉ, nza̱ntho dí ohʉ ja rá 'yɛ gue gra tehʉ gue hina. 9Ngue'a̱ pa guehna bi du ra Zidada Jesucristo y bi yopa nte pa bi Hmu de nú'ʉ te y de nú'ʉ xa du. 10Hangue nu'ahʉ ¿pa te guí 'yø ri cuhʉ? O ¿pa te guí ʉtsahʉ ri cuhʉ? Ngue'a̱ nu xcrá tuhʉ gathoguihʉ ma ga 'baihʉ ja rá thandi ra Zidada pa go da hña̱bgahʉ nguɛnda'a̱. 11Ngue'a̱ ma da njabʉ ngu xa t'ofo ja ra Ma̱ca T'ofo ne ena: Nugui drá Ajua̱ dí te, hangue ma da njabʉ nú'a̱ ma ga ma̱ nubya, gue gatho ya ja̱'i ma da ndandiña̱hmu ja ma thandi, ne da xøcambenigui. 12Hangue cada 'na de guecsɛhʉ ma ga daphʉ nguɛnda Ajua̱. 13Hangue hinga 'ñøhʉ 'na ngu ma'na. Nu'a̱ ga øthʉ ha̱, ma ga nsusɛhʉ pa hinga japhʉ ma cuhʉ da 'yøt'a 'nara ts'oqui. 14Nugui dí pa̱di xá hño gue gatho nú'a̱ ja da ts'i hinxá nts'o, ngue'a̱ njabʉ xa 'ñutcagui ra Zidada Jesucristo. Pe nu'a̱ tó'o beni gue xá nts'o 'nara t'øt'e nú'a̱ ts'i, pa nú'a̱ to'o beni njabʉ ha̱, xá nts'o. 15Hangue nu'bʉ guí tsi 'nara t'øt'e nú'a̱ beni'a̱ ri cu gue hingui ho da ts'i, y njabʉ da du rá mʉi, nu'bʉ́ nu'i ya hinguí 'yo co ra hma̱te. Oxqui tsi 'nara t'øt'e nú'a̱ da japi da 'mɛdi ma'na, ngue'a̱ nehe po rá ngue'a̱ bi du ra Zidada Jesucristo. 16Hangue oguí honi pa hanja da hña̱ma'ñʉ'i, masque nu'i guí beni gue xá hño nú'a̱ guí øt'e. 17Nújʉ dí 'bʉhʉ ja rá hmanda Ajua̱, hingui oda ma mfenihʉ ya hñuni nixi ya ts'ithe. Nu'a̱ oda ma mfenihʉ, nú'a̱ ga 'yohʉ xá hño, ne ga 'bʉhʉ te rá entho, ne ga johyahʉ co nú'a̱ ra johya ri 'racaguihʉ ra Ma̱ca Nda̱hi. 18Y nu'a̱ tó'o pɛpa ra Zidada Jesucristo co nuya hoga 'bɛfiya, Ajua̱ ri ho'a̱. Nehe ya ja̱'i ma da hyandi gue 'yo xá hño'a̱. 19Hangue ga øthʉ nú'a̱ faxcaguihʉ pa ga 'bʉhʉ 'nara hoga'mʉi 'na ngu ma'na, ne pa ga ntetua jamfrihʉ 'na ngu ma'na. 20Oxqui ts'ocua rá 'bɛfi Ajua̱ por nú'a̱ te gui tsi. Xi majua̱ni gatho nú'a̱ te ts'i xá nt'axi, pe hingui ho gui tsi nú'a̱ gui japi da nts'oca ri cu. 21Xá hño hingui tsi ra ngø, nixi gui tsi ra vinu, nixi gui 'yøt'a ni 'nara t'øt'e nú'a̱ gui japi da ts'ocua rá mfeni ri cu pa da zo ja ra ts'oqui o pa da ts'ocua rá jamfri. 22Nu'bʉ guí camfri da za gui tsi gatho nú'a̱ te ts'i, nu'bʉ́ zɛ ri jamfri guí pɛ'tsi ne pa̱sɛui Ajua̱. Nu'a̱ tó'o beni gue xá hño nú'a̱ øt'e, ne 'mɛfa hinda ma da dʉhʉ de nú'a̱ xa 'yøt'e, go gue'a̱ nja̱pi ngue'a̱ pa̱di gue xa 'yøt'e xá hño. 23Pe nu'a̱ tó'o ri dʉhʉ de nú'a̱ te tsi, nú'á̱ tu ra thai, ngue'a̱ hingui tsi co rá jamfri, y gatho nú'a̱ dí øthʉ ne 'bʉ dí camfrihʉ gue hinxá hño, gue'a̱ 'nara ts'oqui.

will be added

X\