RA APOCALIPSI 9

1Y nu mi mist'a rá trompeta nurá ncʉt'a ra ɛnxɛ, dá handa 'nara tsø xqui dagui de mahets'i pa ja ra ximhai, y nura tsø'a̱ bi t'umbabi ra nsoqui pa bi xoqui ne bi xo'tsua rá ne nú'a̱ ra o'tsi otho habʉ bí c'a. 2Y nu mi xo'tsa nú'a̱ ra o'tsi'a̱, bi bøts'e de guehni 'nara 'bifi ngu rá 'bifi 'nara da̱nga ut'i, ne bi juta ra hyadi asta bi 'mɛxuui co nú'a̱ ra 'bifi mi 'yo ja ra nda̱hi. 3Y ja ra 'bifi ja mbra ehni 'raya nc'oto, nepʉ bi nxani'ʉ ja ra ximhai ne bi t'umba ra ts'ɛdi ngu yá ts'ɛdi ya penzʉ pa da ntsate. 4Nuya nc'oto'ʉ bi sipi gue hinda zi ni 'nara c'ama nda̱po, nixi ya za. Nu'ʉ́ bi sipi gue da za hønsɛ nú'ʉ ya ja̱'i hingui pɛ'tsua rá seyo Ajua̱ ja yá de. 5Bi t'umba nsɛqui da 'yøt'a njabʉ hønsɛ pa da japi da sufri ya ja̱'i cʉt'a za̱na̱, pe hingue pa da hyo. Y nuyá 'ñʉ yá ne nú'ʉ ya nc'oto ngu rá 'ñʉ rá ne 'nara ts'o penzʉ ora tsa 'nara ja̱'i. 6Nuya pa'ʉ ya ja̱'i da nehma̱ da du, pe ma da 'ñotho ra du pa gue'ʉ. 7Nú'ʉ ya nc'oto'ʉ mi hnequi ngu 'raya fani xa hñoqui pa ra tuhni, y mi hu'tsa ja yá ña̱xu'ʉ ngu 'nara corona dega oro, y nuyá hmi mi ngu yá hmi ya ja̱'i. 8Ne xi xmá ma yá sta̱ ngu yá sta̱ ya 'bɛhña̱, y nuyá ts'i mi ngu yá ts'i ya zate. 9Y de ja yá ndo'yo mi pɛ'tsa 'nara nthaqui ngu dega bøja̱, ne nuyá mbʉni de yá hua mi ngu rá mbʉni ya carro nú'ʉ ri gʉt'a ya fani 'yo ja ra tuhni. 10Y yá cola mi nja ngu yá cola ya penzʉ co ya 'bite, y nuyá 'bite mi pɛ'tsa ra ts'ɛdi pa da japi da sufri ya meximhai cʉt'a za̱na̱. 11Y nú'a̱ ra ts'o'ɛnxɛ 'bʉ ja ra o'tsi nú'a̱ otho habʉ bí c'a go gue'a̱ mrá nda̱ de nuya nc'oto'ʉ. Nura ɛnxɛ'a̱ dega ebreo rá thuhu ra Abado, y dega griego ra Apolyo nú'a̱ rí bøni da 'ñena ra hyote. 12Nurá mʉdi ra ts'othogui ya bi uadi, pe ri 'bɛdi má yoho. 13Y nu mi mist'a rá trompeta nurá 'rato ra ɛnxɛ, 'bestho dá øde 'nara noya mi pøni de ja nú'ʉ goho ya nda̱hi de ra ata dega oro nú'a̱ mi ja de ja rá thandi Ajua̱. 14Y nú'a̱ ra noya'a̱ bi 'ñembabi nú'a̱ rá 'rato ra ɛnxɛ to mi ha̱ ra trompeta: ―Xo'ta nú'ʉ goho ya ɛnxɛ tha̱t'a ja rá hyo ra da̱the Eufrate. 15Y bi so'ta nú'ʉ goho ya ɛnxɛ xqui hñoqui xqui dø'mi pa 'bestho ra ora'a̱ da hyo 'na de hñu parte ya ja̱'i de ra ximhai. 16Y dá øde hangu yá ndunthi nú'ʉ yá soldado mi tøgue yá fani, dá øde gue mi yo nthebe 'mo ya 'mo. 17Njaua dá handi gatho nú'a̱ bi 'ñutca ra Ma̱ca Nda̱hi dega thedi: Nu'ʉ tó'o mi tøgue yá fani, mi ha̱ yá nthaqui ja yá tiña̱, ne xi mi huɛxqui dega thɛni ne dega c'angui ne dega c'ast'i. Ne nuyá ña̱xu ya fani mi ngu yá ña̱xu ya zate, y de ja yá ne'ʉ mi pøni ra tsibi ne ra 'bifi ne ra asufre. 18Nu'a̱ ra tsibi ne ra 'bifi ne ra asufre mi pønga ja yá ne'ʉ, bi japi bi nja ya ts'othogui asta bi du 'na de hñu parte ya ja̱'i de ra ximhai. 19Hangue nú'ʉ ya fani'ʉ mi ho ya ja̱'i co yá ne ne co yá cola, ha nuyá cola mi ngu 'nara qu'eña̱ mi ja rá ña̱xu ne mi tsate, y njabʉ mi ø'tua ra 'ñʉ ya ja̱'i. 20Y nu'ʉ ya ja̱'i himbi du co nuya ts'othogui'ʉ, himbi ne bi ñobri'ʉ. Bi siguitho bi xøcambeni ya ts'onda̱hi ne nú'ʉ ya c'oi dega oro, dega t'axi, dega bronse, dega do, ne dega za, nú'ʉ hingui handi, nixi øde, nixi ri 'yo. 21Nixi himbi ne bi ñobri'ʉ de nú'a̱ mi øt'ʉ, ngu ra nthote, ne ya nt'ete, ne de ra nt'e'bɛhña̱, ne de ya mfe.

will be added

X\