RA APOCALIPSI 6

1'Mɛfa dá handa ra T'ʉca Dɛti ora mi xø'tsa 'na de nú'ʉ ya seyo, ne dá øde 'na de nú'ʉ goho ya da̱'ɛnxɛ bi ña̱ nts'ɛdi ngu 'nara ngani, ne bi 'ñengagui: ―¡Bá ehe pa gui hyandi! 2Nepʉ de guehni dá handa 'nara tøgue mri tøgue 'nara t'axfani, y mi ha̱ 'nara flecha pa ra tuhni, ne bi t'umbabi 'nara corona. Y nu'á̱ bi ma ja ra tuhni, y nza̱ntho bi nta̱te. 3Nu mi xø'tsa rá ñoho ra seyo nú'a̱ ra T'ʉca Dɛti, dá øde rá ñoho ra da̱'ɛnxɛ bi 'ñengagui: ―¡Bá ehe pa gui hyandi! 4Ne de guehni bi bøni 'nara tøgue mri tøgue 'nara thɛnga fani, ne bi t'umba ra ts'ɛdi pa da japi da nja ya tuhni ja ra ximhai, ne da japi da nhyosɛ ya ja̱'i, ne bi t'umba 'nara da̱nga huai. 5Nu mi xø'tsa rá hñu ra seyo ra T'ʉca Dɛti, dá øde rá hñu ra da̱'ɛnxɛ bi 'ñengagui: ―¡Bá ehe pa gui hyandi! De guehni dá handa 'nara tøgue mri tøgue 'nara 'bofri, ne mi ha̱ 'nara mbɛxo. 6Ne dá øde 'nara noya madetho de habʉ mi 'ba nú'ʉ goho ya da̱'ɛnxɛ, mi ena: ―'Na huada ra trigo o hñu huada ra cebada da 'ba pa rá tha̱ha̱ 'nara mɛmapa. Pe oguí huata ya 'bai gá olivo nixi ya ua̱'obxi. 7Nu mi xø'tsa rá ngoho ra seyo nú'a̱ ra T'ʉca Dɛti, dá øtuabi rá noya rá ngoho ra da̱'ɛnxɛ, bi 'ñengagui: ―¡Bá ehe pa gui hyandi! 8Nepʉ de guehni dá handa 'nara tøgue rá thuhu ra Du mri tøgue 'nara c'ast'a fani, ne mri 'bɛfa 'na nú'a̱ xqui 'ñehe de habʉ 'bʉi nú'ʉ xa du. Bi t'umba ra ts'ɛdi pa da hyo 'na de goho parte ya ja̱'i nú'ʉ 'bʉ ja ra ximhai, pa da hyo dega huai, ne dega thuhu, ne dega ts'ohñeni, ne co ya mba̱nga zu'ue 'yo ja ra ximhai. 9Nu mi xø'tsa rá ncʉt'a ra seyo nú'a̱ ra T'ʉca Dɛti, de nja'ti ra ata dá handa nú'ʉ ya ja̱'i xqui tho po rá noya Ajua̱ ngue'a̱ mi damajua̱ni'ʉ de yá jamfri. 10Y mi ña̱ nts'ɛdi ne mi ena: ―Nu'i Ajua̱ ma Hmu'ihe, xá nsunda'i ne guí øt'a gatho nú'a̱ guí ma̱, ¿asta ha'mʉ ma gui hña̱'mba nguɛnda ya meximhai ne gui co'tsuabi de nú'a̱ xa 'yøtcahe gue bi hyogaguihe? 11Nepʉ nu'ʉ́ bi t'umbabi ya t'axa he, ne bi t'embabi gue da dø'mahma̱ asta hinda zʉdi ra 'bede de nú'ʉ ya cu xqui mpɛhui mahyɛgui, ngue'a̱ ri 'bɛtho da tho ma'ra ngu xqui tho'ʉ. 12'Mɛfa dá handi nu mi xø'tsa rá 'rato ra seyo nú'a̱ ra T'ʉca Dɛti, ne bi nja 'nara da̱nga mbimhai, ne bi 'mɛxuui nura hyadi ngu 'nara 'bohe dega behe, ne bi thɛnga ra za̱na̱ ngu ra ji. 13Nuya tsø bi dagui ngu ora ta yá fruta 'nara 'bai gá igo nú'ʉ hingui ta̱, sta nja ra bʉnthi. 14Ha nu mahets'i bi 'ñotho, ngue'a̱ bi mpants'i ngu 'nara 'bants'a hɛ'mi, ne gatho ya t'øhø ne ya t'ʉca hai o madetho ja ya ndehe bi 'mɛdi de habʉ mi ja. 15Y nú'ʉ mi 'bʉi dega nda̱ ja ra ximhai, ne nú'ʉ mi pɛ'tsa ndunthi ra nsu, ne ya rico, ne nuya nda̱ gá soldado, ne nú'ʉ to mi ja yá ts'ɛdi, bi ma'ʉ bá 'ña̱gui ja ya ma'ye. Nehe ya 'bɛgo ne nú'ʉ himyá 'bɛgo, gatho'ʉ bi ma bá 'ña̱gui. 16Gatho nú'ʉ́ mi emba ya t'øhø ne ya do: ―Yøt'ehʉ gui cobgahe pa ga 'ña̱guihe de rá thandi Ajua̱ nú'a̱ to hudi ja rá hudi, ne de rá cuɛ ra T'ʉca Dɛti pa hinte da 'yøtcahe. 17Ngue'a̱ ya bi zø ra pa da hneca rá cuɛ Ajua̱, ne jo'o to'o da za da zɛti.

will be added

X\