RA APOCALIPSI 13

1Ndí 'bai ja rá ña̱ni ra ndehe y dá handi bi c'onts'i de mbo ra ndehe 'nara mba̱nga zu'ue mi pɛ'tsa yoto yá ña̱xu ne 'rɛt'a yá nda̱ni, ne cada 'nará nda̱ni mi tøgue 'nara corona, y cada 'nará ña̱xu xqui t'ofo 'nara thuhu dega ts'one nú'a̱ mi ña̱ma'ñʉ de Ajua̱. 2Nú'a̱ ra zu'ue dá handi, mi hnequi ngu 'nara tigre, yá ua mi ngu yá ua 'nara 'muhu, y rá ne mi ngu rá ne 'nara zate. Nú'a̱ ra da̱nga mba̱nga zu'ue ngu ra qu'eña̱ mi umbabi rá ts'ɛdi ne ra nsɛqui pa da nda̱ ja rá luga'a̱. 3Y dá handa 'na de nú'ʉ yá ña̱xu xqui ts'ɛni ngu pa da du, pe bi ña̱ni rá nts'ɛni, y gatho ya ja̱'i de ra ximhai bi hyandi ne bi 'yø'ʉ ne bi dɛni'a̱. 4Nepʉ nu'ʉ́ bi xøcambeni nú'a̱ ra da̱nga mba̱nga zu'ue ngu ra qu'eña̱ ngue'a̱ xqui umba ra ts'ɛdi nú'a̱ ma'na ra zu'ue. Nehe bi xøcambeni'ʉ nú'a̱ ra zu'ue ne mi ena'ʉ: ―¿To'o ngu nuni ra zu'ue? Ne ¿to'o ja rá ts'ɛdi pa da ntunhuini? 5Ne bi t'umba nsɛqui pa bi nøt'e ne pa bi ña̱ma'ñʉ de Ajua̱. Nehe bi t'umbabi ra ts'ɛdi pa bi manda ñotemayoho nza̱na̱. 6Bi njabʉ, bi ña̱ma'ñʉ de Ajua̱ y bi zanbabi rá thuhu, nehe bi zanga ra ma̱ca luga habʉ bí 'bʉ Ajua̱, ne gatho nú'ʉ to'o 'bʉhni. 7Nehe bi t'umba nsɛqui pa da ntunhui ya gamfri ne da nta̱te'a̱. Ne bi t'umba ra ts'ɛdi pa bi nda̱ ja gatho ya 'mʉi gá ja̱'i, ja gatho ya hnini, ja gatho ya hña̱qui, ne ja gatho ya hai. 8Nu'ʉ tó'o ante da thoca ra ximhai bi t'opa yá thuhu ja ra libro habʉ xa thu'tsua yá thuhu nú'ʉ to ma da nte pa nza̱ntho, nu'ʉ́ hinda ma da xøcambeni nura zu'ue'a̱. Pe nu ma'ra ya ja̱'i ha̱, gatho'ʉ ma da xøcambeni'a̱. Nura libro habʉ huxa yá thuhu nú'ʉ to'o ma da nte pa nza̱ntho go rá mɛti ra T'ʉca Dɛti nú'a̱ bi du. 9Nu'a̱ tó'o ne da ba̱di, dá ba̱di nú'a̱ ma ga ofobya. 10Nu'ʉ tó'o tsiste nts'a̱hni, nehe'ʉ da ts'ixa nts'a̱hni. Y nu'ʉ tó'o hote co ra huai, nehe'ʉ da tho co ra huai. Hangue nuya gamfri dí 'ñepabi da zɛdi yá jamfri, pa hinte da 'yøt'e masque da ts'ixa fadi o da tho. 11'Mɛfa dá handa ma'na ra mba̱nga zu'ue bi c'onts'i de mbo ra hai mi pɛ'tsa yoho yá nda̱ni ngu yá nda̱ni 'nara dɛti, pe rá noya mri nt'øde ngu 'nara da̱nga mba̱nga zu'ue 'ñena 'nara qu'eña̱. 12Y gatho nú'a̱ mi øt'e'a̱, mi øt'e co nú'a̱ ra ts'ɛdi xqui umbabi nú'a̱ rá mʉdi ra mba̱nga zu'ue, ne mri mpɛfi ja rá thandi'a̱, ne mi japa gatho ya ja̱'i de ra ximhai da xøcambeni nú'a̱ ra mʉdi zu'ue nú'a̱ xqui mɛ'tsa 'nara nts'ɛni ne xqui ña̱ni. 13Nehe mi øt'a ndunthi ya da̱nga nt'udi, y asta mi japi da dagui ya tsibi de mahets'i pa ja ra ximhai ja yá thandi ya ja̱'i. 14Y co ya nt'udi nú'ʉ xqui thopi da 'yøt'e ja rá thandi nú'a̱ ra mʉdi zu'ue, mi hat'a ya meximhai. Nepʉ bi 'bɛpabi ya ja̱'i da hyoca 'nara c'oi de nú'a̱ ra mʉdi zu'ue xqui ts'ɛni co 'nara mahuai pe himbi du. 15Nehe bi t'umba ra ts'ɛdi pa bi japi bi nte nurá c'oi nú'a̱ ra mʉdi zu'ue, pa bi za bi ña̱ ne pa bi manda da tho gatho nú'ʉ to'o himbi ne bi xøcambeni nura c'oi'a̱. 16Nehe bi manda da thu'tsuabi 'nara seña ja yá 'ñɛi o ja yá de gatho ya ja̱'i, ngu ya notsi ngu ya da̱ngui, ngu ya rico ngu ya hyoya, ngu ya 'bɛgo ne ngu nú'ʉ hingyá 'bɛgo. 17Y nu'ʉ tó'o mi pɛ'tsa ra hmeya o rá thuhu ra zu'ue o rá numero rá thuhu, hønsɛ'ʉ mi tsa te da dai ne te da pa. Pe nu'ʉ ma'ra, hina. 18Pa da za to da ba̱di te dí bønga núna bi t'utcagui, mahyoni di ja ndunthi rá mfa̱di pa da za da mede nura numero pɛ'tsa nura zu'ue, ngue'a̱ nura numero'a̱ gue'a̱ ngu rá thuhu 'nara 'ñøhø, y nura numero'a̱ gue'a̱ 'rato nthebe ne hñu'rate ne 'rato.

will be added

X\