RA APOCALIPSI 11

1Nepʉ bi t'aca 'nara xithi pa ra t'ɛni, ne bi t'engagui: ―Grí ma gui 'yɛni rá nija̱ Ajua̱ ne ra ata, ne gui pede nú'ʉ 'bʉhni ri xøcambeni Ajua̱. 2Pe nura patio nú'a̱ ja de møte rá nija̱ Ajua̱, oxqui ɛni, ngue'a̱ nura patio'a̱ xa t'umba nú'ʉ ya ja̱'i hingyá xodyo, y nu'ʉ́ ma da net'a ra ma̱ca hnini ñotemayoho nza̱na̱. 3Y ma ga pɛhna nú'ʉ yoho ma 'mɛhni pa da ma̱nga ma noya 'na 'mo ne yo nthebe hñu'rate ma pa, y ma da hye yá he dega behe. 4Nú'ʉ ya 'mɛhni'ʉ gue'ʉ ngu nú'ʉ yo 'bai ya olivo ne ngu nú'ʉ yoho ya mfoxyo 'bai ja rá thandi Ajua̱ nú'a̱ to'o ra nda̱ de ra ximhai. 5'Bʉ da ne to'o te da 'yø'tuabi'ʉ, da bønga ya tsibi de yá ne'ʉ pa da hyo nú'ʉ yá ncontra. Y njabʉ da du nú'ʉ to'o da ne te da 'yø'tua'ʉ. 6Nu'ʉ́ pɛ'tsa ra ts'ɛdi pa hinda hopi da 'ua̱i nú'ʉ ya pa ma da xipa ya ja̱'i de nú'a̱ ma da nja. Nehe pɛ'tsa ra ts'ɛdi pa da japi da nji ya dehe, ne da japi da nja ya ts'othogui habʉraza ja ra ximhai. Y nu'ʉ́ da 'yøt'a njabʉ nú'ʉ ya 'mi'qui da ne'ʉ. 7Pe nu stí uadi da ma̱nga nú'a̱ te ma da nja, ma da bøxa 'nara mba̱nga zu'ue de ja ra o'tsi nú'a̱ otho habʉ bí c'a pa da ntunhui'ʉ, y ma da nta̱te nú'a̱ ra mba̱nga zu'ue, hangue da hyo'ʉ. 8Nuyá ndo'yo'ʉ ma da gohi di 'boni habʉraza ja ya 'ñu de ra da̱nga hnini nuni habʉ bri pont'a ma Zidadahʉ. Nura hnini'a̱ da za ga hyɛcuahʉ co ra hnini Sodoma ne de Egipto, y ja rá thandi Ajua̱ xi xá nts'o nuya hnini'ʉ. 9Ya ja̱'i de gatho ya hnini, de gatho ya 'mʉi gá ja̱'i, de gatho ya hña̱qui, ne de gatho ya hai, ma da hyandua yá ndo'yo nú'ʉ yoho ya 'mɛhni da 'moni hñu pa made, pe hinda thopi to da 'yagui'ʉ. 10Y nuya meximhai da johya'ʉ ne da 'ñumba 'baha sɛhɛ'ʉ ngue'a̱ ya xqui tho nú'ʉ yoho ya 'mɛhni to'o xi xqui 'yøt'a ra xuhña pa gatho ya meximhai. 11Pe 'mɛfa de nú'ʉ hñu pa made, Ajua̱ bi japi bi yopa nte, nepʉ bi nangui'ʉ, y nú'ʉ to bi hyandi'ʉ xi bi ntsu. 12Nepʉ bi nt'øde 'nara noya de mahets'i mi ña̱ nts'ɛdi ne bi 'ñembabi nú'ʉ to'o xqui yopa nte: ―Bá pøxhʉ grí 'ñehʉua. Nepʉ ja 'nara guui bi ts'its'i'ʉ pa mahets'i. Y nú'ʉ yá ncontra'ʉ bi hyandi. 13Nura ora'a̱ bi nja 'nara da̱nga mbimhai, ne bi yunt'a 'na de 'rɛt'a parte de ra hnini co nú'a̱ ra mbimhai, ne bi du yoto 'mo ya ja̱'i, ha nu'ʉ tó'o himbi du xi bi ntsu, ne bi nsunda Ajua̱ nú'a̱ 'bʉi mahets'i. 14Nurá ñoho ra ts'othogui ya bi uadi, pe 'bestho ma da nja nú'a̱ rá hñu. 15Y nu mi mist'a rá trompeta nurá yoto ra ɛnxɛ, 'bestho bi nt'øde 'raya noya de mahets'i mi ña̱ nts'ɛdi, mi ena: Nubyá gatho nuya hmanda mi ja ja ra ximhai, ya go o rá 'yɛ ma Ajua̱hʉ ne ra Zidada Jesucristo nuto xa hñuts'i'a̱ pa da nda̱ pa nza̱ntho. 16Y nú'ʉ 'natemagoho ya nda̱ mi hudi ja yá hudi de ja rá thandi Ajua̱, bi ndandiña̱hmu'ʉ ne bi xøcambeni'a̱, 17ne mi ena'ʉ: Nu'i Ajua̱ ma Hmu'ihe, go gue'e guí pɛ'tsa gatho ra ts'ɛdi, go gue'e guí 'bʉi, ne nza̱ntho xcá 'bʉi, ne ma gui 'bʉi pa nza̱ntho. Dí 'ra'a'ihe njama̱di ngue'a̱ ya xi gá nda̱. 18Ya ja̱'i de ra ximhai xi xa bø yá cuɛ'ʉ con gue'e, pe ya bi zø ra pa pa da hnequi ri cuɛ, ne ma gui hña̱'mba nguɛnda gatho nú'ʉ xa du, ne ma gui umba yá tha̱ha̱ nú'ʉ ri 'mɛhni bi mɛp'a'i, ne gatho ya gamfri, ne gatho nú'ʉ to'o bi xøcambeni'i, ngu ya notsi ngu ya da̱ngui. Nehe ya bi zø ra pa pa gui huata nú'ʉ to xa ts'oca ra ximhai. 19'Mɛfa de gue'a̱ bi xogui ra ma̱ca luga nuni mahets'i habʉ 'bʉ Ajua̱, y ja bi hnequini ra arca de ra cohi, ne xi mri yot'a ya huɛi, ne mri nt'øde ya ngani, ne xi bi dagui ndunthi ya ndo ne bi nja 'nara mbimhai.

will be added

X\