RA APOCALIPSI 1

1Nuna ra noyana̱ bi ma̱ Ajua̱ ra Dada, bi xipabi ma zi Hmuhʉ ra Jesucristo pa njabʉ nehe'a̱ bi 'ñutcaguihʉ nújʉ dí pɛpabihʉ'a̱. Nú'á̱ bi 'ñutcaguihʉ nú'ʉ ya t'øt'e ma da nja 'bestho. Hangue bá pɛhna rá ɛnxɛ pa bi 'ñutcagui núga drá Xuua dí pɛpabi'a̱. 2Nuga dí damajua̱ni de rá noya Ajua̱ ne de nú'a̱ xa xicagui ra Zidada Jesucristo, ne de gatho nú'a̱ stá handi. 3Nja̱pi nú'ʉ to'o da hñe'ti ne nú'ʉ to'o da 'yøde nuya ya noya de nú'a̱ ma da nja, ne da 'yøt'a nuya ya t'øt'e xa t'ofo, ngue'a̱ ya ma da nja gatho. 4Núga drá Xuua dí op'a'ihʉ nú'ahʉ gyá gamfrihʉ grí muntshʉ gatho nú'ʉ yoto ya nija̱ nuni Asia. Ajua̱ nú'a̱ 'bʉi, ne nza̱ntho xa 'mʉi, ne ma da 'mʉi pa nza̱ntho, da ja̱p'a'ihʉ ne da max'ahʉ pa gui 'bʉhʉ te rá 'ñentho. Nehe da ja̱p'a'ihʉ nú'ʉ yoto ya nda̱hi 'bʉi ja rá thandi Ajua̱ habʉ bí hudi'a̱. 5Nehe da ja̱p'a'ihʉ ra Zidada Jesucristo nú'a̱ to'o nza̱ntho ma̱nga nú'a̱ majua̱ni. Nú'á̱ go gue'a̱ xi rá mʉdi bi yopa nte de gatho nú'ʉ xa du, y nú'á̱ di manda gatho nú'ʉ ya nda̱ de ja ra ximhai. Nú'á̱ ma̱caguihʉ y co rá ji'a̱ xa xʉgaguihʉ ma ts'oquihʉ. 6Ne xa hñuxcaguihʉ'a̱ ngu dyá nda̱hʉ ne ngu dyá macja̱hʉ pa ga pɛpabihʉ Ajua̱ rá Dada. ¡Drá nsunda'a̱ ngue'a̱ ja rá ts'ɛdi pa nza̱ntho! Njabʉ gue'a̱. 7¡Pa̱hʉ gue nu'á̱ ma da 'ñehe ja ya guui, y gatho ya ja̱'i ma da hyandi'a̱! Nehe di 'bʉhni nú'ʉ to'o bi sʉni'a̱ pa bi du, hangue nehe'ʉ ma da hyandi'a̱. Gatho ya ja̱'i de gatho rá ngʉni ra ximhai ma da nzoni co ra dumʉi nu stí hyandi da zøhø'a̱. Ma da njabʉ, njabʉ gue'a̱. 8“Nuga go gueque rá mʉdigui ne asta rá ga̱ts'i, ngu ya letra fʉdi desde ra A asta ra Zeta”, njabʉ ena Ajua̱ nú'a̱ 'bʉi, ne nza̱ntho xa 'mʉi, ne ma da 'mʉi pa nza̱ntho. Go gue'a̱ pɛ'tsa gatho ra ts'ɛdi. 9Núga drá Xuua ri cuguihʉ, ne mahyɛgui drí sufrihʉ ya ts'othogui. Pe da za ga tsɛthʉ ngue'a̱ mahyɛgui ma mfenihʉ co ra Zidada Jesucristo nú'a̱ to'o faxcaguihʉ pa da za ga 'bʉhʉ con gue'a̱ habʉ di nda̱'a̱. Nuga ndí 'bʉi ja 'nara zi hai rá thuhu Patmo, nura hai'a̱ o madetho de ra ndehe. Ja guehni bá ts'ogagui, ja ra uɛnda ndí jot'a fadi, ngue'a̱ ndí ma̱mbabi rá noya Ajua̱ ne ndí damajua̱ni de ra Zidada Jesucristo. 10'Nará pa ra Zidada, dá handa 'nara thedi bi 'ñutca ra Ma̱ca Nda̱hi, ne dá øde 'nara noya de møte ma xʉtha ngu rá nzʉni 'nara trompeta, 11ne mi ena: ―Nuga go gueque rá mʉdigui ne asta rá ga̱ts'i, ngu ya letra fʉdi desde ra A asta ra Zeta. 'Yofo ja 'nara hɛ'mi gatho nú'a̱ guí handi, nepʉ gui pɛhni pa Asia nuni habʉ bí ja nú'ʉ yoto ya nija̱, nu'a̱ rá mʉdi rá thuhu ra Efeso, nepʉ Esmirna, nepʉ Pergamo, nepʉ Tiatira, nepʉ Sardi, nepʉ Filadelfia, nepʉ Laodicea. 12'Mɛfa dá mpʉnts'i pa dá handi to'o nú'a̱ mi zocagui. Y nu ndá mpʉnts'i, dá handa yoto ya mfoxyo dega oro mi jani. 13Y madetho de nú'ʉ yoto ya mfoxyo dá handa 'nara 'ñøhø mi 'bahni ngu nú'a̱ bi 'ñe bi nja̱'i. Mi he 'nara he xmá ma, y asta mi tsønga ja yá ua, ne mi ngʉt'a 'nara ngʉt'i dega oro, y asta mi tsønga ja rá tiña̱. 14Ha nuyá sta̱ xi xmá nt'axi ngu ra t'axa xi'yo o ngu ra tsɛ. Nuyá da mi zø 'ñena ra tsibi. 15Nuyá ua asta mri huɛxqui ngu 'nara hoga c'ast'a bøja̱ rá thuhu ra bronse xa t'ɛnt'a ja ra tsibi ne xá coni. Nurá noya mri nt'øde nts'ɛdi 'ñena ri nhyahni ra nzøthe. 16Ne mri hña̱ ja rá 'yɛ ra 'ñɛi yoto ya tsø, y de ja rá ne mi pønga 'nara mahuai dega yo filo. Nurá hmi mi yot'i co rá nsunda sɛhɛ'a̱ 'ñena mi zø ra hyadi con gatho rá ts'ɛdi. 17Nu ndá handi'a̱, 'bestho ra ora'a̱ dá tagui ja yá ua, ne dá hødu, y nu'á̱ bi dʉngagui co rá 'yɛ ra 'ñɛi ne bi 'ñengagui: ―Oguí tsu, nuga go gueque rá mʉdigui ne asta rá ga̱ts'i. 18Nuga dí te. Dá tuhma̱, pe nubyá stá yopa nte pa nza̱ntho. Ne go drí manda nú'ʉ xa du ne dí ha̱ ya nsoqui de habʉ jot'i'ʉ. 19'Yofo gatho nú'a̱ xcá hyandi, ne nú'ʉ jabya, ne nú'ʉ ma da nja 'mɛfa de guehya. 20Nú'ʉ yoto ya tsø xcá hyandi ndí ha̱ ja ma 'ñɛi, ne nú'ʉ yoto ya mfoxyo dega oro xcá hyandi, ma ga xi'i te rí bøni'ʉ: nú'ʉ yoto ya tsø gue'ʉ yoto ya ɛnxɛ de nú'ʉ yoto ya nija̱, ha nú'ʉ yoto ya mfoxyo xcá hyandi go gue'ʉ nú'ʉ yoto ya nija̱.

will be added

X\